MATAYO 23 - BUKUIT NE TILIL

Kogerei kong’ Jesu sirik ak Parisaik

¹ Kimwachi Jesu anyun tuiyosiek ak alamalyennyi,

² kolenji, Tebe sirik ak Parisaik ng’echeretab Musa:

³ noto anyun oyai ak orib tuguk alak tugul che ng’atok; ago amoyai ko u boisionikwak; amu mwaei ichek ama yaei.

⁴ Ee, ratei lautik che nyigisen ak ko bichien eng’ laiset, ak konde tigigoikab bik; ama istoi icheget eng’ mornet agenge.

⁵ Ago yaei boisionikwak tugul si kogeer bik: amu yaei kotebeesitu lolotinwekab sirutik; ak kobaroi tabanwekab ngoroikwak,

⁶ ak kochamei ole toogunot eng’ igorwek, ak ng’echerok che eechen eng’ sunagogisiek,

⁷ ak kagatosiek eng’ oldinwekab aldaisiet, ak koguure bik icheget, Rabbi.

⁸ Ago amongeguurenok Rabbi: amu agenge konetindeng’wong’, ak otupche okwek tugul.

⁹ Amoguure chi eng’ ng’ony, baba: amu agenge Kwandang’wong’, inendet ne mi kipsengwet.

¹⁰ Amocham keguurenok kandoik: amu agenge kandoindeng’wong’, Kristo noto.

¹¹ Ago inendet ne o eng’ kwenung’wong’ koegu kiboitiondeng’wong’.

¹² Ak age tugul ne ieetegei kiming’ini; ak age tugul ne iming’inigei kieeti.

¹³ Ago bwa okwek, sirik ak Parisaik, chombilik! Amu ogere bik bounatetab kipsengwet: amu moite okweget oloto, amochamjini che machei koit oloto, koba.

¹⁴ Bwa okwek, sirik ak Parisaik, chombilik! Amu oame gorikab mosogik, ak osae sautik che koen eng’ ng’alseng’wong’: noto anyun onyoru kiruoget ne siirtoot.

¹⁵ Bwa okwek, sirik ak Parisaik, chombilik! Amu omuuti nyanjet ak emet owale chito kobunjok; ak ye kagobunjok, oyai inendet koek lakwetab Gehenna konyil aeng’ kosiirok.

¹⁶ Bwa okwek, kandoik che o koriotin, che omwae ole, Age tugul ne iyosie hekalut, ko ma kiy; ago age tugul ne iyosie tahabu che bo hekalut, ko besenindet.

¹⁷ Okwek che o berber ak o koriotin: ngoro ne o, tahabu, anan hekalut ne kiitilili tahabu?

¹⁸ Ak, Age tugul ne iyosie kaptisisiet, ko ma kiy; ago age tugul ne iyosie kagochinet ne mi kaptisisiet, ko besinindet inendet.

¹⁹ Okwek kipkoratinik: ngoro ne o, kagochinet, anan kaptisisiet, ne itilili kagochinet?

²⁰ Noto anyun inendet ne iyosie kaptisisiet, koyosie kaptisisionoto, ak tuguk tugul che mitei yoto.

²¹ Ak inendet ne iyosie hekalut, koyosie oloto tilil, ak inendet ne menyei oloto.

²² Ak inendet ne iyosie kipsengwet, koyosie ng’echeretab Jehovah, ak inendet ne tebe ng’echeranato.

²³ Bwa okwek, sirik ak Parisaik, chombilik! Amu ogoitoi kebebertab taman ne bo heduosmon ak bisalik ak kamon, amoyae ng’alek che eechen che bo Ng’atutik, choto ko kiruoget, ak rirenetab ge, ak kayanet; ago kanyoljinok oyai chuto, amobagach chun alak.

²⁴ Ee, okwek kandoik che o koriotin, ogeneni tingwichet, ak olugui tambesiet.

²⁵ Bwa okwek, sirik ak Parisaik, chombilik! Amu otilili kikombet ak sanit barak, ago nyiitotin orit rebisiet ak keiyandit.

²⁶ Inye Parisaindet ne korat, itilil korok kikombet ak sanit orit, si kobiit kotililitu barak agichek.

²⁷ Bwa okwek, sirik ak Parisaik, chombilik! Amu o kerge ak kererisiek che kigesal koleelagitu, che kororon iman barak eng’ keeret, ago nyiitotin orit kowek che bo bik che kigobek, ak muruonindo tugul.

²⁸ O u noto ak okwek, otoogu ko u bikab imanda eng’ taitab bik, ago nyiitat oring’wong’ chombilisiet ak tengekto.

²⁹ Bwa okwek, sirik ak Parisaik, chombilik! Amu oteeche kererisiek che bo maotik, ak olelesanjini kererisiekab che bo imanda.

³⁰ Ak omwae ole, Nda kigimi eng’ betusiek che bo kwanisiekyok, ta kima keyamdoi ak icheget korotikab maotik.

³¹ Noto obaorianjinige ole, o werikab ichek che kibar maotik.

³² Onyiit anyun kerutiet ne bo kwanisiekwok.

³³ Okwek erenok, o lagokab erenok che ng’wonen, ochilildoi ano eng’ kiruogetab Gehenna!

³⁴ Noto anyun, ogeero, ayokwok maotik, ak bik che ng’omen, ak sirik: obare alak eng’ ichek ak ogartoti alak, ak obire kipcharitit alak eng’ ichek eng’ sunagogisiekwok, ak ousoti kong’eete nganaset age agoi nganaset age:

³⁵ si kobwanjok korotik tugul che bo imanda che kigetumda eng’ ng’ony, koboch korotikab Abil ne ki bo iman agoi korotikab Sakaria weritab Barakia, ne kiobar eng’ kwenutab hekalut ak kaptisisiet.

³⁶ Amwawok, iman, ale, Bwanjin ibini tuguchu tugul.

Korirjin Jesu Jerusalem agobo ng’emisiet ne nyonjin

³⁷ Ee Jerusalem, Jerusalem, ne barei maotik, ak kolage koik ichek che kigiyokyi! Kiamach konyil ata ayum lagoguk, agot ko u ye iyumi ngogiet arekyik eng’ kebebaikyik, ago ma ocham!

³⁸ Ogeero, kagebagakwok gong’wong’ koek kipkubere.

³⁹ Amu amwawok ale, Ma ogeera kogeny, agoi omwa ole, Iberurot inendet ne nyonei eng’ kainetab Kiptaiyat.