MATAYO 26 - BUKUIT NE TILIL

Kochobei bik kobar Jesu

¹ Ak ye kingo kagoges Jesu ng’alechu tugul, kolenji alamalyennyi,

² Ongen ole ye ibata betusiek aeng’u koek paska, ak keng’wekta Weritab chi kigartat eng’ kimurtoiyot.

³ Kiiyumgei anyun tisiik che eechen, ak boisiekab bichoto, eng’ seremutab gotab tisiindet ne o, ne kiguure Kaiapa;

⁴ ak kitet ichek ng’alek kole si kobiit konam Jesu eng’ ng’alset, ak kobar inendet.

⁵ Ago kimwa kole, Ma eng’ betusiekab igorta, si mang’eet bolatet eng’ bik.

Kiili Jesu eng’ Betania

⁶ Ak ye kimi Jesu Betania, eng’ gotab Simon ne kiamei mogondosik,

⁷ konyonji inendet kobogoriot ne kitinyei chubait ne mi mwaita ne nyandut ne bichii mising’ alyennyi, ak korong’ji metitab Jesu, ye kita koamisiei.

⁸ Ago ye kingogeer alamalyet, konerekso kole, Bo nee kaseroni?

⁹ Amu kota kialdoe mwai tuguk che chang’, ak kigochi kibananok.

¹⁰ Ago ye kingonai Jesu, kolenji, Kalya si oiim kobogoriondoni? Amu kayaiywa boisiet ne mie.

¹¹ Amu otinye kotugul kibananok; ago mami ane kobotok kotugul.

¹² Amu ye rong’ji mwaita bortanyu, ko kachopcha tubet.

¹³ Amwawok, iman, ale, Ui tugul ole tun kiamdaate logoiywechu miach eng’ ng’ony komugul, kemwaei agine ne kagoyai kobogoriondonito koek ne kibwate inendet.

Chaamset ne kichaame Judas Jesu

¹⁴ Kiwa anyun age eng’ choto taman ak aeng’ ne keguure Judas Iskariot, ole mi tisiik che eechen,

¹⁵ ak kole, Ochame ogona nee, si ande inendet eunekwok? Ak kigamanji inendet fedaisiek sosom.

¹⁶ Ak koboch yoto kocheng’ boroindo ne ng’wektoe inendet.

Igorta ne bo let

¹⁷ Ak kibwanji alamalyet Jesu eng’ betutab tai ne bo betusiekab makatinik che ma kinde mermerek, ak kolenji, Imache kechobun ano ole iame paska?

¹⁸ Ak kile, Oba nganaset ole mi chi anum, ak olenji, Kale Konetindet, Kagorik sainnyu; ayaei paska eng’ gong’ung’ koboto alamalyennyu.

¹⁹ Ak kiyai alamalyet ko u ye king’at Jesu; ak kichob paska.

²⁰ Ak ye kingoek koskoleny kotebi eng’ amisiet koboto alamalyet taman ak aeng’;

²¹ ak ye kita koamisiei, kole, Amwawok, iman, ale, Ng’wektaa agenge eng’ okwek.

²² Ak kiarogenso mising’, ak kotoi komwachi inendet age tugul kolenji, Tos ane, Kiptaiyandani?

²³ Ak kiwol ak kole, Inendet ne kagiburburtoi tuwai eng’ tabet, noto ne ng’wektaa.

²⁴ Wendi Weritab chi, ko u ye kigisir agobo inendet: ago bwa chichoto ne king’wektoe Weritab chi! Kita mie eng’ chichoto nda kima kisich.

²⁵ Ak kiwol Judas, ne king’ektoi inendet, kole, Tos ane, Rabbi? Kolenji, Kaimwa.

²⁶ Ak ye kiamisiei, konam Jesu makatiat ak koberur, ak kobutul, ak kogochi alamalyet, kole, Onam, oam; ni ko bortanyu.

²⁷ Ak kinam kikombet, ak komwa kongoi, ak kogochi ichek, ak kolenji, Oee okwek tugul chuto;

²⁸ amu chuto korotikyuk che bo arorutiet, che kitumdoi agobo che chang’ che bo nyoetab kaat ne bo tengekwogik.

²⁹ Ago amwawok ale, koboch nguno ko ma aee che bo logoechu bo sabibuk, agoi betunoto ne aee che leelach kobotok eng’ bounatetab Baba.

Sib komwaei Jesu kole bagaktoi alamalyet inendet

³⁰ Ak ye kingo kagotien tiendo komanda koba tulwetab Emitik.

³¹ Yeityo komwachi Jesu ichek kolenji, Kinachok okwek tugul agobo ane kemouni: amu sirat kole, Tun abire mestowot, ak koyesta kechirek che bo akwet.

³² Ago ye tun king’eeta, andoenok awendi Galili.

³³ Ago kiwol Petero kolenji, Agot nginach tugul agobo inye, ko magoi kinacha ane.

³⁴ Kolenji Jesu, Amwaun iman, ale, kotom kote kipsoiywet kemouni, iesioa konyil somok.

³⁵ Kolenji Petero, Agot ngo nyolu ame koboten, ko maesioin. Kimwa ko u noto alamalyet tugul.

Jesu eng’ Getsemane

³⁶ Kinyo anyun Jesu koboto icheget ole kiguure Getsemane, ak kolenji alamalyennyi, Otebi eng’ yu, si ko ta awa yun asa.

³⁷ Ak kiimut Petero ak werik aeng’ che bo Sebedi, ak kotoi koarogen, ak konyigisit muguleldanyi mising’.

³⁸ Kimwachi ichek anyun, kolenji, Arogeni mising’ sobondanyu, agoi meet: otebe yu; ak oripse kobota.

³⁹ Ak kiwa tai kitigin, ak kobutyi ng’ony, ak kosa, kole, Ee Baba, ngomugaksei, kosiirtoena kikombani: ago, ma ko u ye amache ane, ago ko u ye imache inye.

⁴⁰ Ak kinyo ole mi alamalyet, ak konyor ichek koruitos, ak kolenji Petero, Nee, kaga momuchi oripse kobota agot sait agenge?

⁴¹ Oripse ak osae, si mochut yomset: chamei tamirmiriet iman, ago nyaluli borto.

⁴² Kiwa kogeny ne bo aeng’, ak kisa, kole, Ee Baba, ngo ma chamdaat kosiirtoena kikombani, ama aee, ingoyaak anyun mageng’ung’.

⁴³ Ak kinyo kogeny ak konyor ichek koruitos, amu ki nyigisen konyekwak.

⁴⁴ Ak kibagach ichek kogeny, kwo, ak kisa ne bo somok, komwa ng’alechugaita.

⁴⁵ Kinyonji anyun alamalyet, ak kolenji, Oruiye nguno, omuuny: ogeero, kait sait, ak kageng’wekyi Weritab chi eunekab kiptengeginik.

⁴⁶ Ong’eetye, kebe: ogeero, kagoit inendet ne ng’wektaa.

Kenamei Jesu

⁴⁷ Ak kingota kong’alali, ogeero, konyo Judas, age eng’ taman ak aeng’, koboto bik che chang’ che tinyei rotokab chok ak siarisiek, kobunu oldab tisiik che eechen ak boisiekab bichoto.

⁴⁸ Ak kiiborji ichek kaborunet, inendet ne king’wektoi Jesu, kole, Inendet ne ang’ututi ko inendet noto: onam.

⁴⁹ Ak kinyonji Jesu eng’ yoto, ak kole, Chamge, Rabbi; ak kong’utut inendet.

⁵⁰ Ak kilenji Jesu, Choruani, yai kit ne kenyonjini. Kibwa anyun bichoto ak koyogoito eunekwak konam Jesu.

⁵¹ Ak ogeero, kiiyogoito eunnyi age eng’ ichek che kimi koboto Jesu, ak kong’us rotwennyi bo chok, ak koeb otwogindetab tisiindet ne o, kong’eti itinnyi.

⁵² Kolenji Jesu anyun, Iweekyi rotweng’ung’ ole kami: amu begu eng’ rotokab chok tugul che namei rotokab chok.

⁵³ Anan ilen mamuchi asom Baba, ak koyokwa agot nguno malaikaisiek che siirei lugosiek taman ak aeng’?

⁵⁴ Isuldoitoi ano anyun sirutik, che len egu ko u nito matiny?

⁵⁵ Kilenji Jesu tuiyosiek eng’ sainato, Komong’u ko u ye osetyini rebindet, otinye rotokab chok ak siarisiek si onama? Kiatebye betusiek tugul eng’ hekalut anetisiei ak kima onama.

⁵⁶ Ago kabwa chu tugul, si kobiit kosulda sirutik che bo maotik. Kibagakta inendet anyun alamalyet tugul, ak komwei.

Kimiti Jesu taitab tisiindet ne o

⁵⁷ Ak icheget che kiga nam Jesu ko kiimut kwo gotab tisiindet ne o ne kiguure Kaiapa, ole kiga koyumjigei sirik ak boisiek.

⁵⁸ Ago kiisubot Petero inendet eng’ ye loo kot koit seremutab gotab tisiindet ne o, ak kiwa go, ak kiteb ng’ony koboto askarik, kole, si kogeer ole igesundogei.

⁵⁹ Ak kicheng’ tisiik che eechen ak kapkiruoget komugul baornatet ne bo lembech agobo Jesu, si kobiit kobar inendet;

⁶⁰ ak kimanyor, agot nganda kibwa baorinik che chang’ che bo lembech. Ago eng’ let kobwa aeng’u,

⁶¹ ak kole, Kimwa chichi kole, Amuchi ang’em hekalut, ak ateech eng’ betusiek somok.

⁶² Ak kitonon tisiindet ne o, ak kolenji, Mewolu kiy? Nee baornatani baorianjinin bichu?

⁶³ Ago kisis Jesu. Ak kilenji tisiindet ne o, Ayosieun eng’ Jehovah ne sobei, ale, mwawech ngo i Kristo, Weritab Jehovah.

⁶⁴ Kolenji Jesu, Kaimwa: ago amwawok ale, Koboch nguno kotun ogeere Weritab chi kotebyei eng’ eutab tai ne bo kamuktaet, ak konyonei eng’ baragutab bolik che bo kipsengwet.

⁶⁵ Kigerer anyun tisiindet ne o ngoroikyik, kole, Kagomwa ne ya: ta kemage nee baorinik alak? Ogeero, kaogas nguno mwaet ne ya:

⁶⁶ olen nee? Kowol kole, Nyoljin kome.

⁶⁷ Yeityo kosing’ilji togennyi ak koluch: ak korabach alak,

⁶⁸ kole, Ng’ang’wech, inye Kristo: iboruech ne kakwerin.

Tiiyet ne kiiyo Petero agobo Jesu

⁶⁹ Ak kitebyei Petero eng’ seremutab got: ak kiwa chepto ye mi inendet, ak kolenji, Koimi aginye koboto Jesu Galilindet.

⁷⁰ Ago kitiiyo eng’ taitab tugul, kole, Mangen noto imwae.

⁷¹ Ak kingo kagomanda kwo keter, kogeer chepto age inendet, ak kolenji ichek che kimi oloto, Kimi chichi agine koboto Jesu Nasaretindet.

⁷² Ak kitiiyo kogeny eng’ kayosiet kole, Mangen chichoto.

⁷³ Ak ne ma tia kobwa che kitonondos eng’ ye negit ak kolenji Petero, Iman, i bo bichoto: amu ng’andoin ng’aleguk.

⁷⁴ Kitoi anyun kochubis ak koyosio kole, Mangen chichoto. Ak ngunoto kote kipsoiywet.

⁷⁵ Ak kiibwat Petero ng’olyot ne kiga komwa Jesu, kole, Kotom kote kipsoiywet, iesioa konyil somok. Ak kimanda sang’, ak korir eng’ ng’wanindo.