MARIKO 9 - BUKUIT NE TILIL

¹ Ak kilenji ichek, Amwawok iman ale, Mi yu alak eng’ chu tonondos, che magoi chamjam meet, agoi kogeer bounatetab Jehovah konyonei eng’ kamuktaet.

Waletab ge ne bo Jesu

² Ak kingobata betusiek lo komut Jesu Petero, ak Jakobo, ak Johana, kotogosta tulwet ne koi koba uwak ichegei: ak kiwalak eng’ tainywa:

³ ak kilil bich ngoroikyik mising’, ko u teluchi; mami mwetindet ng’ony ne imuchi komwet koleelagitu ko u choto.

⁴ Ak kitook eng’ tainywa Elija ak Musa: ak king’alaljindos koboto Jesu.

⁵ Ak kiwol Petero kolenji Jesu Konetindoni, mie ketebi eng’ yu: mie keteech keriosiek somok; neng’ung’ age, ko bo Musa age, ko bo Elija age.

⁶ Amu kima kongen kit ne wolu; amu kiiyweis mising’.

⁷ Ak kinyo boldet kotuch ichek: ak kimong’ kutit eng’ boldet, kole, Ni ko Werinnyu, chamanennyu: ogas okwek inendet.

⁸ Ak kigusgong’ ngunoto kogeer komoswek tugul, ko mata kogeer chi, kobate Jesu inegei ak icheget.

⁹ Ak kingota kochorugei eng’ tulwet, koete ichek, kolenji, amat komwachi chi tuguk che kagogeer agoi kong’eet Weritab chi eng’ che kibek.

¹⁰ Ak kirib ng’olyondonoto koteebegei ichegei agobo kaguiyetab ng’eetyet.

¹¹ Ak kiteebe inendet kole, Mwaei sirik kole, kanyol konyo Elija korok.

¹² Ak kilenji ichek, Iman, nyonei Elija korok, ak koweech tuguk tugul ko u ye kinye: ak kiteptoi ano si kesir agobo Weritab chi kele nyalili eng’ tuguk che chang’ ak kiit koek buch?

¹³ Ago amwawok ale, kigonyo Elija, ak kiyachi agine kit age tugul ne kimachei ichek ko u ye kigisir agobo inendet.

Kisoobi werit ne tinyei tamirmiriet ne namat kut

¹⁴ Ak ye kigabwa ole mi alamalyet, kogeer tuiyet ne o ko kayiem ichek, ak sirik che kiteepse ichek.

¹⁵ Ak yeityo anyun, ye kingogeer tuiyet komugul inendet, kokwong’io mising’, ak koruai ole mi, kogat.

¹⁶ Ak kiteebe ichek kole, Oteebege nee ak icheget?

¹⁷ Kowolji chito age eng’ tuiyet, kolenji, Konetindoni, kaamutun werinnyu, ne tinyei tamirmiriet ne namat kut;

¹⁸ ak oldo tugul ole namjin eng’ kimnatet, kowirjinoti ng’ony: ak kotabugoni, ak konyeei kelek, ak kochuchui: ak kaamwachi alamalyeng’ung’ koon komanda; ago ma imuch.

¹⁹ Ak kiwolji anyun ichek kolenji, Ee, ibinda ne matinyei kayanet, atebye kobotok kot kotianit? Amuitoiywok kot kotianit? Omutwa inendet.

²⁰ Ak kiimutyi ichek inendet Jesu: ak ye kingogeer inendet, kobirabirto ngunoto tamirmiriet mising’; ak kobutyi ng’ony, komelmelgei ak kotabugan.

²¹ Ak kiteebe kwandanyi, kolenji, Kinamei koboch au kiito? Ak kile, Koboch ko lakwa.

²² Ak kigowirji konyil che chang’ ma ak ole mi beek, komachei kobar inendet: ak ngimuchi iyai kiy age tugul, irirenech ge, ak itoretech.

²³ Ak kilenji Jesu, Ngimuchi! Imugaksei tuguk tugul eng’ inendet ne iyani.

²⁴ Yeityo anyun kowaach kwandab lakwanato, ak kole, Ayani; toreta eng’ bistoennyu.

²⁵ Ak kingogeer Jesu tuiyet koruou tugul, koger kong’ tamirmiriet ne muruon, kolenji, Inye, tamirmiriet ne namat kut ak ko i ming’at, kang’atin ale, mong’u eng’ inendet, ak amatata ichut inendet kogeny.

²⁶ Ak kingo kagowaach ak kobirto inendet mising’, komanda: ak koigei lakwet ne kagome; kot komwa che chang’ kole, Kagome.

²⁷ Ago kinam Jesu eut, ak kong’eet; kotonon anyun.

²⁸ Ak ye kingo kakwo go, koteebe alamalyennyi inendet komi ichegei, kole, Amu nee si ma kimuch achek keon?

²⁹ Ak kilenji ichek, Maimuchi komanda ne u ni eng’ kiy tugul, kobate saet.

Sib kemwaei ne bo aeng’ meetab Jesu

³⁰ Kiba anyun eng’ oloto, ak kobun kwenutab Galili; ak kima mach konai chi age tugul.

³¹ Amu kiineti alamalyennyi kolenjin, kindoi Weritab chi eunekab bik, ak kobar inendet; ak ye kagebar, kong’eet kogeny, ko kagobata betusiek somogu.

³² Ago kima nai ichek ng’olyondonoto, ak kiiywei koteebe inendet.

Kanetisiet agobo kaming’inetab ge

³³ Ak kibwa Kapernaum: ak ye kimi go koteebe ichek kole, Ka nee ng’alek che komwaonu eng’ oret?

³⁴ Ago kisisyo: amu kitiitos ichegei eng’ ichegei eng’ oret kolen ng’o ne o.

³⁵ Kiteb ng’ony anyun, ak koguur choto taman ak aeng’; ak kolenji, Ngo machei chi koek ne bo tai, koegu ne bo let eng’ tugul, ak koek otwogindetab tugul.

³⁶ Ak kinam lakwet ne ming’in ak konde kwenunywa: ak koganab eng’ eunekyik, ak kolenji,

³⁷ Age tugul ne taachei age eng’ lagochu mengech eng’ kainennyu, ko kataacha: ak age tugul ne taacha, ko mataacha ane, ago inendet ne kiiyokwa.

Agobo muitaet

³⁸ Kilenji Johana inendet, Konetindoni, kogigeer chi koonei oik eng’ kaineng’ung’: ak kogiete, amu koma kosubwech.

³⁹ Ago kile Jesu, Amoete: amu mami chi ne yaei boisiet ne bo kimnatet eng’ kainennyu, ak komuch kochepchebit komwaitaena yaitio.

⁴⁰ Amu inendet ne magirindoech ko nenyo.

⁴¹ Amu age tugul ne inagok beekab kikombet oee, amu o bo Kristo, amwawok iman, ale, mabetyin melektanyi.

Mamie kinach bik alk

⁴² Ak age tugul ne inachi age eng’ chu mengech che iyana, ko kaigai eng’ inendet kirooch kaatinnyi koitab bai ne o, ak kewirji nyanjet.

⁴³ Ak ngonachin eung’ung’, itil: kaigai eng’ inye imong’ji sobondo i bo mugung’, kosiir itinye eunek aeng’ ak iwe Gehenna, mat ne ma misoksei.

⁴⁴ Ole mabegu kutikwak, ama misoksei mat.

⁴⁵ Ak ngonachin keldang’ung’, itil: kaigai eng’ inye imong’ji sobondo i bo kelok, kosiir kewirjin Gehenna i bo kelyek aeng’.

⁴⁶ Ole mabegu kutikwak, ama misoksei mat.

⁴⁷ Ak ngonachin kondang’ung’, ibalu: kaigai eng’ inye iit bounatetab Jehovah i bo kong’ak, kosiir kewirjin Gehenna itinye konyek aeng’;

⁴⁸ ole mabegu kutikwak, ama misoksei mat.

⁴⁹ Amu kindoi chi age tugul munyuk eng’ mat.

⁵⁰ Miachen munyuk: ago ngo bet anyinyindab munyuk, ko ta ondoi nee si kochom? Ingotebe munyuk mugulelwekwok, ak otebi eng’ kalyet okwege eng’ okwege.