LUKA 20 - BUKUIT NE TILIL

Koesioi bik kimnatetab Jesu

¹ Ak ye kiineti bik eng’ betut age eng’ hekalut, ak koamdoi logoiywek che miach, kobwanji inendet tisiik che eechen ak sirik koboto boisiek koche inendet;

² ak kimwachi inendet kolenji, Mwawech; iyae tuguchu kimnatetab ng’o? Ak ko ng’o ne kigonin kimnatoni?

³ Ak kiwolji kolenji, Ateebenok agane ng’olyot; ak omwawa:

⁴ Kabatisanetab Johana ko kibunu kipsengwet, anan kibunu bik?

⁵ Ak king’alaljigei ichegei, kole, Ngot kemwa kele, Kibunu kipsengwet; komwa kole, Ko kilya si moyan inendet?

⁶ Ago ngot kemwa kele, Kibunu bik; kolachech bik tugul eng’ koik: amu kiiyani ichek kole, ki maotio Johana.

⁷ Ak kiwol kole, Magingen ole kibunu.

⁸ Ak kilenji Jesu ichek, Agot ane ko mamwawok kimnatet ne ayae tuguchu.

Kalewenent agobo mbaret ne bo sabibuk

⁹ Ak kitoi komwachi bik kalewenoni, kole: Kimin chi sabibuk eng’ mbar, ak komanakyi meek, ak kwo emet age kotebi betusiek che chang’.

¹⁰ Ak kingoit betut koyokyi otwogindet meechoto, si kobiit kogochi ichek inendet logoekab mbaranato: ago kibir meek inendet, ak koon kwo buch.

¹¹ Ak kiiyokto kogeny otwogindet age: ak kibir noto agine, ak kotewer, ak koon kwo buch.

¹² Ak kiiyokto kogeny ne bo somok: ak kiiguoten agine ak kotoorji sang’.

¹³ Ak kile chitab kobo mbaret, Ayai nee anyun? Ayoktoi werinnyu chamanennyu: tamangab kogonyit inendet.

¹⁴ Ago ye kingogeer meek inendet, kong’alaljigei ichegei, kole, Nito ne tun bunjin tuguk: ongebar anyun, si kindii tuguk.

¹⁵ Ak kitoorta komanda eng’ mbaretab sabibuk ak kobar. Itoi nee anyun chitab kobo mbaret bichoto?

¹⁶ Nyonei anyun inendet ak kobar meechoto tugul, ak kogochi bik alak mbaretab sabibuk. Ak ye kingogas ichek, komwa kole, Achicha, mat koek ko u noto.

¹⁷ Ak kiichiilji kong’ ichek ak kole, Nee anyun ne kigisir kele, Koita ne kiesio teegik, Kigiyai noto koek metitab luita?

¹⁸ Ak chi age tugul ne ibutyin koyata koilei konyaknyaksei; ak inendet ne ibutyin koyata, konyinyirsei.

Ng’olyot ne kigiteeb agobo kodi

¹⁹ Ak kicheng’ sirik ak tisiik che eechen konam inendet eng’ sainato; ak kiiywei ichek bik: amu kinai kole mwaei kalewenoni agobo ichek.

²⁰ Ak kiriboti icheget inendet, ak koyokto segeik, che kiyaigei koek che bo imanda, si kobiit koname inendet ng’alekyik, si kogoito inendet kwo taitab bounatet ak kimnatetab bounindet.

²¹ Ak kiteebe inendet kole, Konetindoni, kingen kele imwae ak inetisiei eng’ iman, ago metiytii chi, ak ineti iman oretab Jehovah:

²² Tos chamdoi ng’atutik kigochi kodi Kaisari, anan achicha?

²³ Ago kinai ng’alsenywa, ak kolenji ichek,

²⁴ Oborua denarit, Bo ng’o itoni ak sirutik che tinyei? Ak kile, Bo Kaisari.

²⁵ Ak kilenji ichek, Ogochi Kaisari tuguk che bo Kaisari, ak ogochi Jehovah tuguk che bo Jehovah.

²⁶ Ak kima imuch koname mwaonato eng’ taitab bik; ak kikwong’io eng’ wolunennyi, ak kisisyo.

Ng’olyot ne kegiteeb agobo ng’eetyet

²⁷ Ak kibwanji inendet Sadukaik alak, icheget che mwaei kole, mami ng’eetyet; ak kiteebe inendet,

²⁸ kole, Konetindoni, kisirwech Musa, kole, Ngo me ng’etab kam, ago tinyei osotiot, ne tom kosich lakwa, kondii ng’etab kam osotiondonoto, si kolalji ma ng’etab kam.

²⁹ Kimi anyun werik tisabu che kitupcho: ak kiitunis ne bo tai, ak kime ama kisich lakwa;

³⁰ ak kiindi ne bo aeng’;

³¹ ak u noto ne bo somok; ak kiigei noto tugul ko tisab, kibek ama sich lakwa.

³² Ak kingobata kome agine kobogoriondonoto.

³³ Tun eng’ ng’eetyet anyun koegu osotiotab ng’o eng’ ichek? Amu kiitun ichek tugul ko tisab.

³⁴ Ak kilenji Jesu ichek, Itunisiei werikab betusiechu, ak kogoitoi kitun:

³⁵ ago che kiityin kele nyoljin konyor betusiechoto bwanei, ak ng’eetyet eng’ che kibek, ko matun itunisiei, ama kigoitoi kitun:

³⁶ amu ma komuchi kobek agoi: amu kergeitu ak malaikaisiek; ak icheget ko werikab Jehovah, amu werikab ng’eetyet.

³⁷ Ago ng’eetos che kigobek, kiibor Musa agine eng’ ye kigisir agobo Ketit, ye kiguure Kiptaiyat, Jehovah ne bo Abraham, ak Jehovah ne bo Isak, ak Jehovah ne bo Jakobo.

³⁸ Inendet ko ma Jehovah ne bo che kigobek, ago bo che soptos: amu soptos tugul eng’ inendet.

³⁹ Ak kiwolji sirik alak kolenji, Konetindoni, kaimwa komie.

⁴⁰ Amu kimata kogany ichek koteebe inendet teebut age tugul kogeny.

Tos weritab Daudi Kristo?

⁴¹ Ak kilenji ichek, Teptoi ano si komwaei ichek kole, Kristo ko weritab Daudi?

⁴² Amu kimwa Daudi inendet eng’ bukuitab Tienwogikab Kalosunet, kole, Kilenji Kiptaiyat Kiptaiyandennyu, Tebe eunnyu ne bo tai,

⁴³ Agoi ayai buniguk koek ng’echeretab kelyeguk.

⁴⁴ Kuure anyun Daudi inendet Kiptaiyat, koegundoi ano anyun werinnyi?

Kiboruech kele mie keribege sirik

⁴⁵ Ak kimwachi alamalyennyi kogasei bik tugul kolenji,

⁴⁶ Oripge eng’ sirik, che chamei kobendat kolaachi ngoroik che koen, ak kochamei kagatosiek eng’ oldinwekab aldaisiet, ak ng’echerok che bo tai eng’ sunagogisiek, ak oldinwek che bo tai eng’ igorwek;

⁴⁷ ak korebe mosogik gorikwak, ak kosaei sautik che koen kong’alsei: tun nyoru chuto kiruoget ne o kosiir.