Фессалоникиинхидтэ 1-дэхи 1 - Библи

Амаршалга

¹ Фессалоники хотын һүзэглэгшэдэй бүлгэм, таанадые Павел, Силуан, Тимофей гурбан амаршална. Эсэгэ Бурхан ба Эзэн Иисүүс Христоос таанадта үршөөл хайра ба амгалан тайбаниие үршөөг лэ!

Фессалоники хотынхидой һүзэг ба ажамидарал

² Та бүхэнэй түлөө бидэ Бурханда ходо баясхалан хүргэжэ, та бүхэниие үргэлжэ зальбаралдаа дурданабди.

³ Эсэгэ Бурханай урда тээ этигэл һүзэгөө хэрэг дээрээ бэелүүлдэг байһыетнай, хайра дуран ажалыетнай бэхижүүлдэг байһыень, Эзэн Иисүүс Христоосто бэхи батаар найдажа байдагыетнай бидэ үргэлжэ һанадагбди.

⁴ Аха дүүнэрни, Бурхан таанадта дуратай, таанадые шэлэжэ абаа гэжэ бидэ мэдэнэбди.

⁵ Һайн Мэдээсэлые таанадта асархадаа, бидэ ганса үгэнүүдые хэрэглээ бэшэ, үшөө Арюун Һүлдын хүсэ хэрэглээбди. Һайн Мэдээсэлэй үнэн зүб байһыень харуулаабди. Таанадай дунда байхадаа, танай аша туһада яажа амидаржа байһыемнай таанад мэдэнэт.

⁶ Таанад маанадта болон Эзэндэ һажаан ажамидаржа эхилээ һэнта. Ехэ зобожо байһаншье һаа, Бурханай үгые таанад баяртайгаар угтажа абаа һэнта. Энэ баярые таанадта Арюун Һүлдэ олгоно.

⁷ Тиигэжэ таанад Македонидо ба Ахайяда амидарһан бүхы һүзэглэгшэдтэ жэшээ харуулбат.

⁸ Таанад Македонидо ба Ахайяда ганса Бурханай үгэ тараагаа бэшэт, үшөө таанадай Бурханда һүзэглэдэг тухай мэдээсэл хаа хаанагүй тараа. Тиимэһээ дахин дурдаһанай хэрэггүй.

^9-10 Маанадай таанадта ошоходо, таанадай яажа бидэниие угтажа абаһан тухай, онгонуудаа орхижо, Бурханда хандаһан тухайтнай булта хөөрэлдэнэ. Үнэн зүб ба амиды Бурханда алба хэхэ һанаатайгаар, маанад дээрэ ерээдүйдэ бууха ёһотой Бурханай уур сухалһаа аршалжа байһан, үхөөд амидырһан Христоосой тэнгэриһээ буужа ерэхые хүлеэхэ һанаатайгаар таанад Бурханда хандаат.