MATAYO 15 - BUKUIT NE TILIL

Kowoljin Jesu bik che kigengenie inendet agobo bitonwek che ma kirib

¹ Kibwanji anyun Jesu Parisaik ak sirik che kibunu Jerusalem, kolenji,

² Amu nee si kobistoe alamalyeng’ung’ bitonwekab boisiek? Amu amisiei kotom koun eunekwak.

³ Ak kiwolji kolenji, Amu nee si obistoe ak okwek ng’atutietab Jehovah amu bitonwekwok?

⁴ Amu king’at Jehovah kole, Teech kwandang’ung’ ak komet: ak, Inendet ne mwaei ne ya agobo kwandanyi anan kamet, komeei iman.

⁵ Ago omwae ole, Age tugul ne lenjin kwandanyi anan kamet, Kit age tugul ne kota nyolu atoretenen, ko koagochi Jehovah;

⁶ ko mateechei inendet kwanda ak kamet; kaowal anyun ng’olyotab Jehovah koek buch amu bitonwekwok.

⁷ Okwek chombilik! Kimaoten Isaia komie agobo okwek, kole,

⁸ Teecha bichu eng’ kutuswekwak: Ago looen mugulelwekwak eng’ ane.

⁹ Ago iloswa buch: Ng’atutikab bik konetisiosiek che inetisie.

¹⁰ Ak kiguur inendet tuiyet kobwa ole mi, ak kolenji, Ogas, ak oguiye:

¹¹ ma che bunei kutit che imuruoni chito; ago che mong’une kutit, choto che imuruoni chito.

¹² Kibwa anyun alamalyennyi kolenji, Ingen ile kaginach Parisaik, ye kangogas mwaoni?

¹³ Ago kiwol kole, Keswot age tugul ne kima kol Baba ne mi kipsengwet, kitutu.

¹⁴ Obagakte ichek: kandoik che koriotin. Ak ngondochi kipkoratiat kipkoratiat, kororokyin tuwai keringet.

¹⁵ Ak kiwolji Petero kolenji, Mwawech kalewenonoto.

¹⁶ Ak kile, Kaga agot kora kotom oguiye ak okwek?

¹⁷ Ma onai ole, kiy age tugul ne bunei kutit kowendi moet, komandoi sang’?

¹⁸ Ago tuguk che mong’une kutit kobunu muguleldo; choto che ing’waniti chito.

¹⁹ Amu mong’une muguleldo kabwatutik che yaach, rumisiosiek, ibetab ge, soksosiek, chorsosiek, baornatosiekab lembech, ng’alek che yaachen:

²⁰ chuto tuguk che ing’waniti chito: ago ngeamisie eunek che ma kiun ko maing’wanitu chi.

Kisoobi cheptab kabogoriot ne bo Kanan

²¹ Ak kiwa Jesu eng’ oloto, kwo komoswek che bo Turo ak Sidon.

²² Ak ogeero, kimong’ eng’ komoswechoto kobogoriot ne bo Kanan, korir, kole, Rirena, ee Kiptaiyandani, inye weritab Daudi; riachei oindet cheptanyu mising’.

²³ Ago kima kwolji ng’olyo. Ak kibwa alamalyennyi, ak kogaigai inendet, kolenji, On kwo: amu karirjinotech.

²⁴ Ago kiwol kole, Kima kiyokwa kobate anyonji kechirek che lusyotin che bo gotab Israel.

²⁵ Ago kinyo kogutung’ji inendet, kole, Kiptaiyandani, toretan.

²⁶ Ago kiwol kole, Ma mie kerebe lagok kimoikwak ak kewirji sesenik.

²⁷ Ago kile, Ee, Kiptaiyandani: agot sesenik koamei che ibutye mesetab bikab kobo.

²⁸ Kiwolji Jesu anyun kolenji, Chebiosoni, o kayaneng’ung’! Ingoyaak ko u noto imache. Ak kisob cheptanyi koboch sainato.

Kisoobi bik che chang’

²⁹ Ak kiwa Jesu eng’ oloto, agoi ole negite araraitab Galili; ak kitogosta tulwet, ak koteb ng’ony eng’ oloto.

³⁰ Ak kibwanji inendet tuiyosiek che eechen, komutu solomonik, ak che koriotin, che namotin kut, che bo mugungon; ak alak che chang’, ak konde ole bo kelyekyik; ak kiisob ichek:

³¹ kot kokwong’ tuiyet, ye kingogeer kong’alaldos che namotin kut, ko kagosopcho che bo mugungon, ak kobendoti solomonik, ak kogeertoi che koriotin: ak kiilos Kiptaiyatab Israel.

Kebaei bik elfusiek ang’wan

³² Ak kiguurjigei Jesu alamalyennyi, kolenji, Atinye rirenetab ge agobo tuiyet, amu kogetebi tugul betusiek somok ama tinye kiy ne amei: amamache agochi koba koamoti rubo, si matanuiso eng’ oret.

³³ Ak kilenji alamalyet inendet, Kinyorjini ano makatinik che te cho eng’ emoni surkwen, si kigochi kobiyong’so tuiyet ne te ni?

³⁴ Ak kilenji Jesu, Otinye makatinik ata? Ak kile, Tisab, ak njirenik che mengechen che ng’ering’.

³⁵ King’at anyun tuiyet kobuur;

³⁶ ak konam makatinichoto tisab ak njirenik; ak komwa kongoi ak kobutul, ak kogochi alamalyet, si kogochi alamalyet tuiyosiek.

³⁷ Ak kiam tugul, kobiyong’so: ak kiiyum katuganik, che yamei mesendoik tisab.

³⁸ Ak kiek murenik che kiam elfusiek ang’wan, ama kiit kobogorisiek ak lagok.

³⁹ Ak kiunda tuiyosiek koba, ak kilany moingetab beek, kwo tabanwek che bo Magadan.