MARIKO 7 - BUKUIT NE TILIL

Kowoljin Jesu bik che kigengenie inendet agobo bitonwek che ma kirib

¹ Kiiyumjigei inendet Parisaik, ak alak eng’ sirik, che kiga bun Jerusalem,

² ak kiga keer alak eng’ alamalyennyi koamei makatinik eng’ eunek che muruonen, noto ko, eunek che ma kiun.

³ Amu ngot ko maiun eunekwak komie Parisaik, ak Yahudik tugul, ko maamisiei, kosubi biteetab boisiek:

⁴ ak ye bunu oldab aldaisiet, ko ngot ko maiungei, ko maamisiei: ak mitei bitonwek alak che chang’, che kitaach si korib komie, ko u kaunetab kikombok, ak terenik, ak tuguk che bo sugunwet.

⁵ Ak kiteebe inendet Parisaik ak sirik kole, Lyon si mabendoti alamalyeng’ung’ kosubi biteetab boisiek, ago amisie eunek ko muruonen?

⁶ Kimwachi ichek kolenji, Kisib komwa Isaia iman agobo okwek chombilik, ko u ye sirat, kole, Teecha bichu eng’ kutuswekwak, Ago looen mugulelwekwak eng’ ane.

⁷ Ago iloswa buch. Ng’atutikab bik konetisiosiek che inetisie.

⁸ Obagaktoi ng’atutietab Jehovah, ak onam mising’ biteetab bik.

⁹ Ak kilenji ichek, Oesioi iman ng’atutietab Jehovah, si kobiit orib biteeng’wong’.

¹⁰ Amu kile Musa, Teech kwandang’ung’ ak komet; ak, Inendet ne mwaei yaitiet agobo kwandanyi anan kamet, komeei iman:

¹¹ ago omwae okwek ole, Ngolenji chi kwandanyi anan kamet, Kit ne kata atoretenen ko Korban, ye kiweech ko, Kagochinet,

¹² amata ochamji anyun inendet kotoret kwandanyi anan kamet;

¹³ oyae ng’olyotab Jehovah koek buch eng’ biteeng’wong’, ne kiong’at: ak oyae tuguk alak che chang’ che u choto.

¹⁴ Ak kiguur tuiyet kogeny kobwa ye mi inendet, ak kolenji, Ogasa okwek tugul si oguiye:

¹⁵ Mami kiy ne mi chi sang’, ne ngwo orinnyi komuchi kong’wanit inendet: ago tuguk che mong’une chi ko choto che ing’waniti chi.

¹⁶ Ngo tinyei chi itik che kastoe, kogas.

¹⁷ Ak ye kingobagakta tuiyet kwo go, koteebe alamalyennyi agobo kalewenonoto.

¹⁸ Ak kilenji ichek, Tos motinye kaguiyet, ak okwek? Mogeere ole, kiy tugul ne mi chi sang’ ak kwo orit, ko magoi imuch kong’wanit chi;

¹⁹ amu ma chut muguleldanyi, ago chutei moet, si komanda koba timin? U noto, kiitilil amitwogik tugul.

²⁰ Ak kile, Kit ne mong’une chi, ko noto ne ing’waniti chi.

²¹ Amu mong’une orit, eng’ muguleldab chi, kabwatutik che yaach, sokset, chorsosiek, rumisiosiek, ibetab ge,

²² kasetab miat, yaitiet, ng’alset, maget ne ya, kong’ ne ya, ng’alek che yaach, menotet, ak berberindo:

²³ mong’une orit tuguchuto tugul yaachen ak kong’wanit chito.

Kisoobi cheptab chebyunanindet

²⁴ Ak king’eet eng’ oloto, kwo tabanwekab Turo ak Sidon. Kiwa got age, ak kima mach konai chi: ak kima imuch koung’ak.

²⁵ Ak ngunoto konyo kobogoriot age, ne kitinyei chepto ne ming’in ne kiga nam tamirmiriet ne muruon, kingogas agobo inendet, konyo kobutyi kelyekyik.

²⁶ Ki bo Yunanik kobogoriondonoto, ne kisalu bororietab Suropoinike. Ak kisom inendet kole, koon oindet eng’ cheptanyi.

²⁷ Ak kilenji inendet, Ingobiyong’so lagok korok: amu ma nyolu kenam amditab lagok ak kewirji sesenik.

²⁸ Ago kiwolji inendet kolenji, Wei, Kiptaiyandani: agot sesenik koamei eng’ kureretab meset, amitwogik che iroroi che bo lagok.

²⁹ Ak kilenji kobogoriondonoto, Ui anyun amu mwaoni; kagomong’une oindet cheptang’ung’.

³⁰ Ak kiwa agoi gonnyi, konyor lakwet koruei eng’ itok, ko kagomong’une oindet.

Kisoobi chi ne ming’at, ak ko uui kut

³¹ Ak kimanda kogeny eng’ tabanwekab Turo, ak kiiwerta agoi Sidon kot koit araraita ne bo Galili, ak kibun kwenutab tabanwekab Dekapoli.

³² Ak kigimutyi inendet chi ne ming’at, ak ko uui kut; ak kosom si kobiit kogonoor inendet eunnyi.

³³ Ak kiimut chichoto kwo taban eng’ tuiyet, ak kiirooch morikyik itikab chichoto, ak kong’utyi, ak kotwa ng’elyeptanyi;

³⁴ ak konyal kipsengwet, kobus, ak kolenji, Epata, noto ko, Yatage.

³⁵ Ak kiyatogis anyun itikyik, ak kotiagak kit ne kirati ng’elyeptanyi, ak kong’alal komie.

³⁶ Ak king’at ichek kole, amat omwachi chi: ago ye kites kong’at ichek, kotes anyun bichoto komwaitaat.

³⁷ Ak kikwong’io mising’ ne siirei, kolen, Kagoyai tuguk tugul komie: igochin kogasta agot che ming’otin, ak kong’alal che namotin kut.