NG'ATUTIK 4 - BUKUIT NE TILIL

Kogiili Musa Israelik kogas it

¹ Ara anyun, ee Israel, oepchi it ng’atutik ak kiruogutik, che anetok, si kobiit oyai; si osopche, ak obe onam kobunjok emet ne konok Jehovah Kamuktaindetab kwanisiekwok.

² Amotesyi kiy ng’olyot ne ang’atok, anan ochuchuch alak, si kobiit orib ng’atutikab Jehovah Kamuktindeng’wong’ che ang’atok.

³ Kigogeer konyekwok tuguk che kiyai Jehovah agobo Baal-peor: amu kigobar Jehovah Kamuktaindeng’ung’ eng’ kwenung’ung’ bik tugul che kiisub Baal-peor.

⁴ Ago okwek che kionamgei ak Jehovah Kamuktaindeng’wong’ kosobei ra age tugul eng’ okwek.

⁵ Ogeero, kianetak ng’atutik ak kiruogutik, ko u ye king’ata Jehovah Kamuktaindennyu, si kobiit oyai choto eng’ emet ne obendi oname.

⁶ Orib anyun ak oyai; amu ng’omnateng’wong’ nito ak naeng’wong’ eng’ taitab bororiosiek, che tun kasei ng’atutichu tugul, ak kole, Ng’om iman bororioni o ak kotinyei naet.

⁷ Amu ngoro bororiet ne o, ne negite Jehovah ichek, ko u Jehovah Kamuktaindennyo ne negit eng’ ui tugul ye kiguure inendet?

⁸ Ak tos ngoro bororiet ne o, ne tinyei ng’atutik ak kiruogutik che bo imanda ko u etanutichu tugul, che kande taing’wong’ betuni?

⁹ Ripgei anyun, ak irib sobondang’ung’ eng’ kagiiletab ge, si meutie tuguk che kigeer konyeguk, ak si mamanda eng’ muguleldang’ung’ eng’ betusieguk tugul che bo sobeng’ung’; agoi inet lagoguk tuguchuto ak mochogoroniguk;

¹⁰ eng’ betut ne kiitonone taitab Jehovah Kamuktaindeng’ung’ eng’ Horeb, ye kilenja Jehovah, Iyumwa bik, ak agochi kogas ng’alekyuk, si konetgei koiywea eng’ betusiekwak tugul komi ng’ony, ak si konet lagokwak.

¹¹ Ak kiobwa origu otononse eng’ tulwet kel; ak kilalei mat eng’ tulwet agoi kipsengwetisiek kwen, koboto mesundeito, boldet ak imenindo ne o.

¹² Ak king’alalwok Jehovah ko mi kwenutab mat: kiogas twegunetab ng’alek, ago kima ogeer itondo; kutit kityo.

¹³ Ak kimwawok kayomisennyi, ne king’atak oyai, ng’atutichu taman; ak kisirji koik aeng’ che lebelen.

¹⁴ Ak king’ata Jehovah betunoto anetak ng’atutik ak kiruogutik, si kobiit oyai eng’ emet ne obendi oname kobunjok.

¹⁵ Oripge anyun mising’; amu kima ogeer iton age tugul eng’ betut ne king’alalwok Jehovah eng’ Horeb eng’ mat:

¹⁶ si mong’emgei, ak oyachigei kanamwet eng’ kergeindab kiy age tugul, itondab muren anan kobogorio,

¹⁷ anan itondab tiony age tugul ne mi ng’ony, anan itondab tarit age tugul ne tirireni eng’ barak.

¹⁸ Anan itondab kiy age tugul ne ichuutegei ng’ony, anan itondab njiriot age tugul ne mi beek che mi ng’ony orit:

¹⁹ si ma ye inyal barak, igeer asista ak arawet ak kecheik, agot chang’indo tugul che mi kipsengwetisiek, kochuutin iwe isa tukchoto, ak iot tuguchoto kigopchechi Jehovah Kamuktaindeng’ung’ bororiosiek tugul che mi kureretab kipsengwetisiek.

²⁰ Ago konamak Jehovah, ak komutwak omong’une matab karnet, eng’ Misri, oegu bikab borotennyi, ko u rani.

²¹ Koboto noto, kinerekya Jehovah agobo okwek, ak kiiyosio kole melandoe Jordan, ameite emonoto kararan, ne konin Jehovah Kamuktaindeng’ung’, inye Israel, inyaban:

²² ago amechini ane emoni, malandoe Jordan: ago olandoi okwek, oname emonoto kararan.

²³ Oripge anyun, si meutie kayomisetab Jehovah Kamuktaindeng’ung’, ne kiyai kobotok, ak oyai kanamwet eng’ kergeindab kiy age tugul ne kietenen Jehovah Kamuktaindeng’ung’.

²⁴ Amu Jehovah Kamuktaindeng’ung’ ko mat ne iwong’u, ak kotinyei ng’et kong’.

²⁵ Ye isich lagok, ak mochogoronik, ak koga omeny emet keny, ak ong’emgei, ak oyai kanamwet eng’ kergeindab kiy age tugul, ak oyai ne ya eng’ taitab Jehovah Kamuktaindeng’ung’, otach inendet;

²⁶ kaguur kipsengwet ak ng’ony kobaorianjin betuni, ale osib olustosi owong’ugei eng’ emet ne obendi olandoe Jordan oname kobunjok; machang’aitu betusiekwok eng’ oloto, ago king’emok owong’ugei.

²⁷ Ak koiyestak Jehovah oyomu bororiosiek, ak ong’etu che ng’ering’ eng’ bororiosiek, ole imutok Jehovah.

²⁸ Ak oot kanamonik eng’ oloto, boisietab eunekab bik, che bo ketik ak koik, che mageerei kiy, ama kastoi, ama amisiei, anan kong’uto.

²⁹ Ago ngocheng’ eng’ oloto Jehovah Kamuktaindeng’ung’, inyoru inendet ngicheng’ eng’ muguleldang’ung’ tugul ak eng’ sobondang’ung’ tugul.

³⁰ Ak ye imitei nyalilda, ak kobwanjin tuguchu tugul, iweekyigei Jehovah Kamuktaindeng’ung’ anyun eng’ betusiek che bo let, ak igas kutinnyi:

³¹ amu Jehovah Kamuktaindeng’ung’ ko Kamuktaindet ne bo rirenet; mametoin, anan kowong’un, anan koutie kayomisetab kwanisieguk ne kiiyosiechi.

³² Teeb anyun nguno agobo betusiek che kigosiirto che kiisib kondounenen koboch ngab kotoi Kamuktaindet koyai chi eng’ ng’ony, koboch tabanda age ne bo kipsengwet agoi tabanda age, teeb ngo kigobiit kit age ne o ne u ni, anan ngo kigegasei?

³³ Tos kigogasei bik ole kigoi kutitab Kamuktaindet kong’alali eng’ kwenutab mat, ko u ye kiigas, ak kosopcho?

³⁴ Anan kitiem Kamuktaindet au komutyigei bororiet eng’ bororiet age, eng’ tiemisiosiek, eng’ kaborunoik, ak eng’ kwong’utik, ak eng’ boriet, ak eng’ eut ne kim, eng’ eut ne chuulat, eng’ kamuisosiek che eechen, ko u tugul che kiyaiywok Jehovah Kamuktaindeng’wong’ eng’ Misri eng’ taitab konyekwok?

³⁵ Kigiborun inye, si kobiit inai ile, Jehovah inendet ko Kamuktaindent; mami age kobate inendet inegei.

³⁶ Kigonin igas kutinnyi ne mong’une kipsengwet, si kobiit konetin: ak kigonin igeer mannyi ne o eng’ ng’ony; ak kiigas ng’alekyik komong’une kwenutab mat.

³⁷ Amu kichamei kwanisieguk, kolewen anyun inendet iyotenywa ne biitu let, ak komoong’un eng’ Misri ko mi koboten, eng’ kimnatennyi ne o;

³⁸ si koon bororiosiek eng’ taing’ung’, che eechen ak ko kimen kosiirin, si komutun imong’u olito, kogonin emenywa koek boroteng’ung’, ko u betuni.

³⁹ Nai anyun rani, ak igonor eng’ muguleldang’ung’ ile, Jehovah ko Kamuktaindet eng’ barak kipsengwet ak eng’ ng’ony orit: mami age.

⁴⁰ Ak kirib anyun konetisiosiekyik ak ng’atutikyik che kang’atin rani, si komieit eng’ inye, koboto lagoguk che biitu let, ak kochang’ait betusieguk eng’ emet ne konin Jehovah Kamuktaindeng’ung’, koigeny.

⁴¹ Kiitaban anyun Musa nganasok somok eng’ Jordan bitonin ole bo kong’asis;

⁴² si komwechi oloto rumindet, ne kibar chitab kokwennyi eng’ lelset, ne kima kowechei inendet eng’ betusiek che kigosiirto; si kosob ne kamwechi age eng’ nganasochoto:

⁴³ choto ko Beser eng’ ong’atet eng’ emetab warenget, kobunji bikab Reuben; ak Ramot eng’ Gilead, kobunji bikab Gad; ak Golan eng’ Basan, kobunji bikab Manase.

⁴⁴ Ni ng’atutiet ne kiinde Musa taitab lagokab Israel:

⁴⁵ chuto baornatosiek, ak konetisiosiek, ak kiruogutik, che kimwachi Musa lagokab Israel, ye kingo kagomong’une Misri;

⁴⁶ Jordan bitonin, eng’ atebwet ne tokyingei Bet-peor, emetab Sihon laitoriatab Amorik, ne kimenyei Hesbon, ne kibar Musa ak lagokab Israel, kingo kagomong’ ichek eng’ Misri.

⁴⁷ Ak konam emennyi kobunji, ak emetab Og laitoriatab Basan; laitorinichoto aeng’ che bo Amorik, che kimenyei Jordan bitonin eng’ komostab kong’asis;

⁴⁸ koboch Aroer, ne mi tabandab atebwetab Arnon, agoi tulwet ne bo Sion, (noto ko Hermon),

⁴⁹ ak Araba tugul ne mi Jordan bitonin eng’ komostab kong’asis, agoi nyanjet ne mi Araba, ne mitei Pisga kel.