1 Угай бэшэг 12 - Библи

Давидай сэрэгшэд Циклаагта

¹ Тэдэнэр Киишэй хүбүүн Саулһаа Циклаагта хороод байһан Давидта сэрэгшэдэй диилэнхынь эрэлхэг зоригтой, байлдаанда туһатайнууд байһан.

² Номо һаадаг баруун, зүүншье гарнуудаараа тэгшэ харбадаг, мүн баһа шулуу шэдэдэг хүнүүд Бэньямиинэй угай Саулай аха, дүүнэр эдэ гэбэл:

³ Гибаа нютагай Шэмаагай хүбүүд, ехэнь Ахиээзэр, тэрэнэй удаа Ёһааш; Азмаавэдэй хүбүүн Езиһээл ба Пээлэт; Анатоот хотын Бэрахаа ба Еһүү;

⁴ гушанай толгойлогшо, тэдээн сооһоо эгээл зоригтойнь Гибэһоон хотын Ишмай; Гэдэраа хотын Ерэмияа, Яхазиһээл, Ёханаан ба Ёзабаад;

⁵ Харууп хотын Элузай, Еримоот, Бэһалияа, Шэмаарияа, Шэпаатияа;

⁶ Коорахай уг удамай Элканаа, Ишшияа, Азарээл, Ёһээзэр, Яшобаам;

⁷ Гэдоор хотын Ероһаамай хүбүүд Ёэлаа ба Зэбаадьяа.

⁸ Сүл губида бүхэлэлтэ соогоо Давидай байхада, Гаадай обогой зон ерэжэ, тэрээнтэй хамтарба. Тэдэ эрэлхэг, байлдааша, бамбай, жадатай хүнүүд бэлэй. Тэдэ арсалан мэтэ шэрүүн хэрзэгы шарайтай, хадын зээрэн мэтэ хурданууд;

⁹ ахалагшань Ээзэр, хоёрдохинь Обадияа, гурбадахинь Элиааб,

¹⁰ дүрбэдэхинь Мишманнаа, табадахинь Ерэмияа,

¹¹ зургаадахинь Аттай, долоодохинь Элиээл,

¹² наймадахинь Ёханаан, юһэдэхинь Элзабаад,

¹³ арбадахинь Ерэмияа, арбан нэгэдэхинь Махбаннай.

¹⁴ Тэдэнэр Гаадай хүбүүдэй таһардаһад, сэрэгэй толгойлогшонууд байгаа: багашуулынь зуунай, ехэшүүлынь мянганай дарганууд.

¹⁵ Тэдэнэр түрүүшын һарада Иордан гаталжа, эрье дээрэһээ добтолоод, зүүн, баруун голнуудта ажаһуугшадые байраһаань намнанад.

¹⁶ Давидай бэхижүүлһэн газарта Бэньямиинэй ба Иудын обогуудай зон ерэбэ.

¹⁷ Давид тэдэниие угтан абажа, тэдэнэртэ хандан, иигэжэ хэлэбэ: – Һайн дураараа манда туһалхаяа ерэбэлтнай, би тантай нэгэ зүрхэтэйб; хэрбэеэ хорото сэдьхэлтэй ерэжэ, намай дайсадтамнай тушааха байбалтнай, намда нүгэл хүрэхэгүй, манай эсэгэнэрэй Бурхан шиидхэхэл.

¹⁸ Гушанай толгойлогшо Амасайда Һүлдэ буужа, тэрэ иигэжэ хэлэбэ: – Давид, бидэ танайбди! Ишайн хүбүүн, тантай хамтабди! Танда энхэ тайбаниие хүсэнэбди! Танда туһалагша Бурхандатнай энхэ амгаланиие хүсэнэбди! Давид тэдэниие угтан абаад, сэрэгэйнгээ манлайда томилбо.

¹⁹ Мэнашшээгэй обогой зариманиинь Давидай талада оробо, тиигээд тэдэ пилиштүүдтэй хамта Саулай урдаһаа дайлалдаба. Давид ба тэрэнэй зон пилиштүүдэй түлөө дайлалдаа бэшэ. Пилиштын удамаршад өөһэд хоорондоо зүбшөөд, тэдэниие эльгээхэдээ, иигэжэ хэлэбэд: – Манай толгой дээгүүр гараад, өөрынгөө эзэн Саулай талада орохо.

²⁰ Тэрэнэй Циклааг бусажа ерэхэдэ, тэрээндэ Аднаах, Ёзабаад, Едиаһээл, Михаээл, Ёзабаад, Элиһүү, Циллэтай гэгшэ мэнашшээнүүдэй мянганай толгойлогшод шэлжэбэ.

²¹ Тэдэнэр Давидай дайсадтай тэмсэлдэ ехээр туһалаа, юуб гэхэдэ, тэдэнэр эрэлхэг зоригтой, бэрхэ сэрэгэй дарганууд байһан юм.

²² Үдэр хоногой үнгэрхэ бүри Давидта үзүүлэгдэһэн туһаламжань бүри үргэдэжэ, Бурханай туһаламжаар сэрэгынь улам олон болобо.

²³ Эзэнэй айладаһанай ёһоор, Саулай хан түрые Давидта дамжуулха зорилготойгоор Хэброон ерэһэн сэрэгэй ахамад удамаршадай тоо иимэ:

²⁴ Иудын хүбүүдһээ дайнда түгэс бэлэн, жада халхабшатай зургаан мянган найман зуун;

²⁵ Симеоной хүбүүдһээ долоон мянган зуун;

²⁶ Левиин хүбүүдһээ дүрбэн мянган зургаан зуун.

²⁷ Аһарооной обогой гулбаа Ёядаа, мүн тэрээнтэй гурбан мянган долоон зуун;

²⁸ Эрэлхэг эдир Цадоок, мүн тэрэнэй обог хорин хоёр даргатаяа;

²⁹ Бэньямиинэй хүбүүдэй Саулай аха дүүнүүдһээ гурбан мянган, гэбэшье тэдэнэй олониинь Саулай тала баридаг байгаа.

³⁰ Эпрааимай хүбүүдһээ эрэлхэг зоригтой өөһэдынгөө обогто суутай хорин мянган найман зуун;

³¹ Давидые хан шэрээдэ һуулгаха хэрэгтэ хабаадаһан, Мэнашшээгэй хахад үеһөө арбан найман мянган;

³² Иссахаарай хүбүүдһээ сэсэн ухаатай Израильда юунэй хэрэгтэйе мэдэрһэн хоёр зуун ахамад, мүн тэрэнэй уряагаар тэмсэлдэ бодохо бүхы аха дүүнэрынь;

³³ Зэбүлүүнэй үеһөө дайн байлдаанда нэгэ эрмэлзэлтэй, элдэб элдэб зэбсэгүүдые түгэс шудалһан табин мянган;

³⁴ Напталиигай обогһоо мянган удамаршад, мүн тэрээнтэй хамта халхабша жадануудтай гашан долоон мянган;

³⁵ Даанай үеһөө байлдаанда хабаадаха хорин найман мянган зургаан зуун;

³⁶ Ашээрһээ байлдаанда түгэс бэлэн дүшэн мянган;

³⁷ Иорданһаа Рэүбээнэй, Гаадай обогуудһаа, мүн Мэнашшээгэй хахад үеһөө түгэс зэбсэгтэй зуун хорин мянган.

³⁸ Давидые бүгэдэ Израилиин шэрээдэ һуулгаха зорилготойгоор эдэ бүхы сэрэг сэбэр сэдьхэлээрээ Хэброон ерэбэд. Мүн бэшэнииньшье Давидые хан шэрээдэ һуулгаха хэрэгтэ һанал нэгэтэйнүүд байгаа.

³⁹ Тэдэнэр Давидта гурбан үдэр байжа, эдеэлээ, уугаа; юуб гэхэдэ, аха, дүүнүүдынь эдэ бүгэдые бэлдээ.

⁴⁰ Тэдэнэй бүхы дүтын хүнүүд, мүн тиихэдэ Иссахаарай, Зэбүлүүнэй ба Напталиигай отогойхид бүхы эдеэ хоол гэхэ гү, али гурил, алим жэмэсүүдые үзэм, элдэб түхэлэй тоһонуудые элжэгэнүүдээр, тэмээнүүдээр, сарнуудаар, лусуудаар асараа, олон эбэртэ бодо жэжэ мал туужа ерээ; энэ баяр Израилиин ерээдүй хүгжэлтэдэ зорюулагдаа.