MARIKO 13 - BUKUIT NE TILIL

Sib komwaei Jesu agobo ng’emisietab hekalut, ak agobo kagesunetab kenyisiek

¹ Ak ye kimandoi eng’ hekalut, kolenji age eng’ alamalyennyi, Konetindoni, keero, kie u koichu ak kie u teeksoni!

² Ak kilenji Jesu, Tos igeere teeksosiechu eechen? Matun ng’etu koita agenge eng’ baragutab age, ne magiwirjin ng’ony.

³ Ak kingotebyei ng’ony eng’ tulwetab Emitik ye tokyindos ak hekalut, koteebe inendet Petero ak Jakobo ak Johana ak Andrea komi ichegei, kole,

⁴ Mwawech, yaoksei tuguchuto auiyo? Ak nee kaborunet ne tun iboru kole karik kosulda tuguchuto tugul?

⁵ Ak kitoi Jesu kolenji, Oripge si maibeetok chi.

⁶ Bwanei tun che chang’ eng’ kainennyu, kolen, A inendet; ak kobeet che chang’.

⁷ Ak ye tun ogas agobo lugosiek ak ng’alek agobo baretab ge, ko moarogense: kanyol koek ko u noto; ago tom koit kagesunet.

⁸ Amu setyin bororiet age bororiet age, ak setyin bounatet age bounatet age: ak kobiit botanetab ng’ony eng’ oldinwek che terotin; ak kobiit rubosiek: tuguchuto ko taunetab ng’woninwek.

⁹ Ago oripge okwek: amu tun kimutyinok kapkiruok; ak kebirok eng’ sunagogisiek; ak oteleli eng’ taitab bounik ak laitorinik agobo ane, si koek baornat eng’ ichek.

¹⁰ Ak kanyol keamji korok logoiywek che miach bororiosiek tugul.

¹¹ Ak ye tun kimutak kapkiruok, ak kindeak eunekab bik, ko mat ogerer met agobo kit ne tun omwae: ago kit age tugul ne kigonok eng’ sainato, ko noto ne omwae: amu ma okwek che ong’alali, ago Tamirmiriet ne Tilil.

¹² Ak kong’wekta chi ng’etab kamet kebar, ak kong’wekta kwanda lakwennyi; ak kong’eetyi lagok sigikwak, ak kogoito kebar.

¹³ Ak kowechok bik tugul amu kainennyu: ago ne muitoi agoi let, kesoru noto.

¹⁴ Ago ye tun ogeer kit ne kiwechei ne bo ng’emisiet kotonone ole ma nyoljin kotonone (ingoguiyo ne somani), ingomwechi anyun che mi Judea tolonok:

¹⁵ ama chortagei chi ne mi got barak anan kwo go, si kobiit konem kiy eng’ gonnyi:

¹⁶ amat koweek chi ne mi mbar kwo koib ngoriennyi.

¹⁷ Bwa eng’ ichek che chio ak che reritos eng’ betusiechoto!

¹⁸ Ak osa si matun yaak choto eng’ betusiek che bo kaititindo.

¹⁹ Amu egu nyalilda eng’ betusiechoto, ne kitom koegu ko u noto koboch taunetab yaetab ng’ony ne kiyai Jehovah, agoi nguno, ama kobiitu ko u noto kogeny agoi.

²⁰ Ak nda kima til Kiptaiyat betusiek konwagitu, ta ma kisoru chi: ago kitil betusiek amu che lewenotin che kilewen.

²¹ Ak ngo lenjok chi eng’ betusiechoto, Ogeero, mi Kristo oli; anan, Ogeero, mitei olo; ko mat oyan:

²² amu ng’eetos Kristoisiek che bo lembech, ak maotik che bo lembech, ak kobortoi kaborunoik ak kwong’utik, si kobeet, agot che kigelewen nda imugaksei.

²³ Ago oripge: ogeero, kasib amwawok tuguk tugul.

²⁴ Ago eng’ betusiechoto, ko kagobata nyalilata, koimenit asista, kama koluu arawet,

²⁵ ak kororok kecheik eng’ kipsengwet, ak kotumdumgei kimnatosiek che mi kipsengwetisiek.

²⁶ Eng’ sainoto kogeer anyun Weritab chi konyonei eng’ bolik koboto kimnatet ne o ak lilindo ne o.

²⁷ Yeityo koyokto malaikaisiek, ak koyum lewenikyik, kobun usonaik ang’wan, kobunu tabandab ng’ony agoi tabandab kipsengwet.

Kanyol keripge

²⁸ Onetge kalewenetab mogoiywet: ye kang’arng’aritu temenikyik, ak kong’atyo sogek, onai ole karik kesisiet;

²⁹ u noto ak okwek ye ogeer kosuldoi tuguchu, onai ole kagorik inendet, mi kurgotik.

³⁰ Amwawok iman ale, Masiirtoi ibini, ama isulda tuguchuto tugul.

³¹ Siirtoi kipsengwet ak ng’ony, ago masiirtoi ng’alekyuk.

³² Ago mami chi ne naei agobo betunoto anan sainato, agot malaikaisiek che mi kipsengwet, agot Werit, kobate Kwanda inegei.

³³ Oripse anyun, ogenisie ak kosae: amu mongen ye egune.

³⁴ U chi, ne kibagach gonnyi, ak koruto emet age, ak kogochi otwogikyik kimnatet, chi age tugul ak boisiennyi, ak kong’at ribindet koripso.

³⁵ Oripse anyun: amu mongen ye itu chitab kobo got, ngo lagat, anan kemoi kwen, anan ye iteei kipsoiywet, anan karon;

³⁶ si macheak ak konyoruok oruitosi.

³⁷ Ak ng’olyot ne amwawok okwek amwachini tugul, ale, Oripse.