1 Угай бэшэг 13 - Библи

Ханзые Кирьяат-Еариимһээ Обээд-Эдоом руу абаашалга

¹ Давид мянганай, зуунай даргануудтай, мүн бүхы удамаршадтай зүбшэбэ,

² тиигээд тэрэ израильшуудай бүгэдын суглаан дээрэ иигэжэ хэлсэбэ: – Эзэнэй, манай Бурханай үршөөһэнэй ёһоор бүхы израилиин газар дээрэхи манай аха, дүүнүүдтэ, мүн санаартадта ба левидүүдтэ, тэдэнэй хотонууд болон тосхонуудта манда сугларха дохёо эльгээе;

³ өөһэдынгөө ханза тэндэһээ наашань асарха, юуб гэхэдэ, Саулай үдэрнүүдтэ, бидэ тэрээндэ нэгэшье хандаагүйбди.

⁴ Удаань суглаан иигэжэ тогтообо «Зүб, тиигэхэ ёһотой», энэ хэрэг бүхы арад түмэндэ тон зүб гээд тоологдоо.

⁵ – Тиигээд Давид Египедэй Шихоорһоо эхилээд, Хамаатай аман хүрэтэрхи бүхы израильшуудые суглуулжа, Бурханай ханза Кирьяат-Еариимһээ асарха гээд хэлсэбэд.

⁶ Давид мүн бүхы израильшууд херүүбүүд дээрэ заларагша Эзэнэй нэрээр нэрлэгдэһэн Бурханай ханзые асархаяа Иудын Баһалатаа, ондоогоор Кирьяат-Еариим, руу ябаба.

⁷ Абинадаабай гэрһээ Бурханай ханзые шэнэ тэргэ дээрэ табяад абаашабад; Уззаа Ахиһоо хоёр энэ тэргэ хүтэлэн ябаба.

⁸ Давид болон бүхы израильшууд Бурханай урда хүхилдэн, бүхы шадалаараа дуу дуулажа, ятаг, лира, хэнгэрэг, тобшуур, сан дуугарган наадажа ябаа.

⁹ Тэдэнэй Кидооной амбаарта хүрэжэ ерэхэдэ, үхэрнүүдынь торожо, ханзые хэлтылгэбэ. Уззаа тэрэ ханзада хүрэн, шүүрэн бариба.

¹⁰ Эзэн тэрэ дары Уззаада уур хилэн боложо, гараа ханза руу һунгаһанайнь түлөө тэндэнь һалгаажа, тэрэ Бурханай урда гээгдэбэ.

¹¹ Эзэнэй Уззаае һалгааһанда Давид шаналаа бэлэй, тиигээд энэ газарые Пээрэц-Уззаа гэжэ нэрлэбэ. Мүнөө болотор тэрэ иигэжэ нэрлэгдэдэг.

¹² Тэрэ үдэр Давид Бурханһаа айн, иигэжэ бодоо һэн: «Эзэнэй ханзые яагаад өөртөө абаашахабиб даа?»

¹³ Тиигээд тэрэ ханзые өөрын хото руу абаашахаяа зүрхэсөөд, Гаат хотын ажаһуугша Обээд-Эдоомой гэртэ тэрэниие шэглүүлбэ.

¹⁴ Иигэжэ Бурханай ханза Обээд-Эдоомой гэртэ гурбан һара байба. Эзэн гэр бүлыень, Обээд-Эдоомые ба бүхы юумыень юрөөбэ ха.