MARIKO 6 - BUKUIT NE TILIL

Keesioi Jesu eng’ Nasaret

¹ Ak kimong’ eng’ oloto; ak konyo agoi emennyi; ak kiisub inendet alamalyennyi.

² Ak kingoit sabato, kotoi konetis eng’ sunagogit: ak kingogas che chang’ kokwong’io, kolen, Nyorune ano chichi tuguchu? Ak, Nee ng’omnatoni kigigochi chichi, ak, Nee boisionichu kimen yaoksei eng’ eunekyik?

³ Tos ma musogindet nito, weritab Maria, ne tupcho ak Jakobo, Joses, Juda, ak Simon? Ak tos mami kobotech eng’ olinyo chepkametisiekyik? Ak kinyor kanagutiet eng’ inendet.

⁴ Ak kilenji Jesu ichek, Mabetyin maotio teegisto, kobate eng’ emennyi, ak eng’ che bo orennyi, ak eng’ gonnyi.

⁵ Ak kimata komuch koyai boisiet age tugul ne kimi eng’ oloto, kobate bik che ng’ering’ che kimiandos che kigonoor eunekyik, ak kiisoob ichek.

⁶ Ak kikwong’ inendet amu bistoenywa. Ak kiwendote nganasok konetisioti.

Boisiet ne kigiyoktae alamlyet taman ak aeng’

⁷ Ak kiguurjigei anyun taman ak aeng’, ak kotoi koyokto kobee aeng’ aeng’; ak kiigochi kimnatet koterter tamirmirik che muruonen;

⁸ ak king’at ichek kole, amat koib kiy ne bo bandanywa, agot makatiat, anan suberet, anan senteisiek eng’ lolet; kobate kirokto kityo;

⁹ ago oba olaachi kweonik; ak amat olaach sumotik aeng’.

¹⁰ Ak kilenji ichek, Got age tugul ne obendi, otebi eng’ yoto agoi obe eng’ oloto.

¹¹ Ak oldo age tugul ne mataachak, ama cham kogasak, ye omande eng’ oloto, olelekte temburiek che mi kelyekwok si kobiit koek baornatet eng’ ichek.

¹² Kimanda anyun, koba koamdaat kole kanyol kosik bik.

¹³ Ak kion oik che chang’, ak koile mwaita che chang’ che kimiandos, ak kosoob ichek.

Meetab Johana Kabatisanindet

¹⁴ Ak kigas laitoriat Herod agobo noto; amu kiga konaak kainennyi; ak kole, Kagong’eet Johana Kabatisanindet eng’ che kibek, noto anyun boisiei kimnatosiechu eng’ orinnyi.

¹⁵ Ago kimwaei alak kole, Elija inendet. Ak kile alak, Maotio inendet, anan u age eng’ maotik.

¹⁶ Ago ye kingogas Herod, kole, Johana nito, ne kiatile metit; kagong’eet.

¹⁷ Amu kiga koyokto Herod inendet bik, koba konam Johana, ak korat eng’ korgoret, amu Herodia osotiotab Pilipu ng’etab kamet: amu kiga kobaigei inendet ak kwonyoto.

¹⁸ Amu kimwachi Johana Herod, kolenji, Etei ng’atutik otebi ak osotiotab ng’etab komet.

¹⁹ Ak kiwech Herodia inendet, ak kimach kobar; ago ma imuch;

²⁰ amu kiiywei Herod Johana, amu kiingen kole, inendet ko chi ne bo imanda, ak ko tilil, ak kirib. Ak ye kingogas Herod ng’alekyik, koiimgei mising’: ago kigasyi inendet eng’ boiboiyet.

²¹ Ak ye kingoit betut ne nyolu, koyai Herod igorta ne bo betutab sigennyi, koyachi bikyik che eechen, kiptainik, ak che toogunotin che bo Galili.

²² Ak kingonyo go cheptab Herodia ak koureren, kobaibai Herod ak ichek che kitebyei eng’ amisiet koboto inendet; kolenji anyun laitoriat cheboto, Soma kiy age tugul ne imache si agonin.

²³ Ak kiiyosiechi kole, Kiy age tugul ne isoma agonin, agot kebebertab bounatennyu.

²⁴ Ak kimanda, ak kolenji kamet, Asom nee? Ak kilenji, Metit ne bo Johana Kabatisanindet.

²⁵ Ak yeityo konyo kochok agoi ole mi laitoriat, ak kosom kole, Amache ale igona nguno metit ne bo Johana Kabatisanindet eng’ tageito.

²⁶ Kiarogen anyun mising’ laitoriat; ago amu kayosiautikyik, ak amu icheget che kitebyei eng’ amisiet, ko mata koete inendet.

²⁷ Ak ngunoto koyokto laitoriat askarindet age eng’ che kiripsei, ak kong’at keib konyo metitab Johana: kiwa anyun kotil metit eng’ korgoret,

²⁸ ak kiib metoto bo Johana eng’ tageito, ak kogochi cheboto; ak kogochi cheboto kamet.

²⁹ Ak ye kingogas alamalyennyi agobo ng’olyondonoto, kobwa kosut mustanyi, ak konde kererit.

Koweeksei alamalyet

³⁰ Ak kiiyumjigei Jesu che kiyoktoi; ak komwachi inendet tuguk tugul, kit age tugul ne kiga koyai, ak kit age tugul ne kiga konet.

³¹ Ak kimwachi ichek kolenji, Obwa okwege taban ole surkwen, si omuuny kitigin. Amu ki chang’ che kibwanei ak kobendi, ak kima kotinyei agot boroindo ne amisie.

³² Ak kiba ichegei eng’ moingetab beek kolang’ji surkwen.

³³ Ak kigeeroti bik kobendi, ak kinai che chang’, ak kiruai koba oloto kibagenge kobunu nganasok tugul, ak kondoe icheget.

³⁴ Ak kingolang’ Jesu kogeer tuiyet ne o, ak koriregei ichek, amu ki u kechirek che matinyei mestowo: ak kitoi konet ichek tuguk che chang’.

Kobaei Jesu bik elfusiek mut

³⁵ Ak ye kimachei koimen, kobwanji inendet alamalyennyi, ak kole, Surkwen oli, ak machei koimen nguno:

³⁶ unde bik koba emet ak nganasok che mi komoswek ole negit, si koaljigei tuguk che amei.

³⁷ Ago kiwolji kolenji, Ogochi okwek amitwogik. Ak kilenji, Kibe keal makatinik che bo denarisiek bogol aeng’, si kigochi koam?

³⁸ Ak kilenji ichek, Otinye makatinik ata? Oba ogeer. Ak kingo kagonai, kole, Mut, ak njirenik aeng’.

³⁹ Ak king’at kole kobuur bik eng’ suswek che nyalilen, korurugotgei.

⁴⁰ Ak kiteb ng’ony kotetatgei, kobee bogol ak kobee konom.

⁴¹ Ak kinam makatinichoto mut ak njirenik aeng’, ak konyal kipsengwet, koberur, ak kotonaton makatinik; ak kiigochi alamalyennyi si konde tainywa; ak kipchechi icheget tugul njirenichoto aeng’.

⁴² Ak kiamis tugul, kobiyong’so.

⁴³ Ak koyum katuganik, konyi kerebonik taman ak aeng’, ak che bo njirenik agichek.

⁴⁴ Ak icheget che kiam makatinichoto ko ki murenik elfusiek mut.

Kowendote Jesu araraita barak

⁴⁵ Yeityo kochiich alamalyennyi kolany moingetab beek, kondoe inendet koba bitonin agoi Betsaida, ak kiigochi inendet tuiyet koba.

⁴⁶ Ak ye kingo kagobagakta ichek, kwo tulwet kosa.

⁴⁷ Kimi moinget kwenutab araraita koskoleny, ak kimi inegei emet ne yaamat.

⁴⁸ Ak kingogeer icheget konyalildos eng’ boisietab mugangok che kikwerie moinget, amu kigirindoi usonet icheget, konyo ole mi icheget eng’ ripset ne bo ang’wan ne bo kemoi, kowendote araraita barak: ak kimachei kosiirtoe icheget:

⁴⁹ ago kingogeer ichek inendet kowendoti eng’ araraita barak, kolen icheget abere tamirmiriet, ak kiwaach:

⁵⁰ amu kigeer ichek tugul inendet, ak kiiyweis. Ak ngunoto anyun kotwekyi ichek, kolenji, Onyiganitu: a inendet; amoiyweisie.

⁵¹ Ak kilany moinget kwo ole mi ichek; ak kisis usonet: ak kikwong’io mising’ bichoto;

⁵² amu kima nai ichek agobo makatinik, amu ki uuen mugulelwekwak.

Kisoobi bik eng’ Genesaret

⁵³ Ak ye kingo kagolanda, koit emetab Genesaret, korat moinget eng’ ngegut.

⁵⁴ Ak ye kingomong’ eng’ moinget, konai bik inendet eng’ sainato,

⁵⁵ ak koruaat eng’ koronoto komugul, ak kotoi komut che miandos eng’ itogusiekwak, koba ole kiga kasyi inendet.

⁵⁶ Ak oldo tugul ole kimong’ji nganasok che mengechen, anan che eechen, anan emet, kiinde che miandos oldab sirosiek, ak kisaisai inendet kole tamangab kocham kotwa agot tabandab ngoriennyi: ak kisopcho tugul che kitwa inendet.