LUKA 12 - BUKUIT NE TILIL

Koborjin Jesu alamalyennyi kole ya chombilisiet

¹ Eng’ saisiechoto, ye kingoyumgei bik ng’isiat che bo tuiyet, kot kotiech ge ichegei, kosib kotoi kolenji alamalyennyi, Oribege mermerekab Parisaik, noto chombilisiet.

² Ago mami kiy ne tugot, ne matun king’anyei, anan ne ung’at, ne matun naaksei.

³ Amu kiy age tugul ne omwae eng’ mesundeito kotun kegasei eng’ ole lapkei; ak che kiochaamji itit eng’ got orit kotun kemwaitoi eng’ got barak.

Kotoreti Jesu alamalyennyi konyiganitu

⁴ Ak amwawok choronokyuk ale, Amoiywei che barei borto, yeityo ko mata komuch koyai kiy age.

⁵ Ago ateeiywok si onai inendet ne kanyol oiywei: Oiywei inendet, ne ngo kagobar komuchi kowirji Gehenna; ee, amwawok ale, Oiywei inendet.

⁶ Tos magialdae taritik mut che mengechen kebebertab mut ne bo denarit? Ama utie Jehovah agot agenge.

⁷ Ago iitotin sumeek tugul che bo metowekwok. Amoiywei anyun: osiire okwek taritik che chang’ che mengechen.

⁸ Ak amwawok ale, Age tugul ne ibortaa eng’ taitab bik, kotun ibortoi agine Weritab chi chichoto eng’ taitab malaikaisiek che bo Jehovah.

⁹ Ago inendet ne esioa eng’ taitab bik kotun keesioi agine eng’ taitab malaikaisiek che bo Jehovah.

¹⁰ Ak age tugul ne mwaei ng’olyo ne ya agobo Weritab chi, kenyochin kaat: ago inendet ne chubei Tamirmiriet ne Tilil ko maginyochin kaat inendet.

¹¹ Ak ye kimutak oldab sunagogisiek, ak taitab kiruogik, ak bounik, ko mat ogerer met agobo kit ne owolu anan omwae:

¹² amu inetok Tamirmiriet ne Tilil eng’ sainato kit ne nyolu omwa.

Kasetab miat; kalewenet agobo magoriot ne berber

¹³ Kilenji anyun chito age eng’ tuiyet, Konetindoni, mwachi werit ne kitupche kopcheiywa tugukyok.

¹⁴ Ago kilenji inendet, Chichi, ng’o ne kindea aek kiruogindet anan pcheindet eng’ okwek?

¹⁵ Ak kilenji ichek, Ogeer, ak oripge eng’ kasetab miat tugul: amu matebyei sobondab chi eng’ chang’indab tuguk che tinyei.

¹⁶ Ak kimwachi kalewenet kolenji, Kimi magoriot age ne kiga rur mbarennyi mising’:

¹⁷ ak kiibwat eng’ muguleldanyi kole, Ayae nee, amu matinye ole agonore bekyuk?

¹⁸ Ak kile, Ayae ko u ni: abute chogenikyuk, si ateech che eechen kosiir chu: si agonore bekyuk ak tugukyuk tugul che miach.

¹⁹ Si alenji sobondanyu, Sobondanyu, itinye tuguk che chang’ che miachen che konorotin che yamei kenyisiek che chang’; imuuny, amisie, eeise, ak ibaibaitu.

²⁰ Ago kilenji Jehovah, I berber inye, kimachei sobondang’ung’ kemouni bo ra; ara, si kobunji ng’o anyun, tuguchoto koichob?

²¹ U noto anyun chito ne konorjingei magornatet inegei, ne ma magorio eng’ Jehovah.

Kiboruech kele ma mie kegerermet agobo kiy tugul

²² Kilenji anyun alamalyennyi, Noto anyun amwawok ale, Amogerer met agobo sobeng’wong’, eng’ tuguk che oame; anan agobo borwekwok, eng’ tuguk che olaachi.

²³ Amu siirei sobet amitwogik, ak siirei borto ngoroik.

²⁴ Obwat chepkuginik, amu magolei, ama kesei; ama tinyei ole konore anan choget; ago Jehovah ne baei: osiire taritik konyil ata!

²⁵ Ak ng’o eng’ okwek ne imuchi kogerer met si kotes koindanyi eng’ kakwautiet agenge ne bo eut?

²⁶ Ngo momuchi anyun oyai agot kiy kitigin, ko amu nee anyun si ogerer met agobo tuguk alak?

²⁷ Obwat taptok, ole bititoi: maboisiei, anan koletis; ago amwawok ale, Agot Solomon, eng’ talbistanyi tugul, ko kima kolumegei ko u age eng’ chuto.

²⁸ Ago ngolaaksechin Jehovah ko u noto suswek che bo kewet che mi ra, ak mutai kewirji ma, kotos siirei ne tia anyun kolaaksewok okwek, che otinye kayanet ne ming’in!

²⁹ Amocheng’ che oame, anan che oee, amosage.

³⁰ Amu cheng’ei tuguchuto tugul bororiosiekab ng’ony: ago ingen Kwandang’wong’ kole omakyinige tuguchuto.

³¹ Ago ocheng’ okwek bounatetab Jehovah, si keteswok tuguchuto tugul.

³² Amoiywei, okwek akwet ne ming’in; amu baibai Kwandang’wong’ kogonok bounatet.

³³ Oalde che otinye, si ogoite kagochinoik; onapchige suberok che maosegitu, konoruet eng’ kipsengwetisiek ne mabegu, ole marikyin chorik, ama ng’emei kiptorotinik.

³⁴ Amu ole mi konorueng’ung’, ko oloto ole mi muguleldang’ung’ agine.

Kanyol keripge; kalewenet agobo ribindet ne kiyani

³⁵ Ongogermenogis suenutikwok, ak ongolalyo taisiekwok;

³⁶ ak ogergeitu ak bik che igeni kiptaiyandenywa, kobunu igortab katunisiet: si ye nyo ak kogongony, koyatyi ngunoto.

³⁷ Boiboen otwogichoto, che nyoru kiptaiyandanato koripsei ye nyo: amwawok iman ale, kermenigei inendet, ak chobei bichoto koteb ng’ony eng’ ole amisie, ak kwo kobai ichek.

³⁸ Ak ngo nyo eng’ ripset ne bo aeng’, anan ne bo somok, ak konyorta ko u noto, ko boiboen anyun otwogichoto.

³⁹ Ago onai ni ole, nda kiingen kiptaiyatab got sait ne nyonei chorindet, ta kiripsei, ta kima kobagaktoi gonnyi kobut chorindet.

⁴⁰ Ochopge ak okwek: amu nyonei Weritab chi eng’ sait ne mobwati.

⁴¹ Kilenji anyun Petero, Kiptaiyandani, imwawech achek kalewenoni, anan imwachini bik tugul?

⁴² Kole anyun Kiptaiyat, Ng’o anyun ribindet ne kiyani ak ko ng’om, ne indoi kiptaiyandennyi kotononji gonnyi, ak kogochi amitwogikwak che yamei eng’ betut ne makyin?

⁴³ Baibai otwogindonoto, ne nyoru kiptaiyandennyi koyaei ko u noto.

⁴⁴ Amwawok iman ale, indoi chichoto kotononji tugukyik tugul.

⁴⁵ Ago ngo mwa otwogindonoto eng’ muguleldanyi, kole, Igaegei kiptaiyandennyu masib koitu; ak kotoi kobir otwogik che murenik ak che tibik, ak koamis ak koeeiso, ak kobogit;

⁴⁶ weeksei anyun kiptaiyat ne bo otwogindonoto eng’ betut ne kama kogeni, ak eng’ sait ne manaei, ak kobir mising’, ak kopchechi kebebertanyi koboto che matinyei kayanet.

⁴⁷ Ak otwogindonoto, ne kiingen magetab kiptaiyandennyi, ama kochopgei, anan koyai ko u magennyi, kebire birutik che chang’;

⁴⁸ ago inendet ne kima kongen, ak koyai tuguk che nyoljin biret, kebirei birutik che ng’ering’en. Ak age tugul ne kigigochi che chang’, kotun kimage che chang’: ak inendet ne kigigochi korib tuguk che chang’, kotun kimage inendet che siirei.

Kaborunoik che iboru ole teptoi betusiek

⁴⁹ Kianyo awirji mat ng’ony; nee anyun ne ta amache, ngo kagolal nguno!

⁵⁰ Ago atinye kabatisanet ne tatun kibatisanena; kamarigitya ne tia agoi kosulda!

⁵¹ Tos olen kianyo agonu kalyet konyo ng’ony? Amwawok ale, Achicha; ago besiet:

⁵² amu koboch nguno kopchegei bik mutu che mi got agenge, surie somogu aeng’, ak kosurie aeng’ somok.

⁵³ Pchegei, kwanda ak werit, ak werit ak kwanda; kamet ak cheptanyi, ak chepto ak kamet; kametab werit ak osotiondennyi, ak osotiotab werit, ak kametab werit.

⁵⁴ Kimwachi anyun tuiyet kolenji, Ye ogeer kotogosune boldet cherongo, ole, Machei korobon; ak koyaak ko u noto anyun.

⁵⁵ Ak ye ogeer usonet ne usune murot ne bo tai, ole, Machei koit kemeut ne ng’wan; ak koyaak ko u noto.

⁵⁶ Chombilichu, ongen obesie ole teptoi ng’ony ak kipsengwet; kalya anyun si monai ole teptoi betusiechu?

⁵⁷ Kalya si moruoch okwege agobo tuguk che bo imanda?

⁵⁸ Amu ye ta obendi ak bunyondeng’ung’ taitab kiruogindet, igiilge obendi eng’ oret si kounden; si mata komutin taitab kiruogindet, ak komutyin kiruogindet askarindet, ak kotoorjin askarindet korgoret.

⁵⁹ Amwaun ale, Magoi imong’une oloto, agoi iyaakte sendeiyot ne bo let.