NG'ATUTIK 28 - BUKUIT NE TILIL

Kaberuroik che biitu amu kasetab it

¹ Ak ngiepchi it kutitab Jehovah Kamuktaindeng’ung’ eng’ kagiiletab ge, irib iyai ng’atutikyik tugul che kaang’atin rani, koeetin anyun Jehovah Kamuktaindeng’ung’ isiir bororiosiek tugul che mi ng’ony:

² ak kobwanjinin kaberurosiechu tugul, koityin, ngiepchi it kutitab Jehovah Kamuktaindeng’ung’.

³ Kiberurin eng’ nganaset, kiberurin eng’ mbar.

⁴ Kiberuri iyoteng’ung’, ak iyotetab emeng’ung’, ak iyotetab akwotisieguk ak ne bo tuguk ak arekab kechireguk.

⁵ Kiberuri kitongeng’ung’ ak tereng’ung’ ne kitangware busiek.

⁶ Kiberurin ye imong’u, ak kiberurin ye imandoi sang’.

⁷ Igoitoi Jehovah buniguk che ng’eetyinin kiterter eng’ taing’ung’: ibokyinin eng’ oret agenge, ago mwee ortinwek tisab eng’ taing’ung’.

⁸ Ng’atei Jehovah berurto konyonjin, eng’ chogeniguk ak eng’ tugul che iyai eng’ eung’ung’; ak iberurin eng’ emet ne konin Jehovah Kamuktaindeng’ung’.

⁹ Ak kogimitin Jehovah iegu bororiennyi ne tilil, ko u ye kiiyosieun; ngirib ng’atutikab Jehovah Kamuktaindeng’ung’, iwendote ortinwekyik.

¹⁰ Ak kogeer bororiosiek tugul che bo ng’ony kole kiguurtoenen kainetab Jehovah; ak koiywein.

¹¹ Ak koyabin Jehovah ibaraitu iegu ne nyiitat mieindo, eng’ iyoteng’ung’, ak eng’ iyotetab akwotisieguk, ak eng’ iyotetab koreng’ung’, eng’ emet ne kiiyosiechi Jehovah kwanisieguk kole konin.

¹² Yatun Jehovah konoruennyi ne kararan noto ko kipsengwet korobonji emeng’ung’ eng’ betusiekyik, ak koberur boisionik tugul che bo euneguk: ak ibesendochi bororiosiek che chang’, ago mebeseni.

¹³ Yain Jehovah iegu metit ago meegu katutiet; ak iegu ne mi barak kityo, ago meegu ne mi ng’ony; ngiepchi it ng’atutikab Jehovah Kamuktaindeng’ung’, che ang’atin rani, irib ak iyai;

¹⁴ ngo meistoege ng’olyo age tugul ne ang’atin rani, iwe tai anan katam, isub kanamonik iot.

Chubisiosiek che biitu amu bistoet

¹⁵ Ago ngo meepchi it kutitab Jehovah Kamuktaindeng’ung’, irib iyai ng’atutikyik tugul ak konetisiosiekyik che ang’atin rani; kobwanjin koityin anyun chubisiosiechu tugul.

¹⁶ Kichubin eng’ nganaset, ak kichubin eng’ mbar.

¹⁷ Kichubei kitongeng’ung’ ak tereng’ung’ ne kitangware busiek.

¹⁸ Kichubei iyoteng’ung’, ak iyotetab emeng’ung’, ak ne bo tuguk ak arekab kechireguk.

¹⁹ Kichubin ye imong’u, ak kichubin ye imandoi sang’.

²⁰ Iyogun Jehovah chubisiet ak nyalilda, ak keretab kong’, eng’ tugul che iyae euneguk, agoi kong’emin, ak agoi ilus ichakte; amu yaitietab boisioniguk ne kigonin ibagakta.

²¹ Konin Jehovah koroito konamin agoi kowong’un eng’ emet ne iwendi iname kobunjin.

²² Birin Jehovah eng’ chebuonit, ak mat ne mi borto, ak kabwanet, ak mat ne ng’wan, ak rotwetab chok, ak chelalitiet, ak uchatet: onotin choto agoi ilus.

²³ Ak egu sugunwet kipsengwet ne mi baragung’ung’, ak koek karnet ng’ony ne itieche.

²⁴ Yaei Jehovah roptab emeng’ung’ koek temburiek ak ng’ung’unyek: chorjiningei choto eng’ kipsengwet, agoi igesuge.

²⁵ Igoitoin Jehovah koterterin buniguk: ibokyini eng’ oret agenge, ak imwee eng’ tainywa eng’ ortinwek tisab: ak koonatin bororiosiek tugul che bo ng’ony.

²⁶ Ak koek mustang’ung’ amditab taritik tugul che bo barak, ak tiong’ik che bo ng’ony, ak mabiitu chi ne iyestoi.

²⁷ Birenen Jehovah ondirik che bo Misri, ak kabwondo, ak kochek, ak simbiriek, che magimuchi kisoobun.

²⁸ Birenen Jehovah iywek, ak koratet, ak kaiyweisiet ne bo muguleldo:

²⁹ iwendi isabsabisioti bet kwen, ko u ye sabsabisioti kipkoratiat eng’ mesundeito, ama kiberurin eng’ ortinweguk: ak kinyalilin kityo ak kerebenen tuguguk kotugul, ama biitu ne sorun.

³⁰ Ituni osotiot, ak koipgei ak chito age: iteeche got, amemenye: imine mbaretab sabibuk, amebute logoekwak.

³¹ Kienyei eitang’ung’ igeere, ameame banyekyik: kirebenen sigirieng’ung’ eng’ koromnatet, igeere, ama kiweegun: kigochin kechireguk buniguk, ama biitu chi ne sorun.

³² Kigochin bororiet age weriguk ak tibiguk, ak keerei konyeguk ak koamjin emo ichek betut komugul: ametinye kimnatet eng’ eung’ung’.

³³ Amei bororiet ne mengen logoekab emeng’ung’, ak boisioniguk tugul; kinyalilin ak ketiekyinin ng’ony kotugul:

³⁴ agoi koamin iywek amu tugul che igeere eng’ konyeguk.

³⁵ Birei Jehovah kutung’oiguk, ak kelyeguk, eng’ ondirik che ng’wonen, che magimuchi kisoobun, koboch keldebesiet agoi metit barak.

³⁶ Imutin Jehovah koboto laitoriandeng’ung’ ne tun indoi koboun, agoi iit bororiet ne mengen, inye, anan kwanisieguk; ak iot kanamonik eng’ oloto, che bo ketik ak koik.

³⁷ Ak iegu kwong’utiet, ak kalewenet, ak atindiot, eng’ kwenutab bik tugul ole imutyinin Jehovah.

³⁸ Iibe keswek che chang’ mbar, ago igese che ng’ering’; amu tarei chereng’endet.

³⁹ Imine mbarenikab sabibuk ak isemberi, ago mee divaikyik, anan ibut logoek; amu amei kutik.

⁴⁰ Itinye emitik eng’ kiwotosieguk tugul, ago meilege mwanikwak; amu iroroi logoekwak che bo emitiguk.

⁴¹ Isiche werik ak tibik, ago maegu cheguk; amu kiluulei.

⁴² Bunjin chereng’endet ketiguk tugul ak ruratetab emeng’ung’.

⁴³ Tororitu toondet ne mi kwenung’ung’ kosiirin; ak iming’initu mising’.

⁴⁴ Besendoun inendet, ago mebesendochini: egu inendet metit, ak iegu katutiet.

⁴⁵ Ak kobwanjin chubisiosiechu tugul, koonatin, agoi konamin, agoi kong’emin; amu ma iepchi it kutitab Jehovah Kamuktaindeng’ung’, irib ng’atutikyik ak konetisiosiekyik che king’atin:

⁴⁶ ak kotebenen choto koek kaborunet ak kwong’utiet, ak kotebe iyoteng’ung’ agoi koigeny.

⁴⁷ Amu meboisiechini Jehovah Kamuktaindeng’ung’ eng’ boiboindo, ak eng’ kagesetab ge ne bo muguleldo, amu chang’indab tuguk tugul:

⁴⁸ iote anyun buniguk che imutun Jehovah kong’eetyin, eng’ rubet, ak eng’ melelda, ak eng’ ach ngorit, ak eng’ rarunetab tuguk tugul: ak konde chogitab karnet kaating’ung’, agoi kobarin.

⁴⁹ Imutun Jehovah bororiet konyo koborienen ne bunu ole loo, tabandab ng’ony, ko u ye tirireni kipsichit; bororiet ne megase ng’alekwak;

⁵⁰ bororiet ne korom igeere, ne meiiti chi ne os, ama rire lakwa:

⁵¹ ak koam iyotetab tuguk, ak ruratetab emeng’ung’, agoi kowong’un: ne mabagagun bek, anan divaik, anan mwanik, anan iyotetab tuguk, anan arekab kechireguk, agoi kolusin.

⁵² Ak koyiemin eng’ kurgotiguk tugul, agoi kolulyo irimoiguk che koen, che ng’ototin, che imang’u, eng’ emeng’ung’ komugul: yiemin eng’ kurgotiguk tugul eng’ emeng’ung’ komugul, ne kigogonin Jehovah Kamuktaindeng’ung’.

⁵³ Ak iam iyoteng’ung’ banyekab weriguk ak tibiguk che kigonin Jehovah Kamuktaindeng’ung’; ye kagoyiemin buniguk, ak eng’ bichiindo ne ibun buniguk.

⁵⁴ Ak kogeere kong’ ne ya chito ne ko kiptalbisio ak ko ng’arng’arge ne mi kwenung’wong’, ng’etab kamet ak osotiondennyi ne chamei, ak lagokyik che kang’et:

⁵⁵ kot ko macham kobutyi chi age tugul eng’ ichek banyekab lagokyik che amei, amu mang’etyi kiy inendet; amu yiemet ak amu bichiindo ne ibun buniguk eng’ kurgotiguk tugul.

⁵⁶ Ak kogeere kong’ ne ya kwondo ne mi kwenung’wong’ ne cheptalbisio ak ko ng’arng’ar ne machamei kotiegat ng’ony amu talbistanyi ak ng’arng’arindo, manong’otiondennyi ne chamei, ak eng’ werinnyi, ak eng’ cheptanyi;

⁵⁷ ak eng’ sindariet ne sichei inendet, ak eng’ lagokyik che sichei; amei eng’ ung’ot amu bananda: eng’ kamuutetab nganaset ak eng’ rubet amu keret ne kerei kurgotiguk buniguk.

⁵⁸ Ngo merib iyai ng’alek tugul che bo ng’atutioni che kigisirji bukuini, si kobiit igonyit kainani bo teegisto, kainet ne kiywei JEHOVAH KAMUKTAINDENG’UNG’;

⁵⁹ koyai anyun Jehovah korotweguk koek che kikwong’e, ak korotwekab iyoteng’ung’, korotwek che eechen, che tebyei keny, ak mianwek che yaachen, che tebyei keny.

⁶⁰ Ak koweekyin mianwek tugul che bo Misri, che kiiywei; ak konamin.

⁶¹ Kogeny ibun Jehovah miando age tugul, ak koroito age tugul, ne ma kisirji bukuitab ng’atutioni, agoi kiwong’un.

⁶² Ak ong’etu che ng’ering’, che ki aechin chang’indang’wong’ ak kecheikab kipsengwetisiek; amu kima iepchi it kutitab Jehovah Kamuktaindeng’ung’.

⁶³ Ak ko u ye kibaibait Jehovah eng’ okwek koyaiywok ne mie, ak kotesak; u noto boiboitu Jehovah eng’ okwek kolusak, ak kowong’wok; ak kitutok eng’ emet ne iwendi iname kobunjin.

⁶⁴ Ak koiyestak Jehovah obe bororiosiek tugul, koboch tabanda age ne bo ng’ony agoi tabanda age; ak iot kanamonik eng’ oloto che bo ketik ak che bo koik, che mengen, inye, anan kwanisieguk.

⁶⁵ Amenyoru kamuung’et eng’ bororiosiechoto, menyoru ole imuung’e keldang’ung’: ago konin Jehovah eng’ oloto muguleldo ne rugrugeni, ak konyek che kortos, ak muguleldo ne ichuchui:

⁶⁶ amenai ole teptoi sobeng’ung’; ak iyweisiei kemoi ak bet, ak menae ole itei sobondang’ung’:

⁶⁷ Ilen karon, Kata kaigai nda ka koskoleny nguno! Ak ile koskoleny, Kata kaigai nda kaeech! Amu kaiyweisietab muguleldang’ung’ ne iyweisiei, ak amu tuguk che keerei konyeguk che tun igeere.

⁶⁸ Ak koweekyin Jehovah Misri kogeny eng’ melisiek, eng’ oret ne kiamwaun, ale, Ma igeere kogeny: ak oaldochige bunikwok eng’ oloto oegu otwogik che murenik ak che kobogorisiek, ago mabiitu chi ne alok.