TAUNET 28 - BUKUIT NE TILIL

Kowendi Jakobo kocheng’ei kwondo

¹ Kiguur anyun Isak Jakobo konyo koberur inendet, ak kotigon kolenji, Ametun cheptab Kanan.

² Ng’eet ak iwe Padan-aram, gotab Betuel kwandab komet; iwe itun chepto eng’ tibikab Laban ne tupcho ak komet.

³ Ingoberurin Kamuktaindet ne bo Kamuktaet, ak koyabin eng’ iyotet ak kobarain, si kobiit iegu tuiyetab bik che chang’;

⁴ ingogonin berurto ne bo Abraham, inye, ak lagoguk; si kobunjin emoni iwendote ko i toondet, ne kiigochi Kamuktaindet Abraham.

⁵ Ak kiiyokto Isak Jakobo kwo: ak kiwa anyun agoi Padan-aram oldab Laban, weritab Betuel Siriaindet, ng’etab kametab Rebeka, kametab Jakobo ak Esau.

⁶ Kigeer anyun Esau kole, kigoberur Isak Jakobo ak koyokto kwo Padan-aram, kwo kotunis eng’ olindo; ak kingoberuri kotigoni kolenjin, Ametun cheptab Kanan;

⁷ ak kigeer kole kogas it Jakobo kwandanyi ak kamet, ak kakwa Padan-aram;

⁸ ak ye kingogeer Esau kole, maiboiboi kwandanyi Isak tibikab Kanan;

⁹ kwo anyun Esau oldab Ismael, kwo kotun osotiot age kosione chun, Maalat cheptab Ismael weritab Abraham, cheptab kametab Nebaiot.

Karuotitoetab Jakobo eng’ Bet-el

¹⁰ Kiwa Jakobo anyun eng’ Beer-seba, kotokyigei Haran.

¹¹ Ak kiit komosta age, ak kiru yoto kemounoto, amu kiga kororokta asista; ak kinam koitab oloto kotiie met, ak koru konuuch.

¹² Ak kigeer eng’ karuotitoet long’eiywot ne kagitonon eng’ ng’ony, ne itei kipsengwet: ogeero, malaikaisiek che bo Kamuktaindet che kitogostae ak kochorunegei.

¹³ Ak kitononi Jehovah eng’ ye negite inendet, ak kile, A Jehovah, Kamuktaindet ne bo kwandang’ung’ Abraham, A Kamuktaindet ne bo Isak: agonin emoni irue, koboto lagoguk;

¹⁴ ak tun tenitu lagoguk temburiekab ng’ony, ak iyomu cherongo ak kong’asis, ak murot ne bo katam, ak murot ne bo tai: ak kiberuri ortinwek tugul che bo ng’ony eng’ inye ak eng’ lagoguk.

¹⁵ Ak keero, ami koboten, ak aribotin eng’ oldo tugul ole iwendi, ak tun amutun inyo emoni kogeny; amu mametoin agoi tun ayai tugul che kaamwaun.

¹⁶ Kigos anyun Jakobo eng’ ruondo, ak kole, Mi Jehovah olito iman; ago koma anai.

¹⁷ Ak kiiywei, ak kole, Tia kaiyweisiet ne mi yu! Ni ko gotab Kamuktaindet iman, ak ko kurgetab kipsengwet.

¹⁸ Ak king’eet Jakobo karon mising’, ak konam koita ne koga tiie metit, ak kolumda koek toloita, ak kirong’ji mwaita baragunnyi.

¹⁹ Ak kitochi yoto kainet koguure Betel: ago kigiguure nganasanato eng’ tai Lus.

²⁰ Ak kiiyosio Jakobo, kole, Ngot koteb Kamuktaindet kobota, ak koribota eng’ orani awendi, ak kobaata, ak kogona ngoroik che alaachi,

²¹ agoi tun aweekyige gotab baba eng’ kalyet, koek anyun Jehovah Kamuktaindennyu,

²² ak koek gotab Kamuktaindet koita ni kalumde koek toloita: ak agonin iman kebeberta ne bo taman eng’ tuguk tugul che igona.