MARIKO 1 - BUKUIT NE TILIL

Johana kabatisanindet ak ng’olyondennyi

¹ Taunetab logoiywek che miach che bo Jesu Kristo, Weritab Jehovah.

² Ko u ye kigisir eng’ maotiot Isaia kole, Keero, ayoktoi kiboitiondennyu kondoenen, Ne chobei oreng’ung’;

³ Kutitab chi ne ititeni eng’ surkwen, kolen, Ochob oretab Kiptaiyat, Olititoti ole bunoti;

⁴ Kinyo Johana, kobatisanis eng’ surkwen ak koamdoi kabatisanet ne bo sigunet agobo nyoetab kaat ne bo tengekwogik.

⁵ Ak kiba ole mi inendet emet komugul ne bo Judea, ak tugul che bo Jerusalem; ak kiibatisan ichek eng’ ainet ne kiguure Jordan, kong’anyei tengekwogikwak.

⁶ Ak kiilaachi Johana sambut ne bo tambesik, ak kirategei birenetab muito, ak kiamei chereng’endet ak kumikab timin.

⁷ Ak kiamda, kole, Isubwa inendet ne kim kosiira, ak manyoljina ang’uruk atiach anokab kweonikyik.

⁸ Kiabatisanak eng’ beek; ago ibatisanok inendet eng’ Tamirmiriet ne Tilil.

Kabatisanetab Jesu

⁹ Kinyo anyun Jesu eng’ betusiechoto, kobunu Nasaret ne bo Galili, ak kiibatisan Johana inendet eng’ Jordan.

¹⁰ Yeityo, ko katogos eng’ beek, kogeer kipsengwetisiek koyatogis, ak kochorjigei inendet Tamirmiriet ko u cheptuget:

¹¹ Ak kimong’ kutit eng’ kipsengwet kole, Inyendet ko i Werinnyu, chamanennyu, abaibai mising’ eng’ inye.

Yomset

¹² Ak ngunoto kochirjir Tamirmiriet inendet kwo surkwen.

¹³ Ak kitebi eng’ surkwen betusiek artam koyomei Setani; ak kitebyei ak tiong’ik che bo timin; ak kiboisiechin inendet malaikaisiek.

Kotau Jesu boisiennyi

¹⁴ Ak kingo kagenam Johana, konyo Jesu Galili, koamdooti logoiywek che miach che bo Jehovah,

¹⁵ kolen, Kagosulda betusiek, ak kagorik bounatetab Jehovah: osigu, ak oyan logoiywek che miach.

Kaguurei alamalyet che bo tai

¹⁶ Ak ye kiwendi kobunei tabandab araraita ne bo Galili, kogeer Simon ak Andrea ng’etab kametab Simon kowirjinoti araraita regereiywot ne kiname njirenik: amu ki ramikab njirenik.

¹⁷ Ak kilenji Jesu, Obwa osubwa, si ayaak oegu ramikab bik.

¹⁸ Yeityo kobagakta regereiywekwak ak kosub inendet.

¹⁹ Ak kiba kitigin, kogeer Jakobo weritab Sebedi, ak Johana ng’etab kamet, che kimi moinget agichek kochobei regereiywekwak.

²⁰ Yeityo koguur ichek: ak kibagakta kwandanywa Sebedi komi moinget koboto otwogik, ak kosub inendet.

Kasoobi Jesi chi ne tinyei tamirmiriet Jesu muruon, eng’ Kapernaum

²¹ Kiba anyun Kapernaum; ak kiwa inendet ngunoto sunagogit orit betunoto bo sabato ak konetis.

²² Ak kikwong’io eng’ konetisiennyi: amu kiineti ichek ko u ne tinyei kimnatet, ama ko u sirik.

²³ Ak kimi ngunoto eng’ sunagoginywa chi ne kitinyei tamirmiriet ne muruon, ak kiwaach,

²⁴ kole, Kiting’ege nee ak inye, Jesu ne bo Nasaret? Kenyo ing’emech? Angenin ale, i Ne Tilil ne bo Jehovah.

²⁵ Ak kiger kong’ Jesu inendet kole, Sis, ak imong’u eng’ inendet.

²⁶ Ak ye kimandoi tamirmiriet ne muruon eng’ inendet, kobirabirto inendet, ak kowaachei eng’ kutit ne o.

²⁷ Ak kitang’any tugul, ak koteebegei ichegei, kole, Nee ni? Konetisiet ne leel! Ng’atei eng’ kimnatet agot tamirmirik che muruonen, ak kasei it inendet.

²⁸ Ak kiyom ng’alekyik ngunoto oldo tugul agoi korotinwek tugul che bo Galili.

Kasoobi Jesu kametab osotiotab Petero, koboto bik alak che chang’

²⁹ Ak ngunoto, ye kingomong’ eng’ sunagogit, kobwa gotab Simon ak Andrea, koboto Jakobo ak Johana.

³⁰ Kiamei eset kametab osotiot ne bo Simon; kiruei; kemwachi ngunoto Jesu agobo chebiosonato.

³¹ Ak kinyo konam eunnyi, ak kong’eet inendet; ak kimeto eset inendet, ak koboisiechi.

³² Ak koskoleny, ko karorokto asista, komutyi inendet tugul che kimiandos, ak che kitinyei oik.

³³ Ak kiiyumjigei nganaset komugul kurgat.

³⁴ Ak kiisoob che chang’ che kimiandos eng’ mianwek che terotin, ak koon oik che chang’ komanda; ak kima chamji oik kong’alal, amu kiingen oichoto inendet.

Komandoi Jesu sang’ kosa, ak kong’eet eng’ Kapernaum, kwo

³⁵ Ak karon mising’ kota koimen, kong’eet ak komanda sang’, kwo surkwen, kwo kosa eng’ oloto.

³⁶ Kiisub anyun Jesu, Simon, ak che kimi koboto inendet;

³⁷ ak kinyor inendet, ak kolenji, Cheng’in bik tugul.

³⁸ Ak komwachi ichek kole, Ongebe oldo age nganasok alak, si kobiit aamda eng’ oloto agine; amu kianyo agobo nito.

³⁹ Ak kiwa sunagogisiekwak che bo Galili komugul, koamdooti ak koonei oik.

Kisoobi chi ne amei mogondosik

⁴⁰ Kinyonji anyun inendet chito ne kitinyei mogondosik kosaisai, kogutung’ji, ak kolenji, Ngicham, imuchi itilila.

⁴¹ Ak kirirge inendet, ak kiiyogoito eunnyi, kotwa inendet, ak kolenji, Kaacham; tililitu.

⁴² Ak ngunoto kobagakta mogondosik chichoto, ak kotililit.

⁴³ Ak king’at inendet mising’, ak ngunoto koyokto kwo;

⁴⁴ ak kilenji, Amat imwachi chi ng’olyo: ago ui bandang’ung’, iborjige tisiindet, ak igoite agobo tililindang’ung’ tuguk che king’at Musa, si koek baornatet eng’ ichek.

⁴⁵ Ago kiwa, ak kotoi komwaitaat mising’, ak kobartaat ng’olyondonoto, kot ko mata komuch Jesu kwo nganaset, kegeeroti, ago kitebote sang’ eng’ komoswekab surkwen: kibwanji anyun inendet che bunu komosta age tugul.