1 Угай бэшэг 14 - Библи

Давидай хүсэн ба баялиг

¹ Тиирэй хаан Хураам Давид руу элшэнэрые эльгээбэ. Тэдэ Ливаанай үнэтэ сэнтэй хуша модо асарба. Давидта ордон барижа үгэхэеэ модошо ба шулууша дархашуул тэдээнтэй хамта ерэбэ.

² Эзэнэй өөрыень Израилиин хаан болгожо баталһые, Өөрынь арад түмэн болохо Израилиин түлөө хаан түрыень дээрэ үргэлсэһые Давид ойлгобо.

³ Давид Иерусалимда шэнэ һамгадые абажа, үшөө хүбүүд, басагадтай болобо.

⁴ Иерусалимда түрэһэн тэрэнэй үхи хүүгэдэй нэрэнүүд гэбэл: Шаммууһа, Шобааб, Натаан, Соломоон,

⁵ Ибһаар, Элишууа, Элпээлэт,

⁶ Ноогаһ, Нээпэг, Япииһа,

⁷ мүн Элишамаа, Бээлиадаа, Элипээлэт.

Пилиштүүдые бута сохилго

⁸ Давидые бүхы Израилиин хаан болгожо, тоһо түрхин ёһолһон тухай дуулахадаа, бүхы пилиштүүд зэһэн гаража, Давидые алахаяа бэдэрбэ ха. Давид энээниие дуулажа, урдаһаань гараба.

⁹ Пилиштүүд ерэжэ, Рэпаиимэй хүндые дээрмэдэжэ мэдэбэ.

¹⁰ Давид Бурханһаа асууба: – Пилиштүүдэй урдаһаа гарахам гү? Тэдэниие диилэхэдэм туһалха гүт? Эзэн Давидта айладхаба: – Гара! Пилиштүүдые диилэхэдэтнай Би заабол таанадта туһалхаб.

¹¹ Тиигээд Давид сэрэгтэеэ Бааһал-Пэрациим руу ерэжэ, тэндэ пилиштүүдые хюдаба. Тэрэ иигэжэ хэлэбэ: – Бурхан минии урда дайсадыемни үерэй уһан мэтэ минии гараар сүмэ сохёо. Тиимэһээ тэрэ газарые Бааһал-Пэрациим гэжэ нэрлээ бэлэй.

¹² Пилиштүүд тэрьедэхэдээ, тэндэ шүтөөнүүдээ хаяа бэлэй. Давид захиралта үгэжэ, тэдэнииень галда шатаажа үгы хэбэд.

¹³ Пилиштүүд дахин ерэжэ, хүндые дээрмэдэжэ мэдэбэ.

¹⁴ Давидай Бурханһаа асуухада, Бурхан айладаба: – Урдаһаань шэглэн бү гара. Тэдэнэй араар тойрожо, лиирэ модоной түглын талаһаа тэдээндэ добтоло.

¹⁵ Лиирэ мододой орой дээгүүр алхалжа байһанай абяа дуулахадаа, таанад добтологты. Юуб гэхэдэ, Би пилиштүүдые хюдахаяа одоо тиихэдэ танай урда гараад ябана гээшэб.

¹⁶ Давид Бурханай захирһанай ёһоор бүхы юумэ бүтээжэ, Гибэһоонһоо Гээзэр хүрэтэр пилиштүүдые хюдаа һэн.

¹⁷ Давидай нэрэ соло бүхы газар дайдаар суурхаба, Эзэн бүхы арадуудые тэрэнэй нэрээр һүрдөөдэг болобо.