MARIKO 14 - BUKUIT NE TILIL

Koncheng’ei bik ole bartoi Jesu

¹ Ak kingobata betusiek aeng’u kobiit igortab paska ak makatinik che ma kinde mermerek: ak kicheng’ tisiik che eechen ak sirik ole imuktoi konam eng’ ng’alset, si kobiit kobar inendet:

² amu kile icheget, Amat ongenam eng’ igorta, si mabolyo bik.

Kerong’jin mwaita Jesu eng’ Betania

³ Ak ye kimi inendet Betania eng’ gotab Simon ne kiamei mogondosik, kota kotebyei eng’ amisiet, konyo kobogoriot ne tinyei chubait ne mi mwaita ne nyamdut ne bo kamanutiet ne o; ak kotui chubainato, ak korong’ji metinnyi.

⁴ Ak kimi alage che kinerektos eng’ orit kolen, Amu nee si kibeet buch mwai?

⁵ Amu kata yamei kealdae mwai che siirei denarisiek bogol somok, ak kigochi kibananok. Ak kiing’unyng’ung’ji inendet.

⁶ Ago kile Jesu, Obagakte; kalya si oiim inendet? Kayaiywa boisiet ne mie.

⁷ Amu otinye kotugul kibananok, ak eng’ ui tugul ye omache, omuchi oyachi ne mie: ago mami ane kotugul kobotok.

⁸ Kagoyai ne imuchi: kasib koiil bortanyu agobo tubet.

⁹ Ak amwawok iman ale, Ui tugul ole kiamjin logoiywek che miach eng’ ng’ony komugul, kemwaitoi agine ne kayai kobogoriondoni si kobiit koek kabwatet agobo inendet.

Chaamset ne kichaame Judas Jesu

¹⁰ Ak kiwa Judas Iskariot, ne ki age eng’ taman ak aeng’, ole mi tisiik che eechen, si kobiit kong’wekyi icheget.

¹¹ Ak kingab kagas ichek, koboiboitu, ak koarorji kole, kogochi fedaisiek. Ak kicheng’ sait ne yamei si kong’wekta inendet.

Igorta ne bo let

¹² Ak eng’ betut ne bo tai ne bo makatinik che ma kinde mermerek, ye kienyei aruetab paska, kolenji alamalyennyi, Imache kebe ano si kechobun ole iame paska?

¹³ Ak kiiyokto aeng’ che bo alamalyennyi, kolenji, Oba nganaset, ak otuiye chito ne ibu teretab beek: osub inendet;

¹⁴ ak oldo tugul ole mong’jin inendet, olenji chitab kobo got, Kale Konetindet, Mi ano gonnyu ne bo toek, ole anyone aame igortab paska koboto alamalyennyu?

¹⁵ Ak koboruok inendet got ne o ne bo barak ne tetat tuguk, ak ko chobot: ak ochobwech oloto.

¹⁶ Kiba anyun alamalyet, kot koit nganaset, konyor ko u ye kaga kemwachi: ak kichob anyun paska.

¹⁷ Ak kingoek koskoleny konyo koboto taman ak aeng’.

¹⁸ Ak ye kitebyei eng’ amisiet, kole Jesu, Amwawok iman, ale, Ng’wektoa age eng’ okwek, inendet ne kiamisiei tuwai.

¹⁹ Kotoi anyun koarogenso, ak kolenji inendet agenge agenge, Tos ane?

²⁰ Ak kilenji ichek, Noto ko agenge eng’ taman ak aeng’, ne kiburburtoi tuwai eng’ tabet.

²¹ Amu wendi Weritab chi, ko u ye sirat agobo inendet: ago bwa eng’ chichoto king’wektae Weritab chi! Kita mie eng’ chichoto ko ma kisich.

²² Ak ye kiamisiei icheget, konam makatiat, ak kingo kagoberur, kobutul, ak kogochi, ak kole, Onam: ni ko bortanyu.

²³ Ak kinam kikombet, ak kingo kagomwa kongoi, kogochi ichek: ak koee tugul.

²⁴ Ak kilenji, Chu korotikyuk che bo arorutiet, che tumdogei agobo che chang’.

²⁵ Amwawok iman ale, Ma aee kogeny che bo logoekab sabibuk, agoi betunoto ne aee che leelach eng’ bounatetab Jehovah.

²⁶ Ak kingo kagotien tiendo, komanda koba tulwet ne bo Emitik.

Sib komwaei Jesu kole bagaktoi alamalyet inendet

²⁷ Kolenji Jesu ichek, Kinachok okwek tugul: amu kigisir kele, Abire mestowot, ak koiyesta kechirek.

²⁸ Ago, ye kaging’eeta, andoenak awe Galili.

²⁹ Ago kilenji Petero, Agot nginach tugul agobo inye, ko maginacha.

³⁰ Ak kilenji Jesu inendet, Amwaun iman ale, rani, kemouni, kotom kote kipsoiywet konyil aeng’, iesioa konyil somok.

³¹ Ak kimwa eng’ kimnatet ne o kole, Ngo nyolu kebegu tuwai, ko magoi aesien. Ak kimwa agichek tugul ko u noto.

Jesu eng’ Getsemane

³² Ak kiit koret ne kiguure Getsemane, ak kilenji alamalyennyi, Otebe yu, ye asae.

³³ Ak kiimut Petero ak Jakobo ak Johana, ak kotoi kokwong’io mising’ ak koarogenso.

³⁴ Ak kilenji ichek, Kaarogen sobondanyu mising’ agoi meet: otebe yu ak oripse.

³⁵ Ak kiwa tai kitigin, ak kobutyi ng’ony, ak kosa kole, ngomugaksei, ko mie kosiirtoena sainito.

³⁶ Ak kimwa kole, Aba, Baba, imugaksei tuguk tugul eng’ inye; istaena kikombani: ago, ma ko u ye amache, ago ko u ye imache.

³⁷ Ak kinyo ak konyor ichek koruitos, ak kolenji Petero, Simon, irue? Ma imuch iripse agot sait agenge?

³⁸ Oripse ak osae, si mochut yomset: chamei tamirmiriet iman, ago nyaluli borto.

³⁹ Ak kiwa kogeny, ak kosa komwa ng’alechugaita.

⁴⁰ Ak kinyo kogeny, ak konyor koruitos, amu kiga nyigisitu mising’ konyekwak; ak kima kongen kit ne woljin inendet.

⁴¹ Ak kinyo ne bo somok, ak kolenji ichek, Oruiye anyun nguno, omuuny: kagoyam; kagoit sait; ogeero, kageng’wekyi Weritab chi eunekab kiptengeginik.

⁴² Ong’eetye, kebe: ogeero, kagorik inendet ne ng’wektaa.

Kenamei Jesu

⁴³ Ak ngunoto, kota kong’alali, konyo Judas, age eng’ taman ak aeng’, koboto tuiyet che tinyei rotokab chok ak siarisiek, kobunu ole mi tisiik che eechen ak sirik ak boisiek.

⁴⁴ Ak kiga koarorji ng’wektaindet ichek, kolenji, Inendet ne ang’ututi ko inendet noto; onam, ak omut ak oribote.

⁴⁵ Ak kingoit, kwo eng’ sainato ole mi inendet, ak kole, Rabbi; ak kong’utut.

⁴⁶ Ak kiiyogoito bichoto eunekwak ak konam inendet.

⁴⁷ Ago king’us rotwennyi bo chok age eng’ che kitonondos eng’ ye negit, ak koeb ititab otwogindetab tisiindet ne o.

⁴⁸ Ak kiwolji Jesu kolenji, Komong’u ak rotokab chok ak siarisiek, ko u ye osetyini rebindet, si onama?

⁴⁹ Kiami kobotok betusiek tugul eng’ hekalut anetisiei, ak kima onama: ago kayaak ni si kobiit kosulda sirutik.

⁵⁰ Ak kibagakta ichek tugul inendet, ak komwei.

⁵¹ Ak kiisub inendet mureno age, ne kiilaachi anget inegei ne bo katanit, ak konam bichoto inendet;

⁵² ak kometo ngorionoto bo katanit, komwei ach ngor.

Kimuti Jesu taitab tisiindet ne o

⁵³ Kiimut Jesu anyun kwo ole mi tisiindet ne o: ak koyumjigei inendet tisiik tugul che eechen ak boisiek ak sirik.

⁵⁴ Ak kiisub Petero inendet eng’ ye loo, agoi koit seremutab gotab tisiindet ne o; ak kitebyei koboto ng’atik, koyue mat.

⁵⁵ Kicheng’ anyun tisiik che eechen ak kapkiruoget komugul baornatet eng’ Jesu si kobiit kobar; ago kimanyor.

⁵⁶ Amu kibaorianji che chang’ lembech agobo inendet, ak ma namgei baornatenywa.

⁵⁷ Ak kitononso alak, kobaorian lembech agobo inendet, kole,

⁵⁸ Kigegas komwaei inendet kolen, Ang’eme hekaluni kigiyae eunek, ak ateech age eng’ betusiek somok ne magiyae eunek.

⁵⁹ Agot eng’ noto ko ma namgei baornatenywa.

⁶⁰ Kitonon anyun tisiindet ne o eng’ kwenunywa, koteebe Jesu, kole, Mewolu kiy? Nee ni baorianjinin bichu?

⁶¹ Ago kisis, ama wol kiy. Kiteebe kogeny tisiindet ne o, kole, I Kristo inye, Weritab Ne Iberurot?

⁶² Ak kile Jesu, A inendet: ak tun ogeere Weritab chi kotebyei eng’ eutab tai ne bo kamuktaet, konyonei eng’ bolik che bo kipsengwet.

⁶³ Ak kigerer ngoroikyik tisiindet ne o, kolen, Ta kemage nee baorinik alak?

⁶⁴ Kaogas ng’alek che yaach che mwaei: obwati nee? Ak kiiruokyi tugul kole nyoljin meet.

⁶⁵ Ak kitoi alak kosing’ilji inendet, ak kotuch togennyi, ak koluch, ak kolenji, Ng’orse: ak kinam ng’atik inendet ak korabach.

Kotiitos Petero Jesu

⁶⁶ Ak kingota komi Petero seremut ole bo ng’ony, konyo age eng’ tibik che otwogikab tisiindet ne o;

⁶⁷ ak kingogeer Petero koyue mat, kochiilji kong’ inendet, ak kolenji, Kiimi aginye koboto Nasaretindonoto, Jesu.

⁶⁸ Ago kitiiyo kole, Mangen, amaguitosi choto imwae: ak komanda kwo keter; ak kiito anyun kipsoiywet.

⁶⁹ Ak kigeer cheboto inendet, ak kotoi kogeny komwachi che tonondos eng’ ye negit, kolenji, Ni ko agenge eng’ icheget.

⁷⁰ Ak kitiiyo kogeny. Ak ne matia kolenji ichek kogeny che kitonondos eng’ ye negit Petero, Iman i agenge eng’ ichek amu i Galilindet.

⁷¹ Ak kitoi kochubis, ak koyosio, kole, Mangen chichi omwae.

⁷² Ak ngunoto kote kipsoiywet ne bo aeng’. Ak kiibwat anyun Petero ng’olyondonoto, ko u ye kiga komwachi Jesu inendet kole, Kotom kote kipsoiywet konyil aeng’, iesioa konyil somok. Ak kingobwat ng’olyondonoto, korir.