TIENWOGIKAL 144 - BUKUIT NE TILIL

Saet si komong’une chi bichiindo

Tiendab kalosunet ne bo Daudi.

¹ Iberurot Jehovah ruandennyu, Ne ineti eunekyuk luget, Ak koneti morikyuk boriet:

² Inendet chamnyennyu ne tala, ak irimennyu, Teeksennyu ne koi, ak sorunindennyu; Long’ennyu, ak inendet ne amang’u; Ne igochin bikyuk kogasa it.

³ Jehovah, tos nee chi, kot inai? Anan weritab chi, ne tos iit ile kiy?

⁴ Kergei chi ak kiy buch; U betusiekyik merumbet ne siirtoi.

⁵ Ing’uruch kipsengwetisieguk, ee Jehovah, ak ichoruge: Twa tulonok, si koiyenso,

⁶ Iyokte kalyelet, ak iyeste ichek; Mwokte kipchaboniguk, ak inyalil ichek.

⁷ Iyogau eung’ung’ eng’ barak; Itiacha, ak isorua eng’ beek che chang’, Eng’ eunekab toek;

⁸ Che nyalili kutuswekwak tugukab buch, Ak eunekwak che bo tai ko eunek che bo lembech.

⁹ Atienun tiendo ne leel, ee Kamuktaindet, Atienun kalosunoik eng’ kibugandet ne bo inoik taman.

¹⁰ Inendet ne igochin yetunet laitorinik: Ne soru Daudi kiboitiondennyi eng’ rotwetab chok ne bo yaitiet.

¹¹ Itiacha, ak isorua eng’ eunekab toek, Che nyalili kutuswekwak tugukab buch, Ak eunekwak che bo tai ko eunek che bo lembech.

¹² Ye kagergeit werikyok ko ta ko neran ak ketik che bitos; Ak kogergeit tibikyok ak koikab luita che kigiwai ko u che bo gotab laitoriat;

¹³ Ye nyiitat chogenikyok tuguk tugul che konorotin: Ak koiiyo kechirekyok elfusiek ak tamanusiekab elfusiek eng’ korotinwekyok;

¹⁴ Ye laisei eikyok; Ye mami ne ibogu, ama mi ondo. Ama biit kateiyet eng’ ortinwekyok che eechen;

¹⁵ Boiboen bik, che tebyei ko u noto: Ee, boiboen bik, che Kamuktaindenywa ko Jehovah.