TIENWOGIKAL 9 - BUKUIT NE TILIL

Kiruogutik che bo iman che bo Jehovah

Bo Ne O eng’ Butik; eng’ Mut-laben. Tiendab Kalosunet ne bo Daudi

¹ Aweekyini Jehovah kongoi eng’ muguleldanyu tugul; Abartoi kwong’utiguk tugul.

² Abaibaitu ak agasige eng’ inye: Atienjini kalosunet kaineng’ung’, ee, inye Ne Toror Mising’.

³ Ye kaweek let bunikyuk, Ibutos ak kolusyo eng’ taing’ung’.

⁴ Amu kiiyai kiruogennyu ak ng’alekyuk; Kiitebe ng’echeretab laitornatet iruoch eng’ iman.

⁵ Kiiger kong’ bororiosiek, ak kiing’em sogoranet, Kiibukte kainenywa koigeny agoi koigeny.

⁶ Kigogesgei bunik, kigoek surkwen agoi koigeny; Ak nganasok che kiing’em; Kigogesgei kabwatet ne kibwate icheget.

⁷ Ago tebyei Jehovah koigeny: Kigochopchi ng’echerennyi bo laitornatet kiruoget.

⁸ Ak iruokyin inendet ng’ony eng’ imanda, Ibesiechin bik kiruoget eng’ imanda.

⁹ Egu Jehovah irimetab ne kiusei, Irimet eng’ betusiekab nyalilda;

¹⁰ Ak imang’un che ingen kaineng’ung’; Amu ma imete inye, Jehovah che cheng’in.

¹¹ Otienji kalosunet Jehovah ne menyei Sion: Omwaite boisionikyik eng’ kwenutab bik.

¹² Amu ibwati ichek ne yaaktoi mugetut agobo korotik: Mautie rirekab kibananok.

¹³ Rirena, ee Jehovah; Keer nyalildanyu agobo ichek che wecha, Inye ne itogosunena eng’ kurgotikab meet;

¹⁴ Si kobiit abarta kalosuneng’ung’ tugul: Eng’ kurgotikab cheptab Sion, Agasege yetuneng’ung’.

¹⁵ Kagororokyi bororiosiek keringet ne kibalei: Kagonam kelyekwak mestet ne kiga uny.

¹⁶ Kigoborgei Jehovah, kigoruoch: Kigonam kiptengekyot boisietab eunekyik. Higaion.

¹⁷ Weechegei kiptengeginik kobendi oldab meet, Agot bororiosiek tugul che utie Kamuktaindet.

¹⁸ Amu magiutie kotugul kibananok, Ama betei koigeny kamang’unetab che nyalildos.

¹⁹ Ng’eet, ee Jehovah; amat ichamji bik koterteris: Ingiruoksechi bororiosiek eng’ taing’ung’.

²⁰ Ee Jehovah, imu ichek: Ingonai bororiosiek kole ichek ko bik kityo.