LUKA 21 - BUKUIT NE TILIL

Sendesiek aeng’ che bo mosoget

¹ Ak kiyot met, kogeer magorek kondoi kagochinoikwak ole kiyumjin.

² Ak kigeer mosoget age ne kibanania kondoi sendeisiek aeng’ che u kebebertab pesaiyat.

³ Ak kile, Amwawok iman ale, Kagonde mosogani banan che siirei cho tugul:

⁴ amu kagonde chu tugul eng’ chang’indanywa ole kindoi kagochinoik; ago kagonde inendet eng’ banandanyi tugul che tinyei, agot che kosobe.

Sib komwaei Jesu agobo kabutetab Jerusalem ak agobo kagesunnetab betusiek

⁵ Ak kingota kong’alali alak agobo hekalut, ole kigimusaganda eng’ koik che kororon ak kagochinoik, kole,

⁶ Eng’ tuguchu ogeere, ko tun bwanei betusiek, che mang’etune koita agot agenge, baragutab age, ne ma tun kiwirjin ng’ony.

⁷ Ak kiteebe, kole, Konetindoni, egu anyun tuguchuto auyo? Ak u nee kaborunet ye tun machei korik kosulda tuguchuto?

⁸ Ak kile, Oripge si ma kibeetok: amu tun bwanei bik che chang’ eng’ kainennyu, kolen, A inendet; ak, Kagorik betusiek: amosub ichek.

⁹ Ak ye tun ogas agobo lugosiek ak chemarget, ko mat oarogense: amu kanyol kosib kosulda tuguchoto korok; ago tom korik kagesunet.

¹⁰ Kolenji anyun ichek, Tun setyin bororiet age bororiet age, ak setyin bounatet age bounatet age:

¹¹ ak kobiit botanosiek che eechen che bo ng’ony, ak rubosiek eng’ oldinwek alak, ak korotwek; ak kobiit kamuisosiek ak kaborunoik che eechen che bunu kipsengwet.

¹² Ago ye tom kobiit chuto, konamak eng’ eunekwak, ak kousok, ak komutak obe sunagogisiek ak korgorosiek, komutak taitab laitorinik ak bounik agobo kainennyu.

¹³ Egu baornatet eng’ okwek.

¹⁴ Oegu che begechinotin eng’ mugulelwekwok, si mosib ogerer met agobo ole owolundoi:

¹⁵ amu agonok kutit ak ng’omnatet, ne maimuchi bunikwok tugul kota kowol kiy anan kogirindaak.

¹⁶ Ak kong’wektak sigikwok, ak che otupche, ak che bo oreng’wong’, ak choronok; ak kebar alak eng’ okwek.

¹⁷ Ak kowechok bik tugul agobo kainennyu.

¹⁸ Ak mabetei sumeiyot agenge ne bo metowekwok.

¹⁹ Ak eng’ muitaeng’wong’ onyoru sobonwekwok.

²⁰ Ak ye tun ogeer lugosiek koyiem Jerusalem, onai anyun ole, kagorik ng’emisiennyi.

²¹ Ingomwechi anyun chi mi Judea tulonok; ak ingomanda che mi kwenutab nganasanato; ak amat kota koba orit ichek che mi emonoto.

²² Amu chuto ko betusiekab mugetut, si kobiit kosulda tuguk tugul che kigisir.

²³ Bwa eng’ ichek che chio ak che reritos eng’ besiosiechoto! Amu biitu bichiindo ne o eng’ ng’ony, ak nereknatet eng’ bichuto.

²⁴ Ak kobutyo ichek eng’ ng’atibindab rotwetab chok, ak kimut luulenik koba bororiosiek tugul: ak kotiech Bororiosiek Jerusalem, agoi kosulda betusiekab Bororiosiek.

²⁵ Ak kobiit kaborunoik eng’ asista ak eng’ arawet ak eng’ kecheik; ak kobiit eng’ ng’ony bichiindab bororiosiek, ak beng’jinet amu kamuutetab nyanjet ak beek che mildogei;

²⁶ ak kobek mugulelwekab bik amu kaiyweisiet, ak amu kagenisietab tuguk che bwanjin ng’ony: amu kitumdum kimnatosiekab kipsengwetisiek.

²⁷ Ak eng’ betunoto kogeer anyun Weritab chi konyonei eng’ boldet koboto kimnatet ak lilindo ne o.

²⁸ Ak ye toi kosulda tuguchuto, ogeer barak, ak oyot metowekwok; am karik katiageng’wong’.

Kanyol keripge

²⁹ Ak kimwachi ichek kalewenet; kole, Ogeer mogoiywet, ak ketik tugul:

³⁰ ye ing’atyo ogeere ak onae okwek ole, karik kesisiet.

³¹ U noto anyun ak okwek, ye ogeer koyaagis tuguchuto, onai ole karik bounatetab Jehovah.

³² Amwawok iman ale, Masiirtoi ibini, agoi kosulda tuguk tugul.

³³ Siirtoi kipsengwet ak ng’ony: ago magoi siirto ng’alekyuk.

³⁴ Ago oripge anyun okwek, si manyi mugulelwekwok keiyandit, ak bogitet, ak kaiimutikab sobetab betusiechu, ak konyonjok betunoto kocheak ko u mestet:

³⁵ amu u noto tun nyonjin bik tugul che menyei ng’ony komugul.

³⁶ Ago oripge eng’ betut age tugul, ak osae, si kobiit oterterisie, ochilile tuguchuto tugul bwanei, ak otononse eng’ taitab Weritab chi.

³⁷ Ak kiinetisiei eng’ hekalut betut age tugul; ak kimandoi kemout age tugul, kowendi kotebyei eng’ tulwet ne kiguure tulwetab Emitik.

³⁸ Ak kimusyin bik tugul inendet eng’ hekalut, si kobiit kogas inendet.