KOMONG'U 38 - BUKUIT NE TILIL

Tugukab Got orit

¹ Ak kiyai kaptisisiet ole kibeele tiseiywek eng’ ketikab shita: koindanyi ko ki kakwautik mut che bo eut, ak tebeesindanyi kakwautik mut agine, kiaechin tebeesindo ak koindo: ak tononennyi ko ki kakwautik somok che bo eut.

² Ak kiyai kosikyi kuinoik eng’ luukwekyik ang’wan; kigitany kuinoikyik konamgei ak kioto: ak kiiliige sugunwet.

³ Ak kiitany tuguk tugul che bo kaptisisiet, terenik, ak kechigok che eechen, ak tabok che mengechen, ak karik che kirutune banyek, ak tabok che kiibe mat: kiitany tugukyik tugul eng’ sugunwet.

⁴ Ak kiyachi kaptisiet sugunonik che kiregeri, eng’ kapkelyenutab mireiywot ne yiemei kaptisisiet kel, si komuurmuur kioto.

⁵ Ak kiitang’ji peteinik ang’wan luukwek ang’wan che bo kioto bo sugunwet ne kigireger, si kirooch ketik che kiibe.

⁶ Ak kiyai ketichato eng’ shita, ak kiiliige sugunwet.

⁷ Ak kiirooch ketichato peteinik orit che mi komoswekab kaptisisiet si kobiit ketandane; kiyai kioto koek moinget orit.

⁸ Ak kiitany tabet ne bo sugunwet, ak kiyae sugunwet ng’echerennyi ne tebe che ki u kioisiek eng’ sugunonik che kigeeregei kobogorisiek, che kiboisiei eng’ kurgetab emait ne kituiyechin.

⁹ Ak kiyai seremut ne ng’otat: ki bo katanit ne kararan ne kigila, ngoroik che tabanu murot ne bo tai; kiyamei kakwautik bogol agenge che bo eut:

¹⁰ ki tiptem lumeiywekwak, ak ki tiptem kong’ikwak che bo sugunonik, che tononie; ki bo feda ireusiekab lumeiywek, koboto rateiywekwak che kituiye.

¹¹ Ak kimi ngoroik murot katam che yamei kakwautik bogol che bo eut, ak lumeiywekwak tiptem ak kong’ikwak che tononie tiptem che bo sugunonik, ki bo feda ireusiek che bo lumeiywek, koboto rateiywekwak che kituiye.

¹² Ak kimi ngoroik che yamei kakwautik konom che bo eut, komosta ne tokyingei cherongo, ak lumeiywekwak taman, ak kong’ikwak che tononie taman; ak ki bo feda ireusiekab lumeiywek, koboto rateiywekwak che kituiye.

¹³ Ak kitabanu komostab kong’asis ngoroik che yamei kakwautik konom che bo eut.

¹⁴ Ki kakwautik taman ak mut che bo eut ngoroik che bo kurget komosta age; ak lumeiywekwak somok, ak kong’ikwak somok;

¹⁵ ak kiiliige noto komosta ne bo aeng’: kimi kurget ne bo seremut komosi ak komosi ngoroik che yamei kakwautik taman ak mut che bo eut, lumeiywekwak somok, ak kong’ikwak somok.

¹⁶ Ngoroik tugul che kiyiemei seremut ko ki bo katanit ne kararan ne kigila.

¹⁷ Ak ki bo sugunonik kong’ik che kitononie lumeiywek; ak ki bo feda ireusiek che bo lumeiywek koboto rateiywekwak che kituiye; ak kituge feda metowekab lumeiywechoto; ak ki bo feda rateiywek che kigituiyote lumeiywek tugul che bo seremut.

¹⁸ Ak kinab nabindet ne nabei kondoi lelesta, ngoriet ne bo kurgetab seremunoto ng’otat, eng’ che tuuen ne nyalil, ak eng’ che arusen ne birir, ak eng’ che biriren, ak eng’ katanit ne kararan ne kigila: ak kiek koindanyi kakwautik tiptem che bo eut, ki bo kakwautik mut che bo eut tononennyi ak tebeesindanyi, ko u ngoroikab seremut.

¹⁹ Ak ki bo sugunonik lumeiywekwak ang’wanu, ak kong’ikwak che tononie, ang’wan; ak ki bo feda ireusiekwak, ak kigituge feda metowekab lumeiywekwak, ak rateiywekwak che kiga kituiyote.

²⁰ Ak ki bo sugunonik tigongenik tugul che bo got ak tigongenik tugul che yiemei seremut.

²¹ Koitetab tuguk che bo got, chu, agot gotab baornatet, ko u ye kigiit, ko u ng’atutietab Musa, kobunji boisietab Lawik, eng’ eutab Itamar, weritab Aron tisiindet.

²² Ak kiyai Besalel, weritab Uri, weritab Hur, ne bo oretab Juda, tuguk tugul che king’at Jehovah Musa.

²³ Kimi ak inendet Oholiab, weritab Aisamak, ne bo oretab Dan, ki musogindet, laindet ne ng’om, ak ko nabindet ne nabei koindoi lelesta, eng’ che tuuen ne nyalil, ak eng’ che arusen ne birir, ak eng’ che biriren, ak eng’ katanit ne kararan.

²⁴ Kiek tahabu tugul che kigiboisie eng’ boisiet tugul ne bo ole tilil, agot tahabu che bo kagochinet, kiyamei talentaisiek tiptem ak sogol, ak sekelisiek bogol tisab ak sosom, choto sekelisiek che bo ole tilil.

²⁵ Ak fedaisiekab icheget che kigiit che bo tuiyet, ko kiyamei talentaisiek bogol, ak sekelisiek elfut agenge ak bogol tisab ak tamanwogik tisab ak mut, choto sekelisiek che bo ole tilil:

²⁶ kigon chi tugul beka, noto kebebertab sekel, ko u sekel ne bo ole tilil, eng’ chi age tugul ne kisiirtoi kowendi ole mi che kagiit, che bo kenyisiek tiptem ak koba tai, che bunu murenik elfusiek bogol lo ak somok ak bogol mut ak konom.

²⁷ Ak talentaisiechato bogol agenge che bo feda ko kigitanyi kobwa kong’ik che u kelongonik, che bo ole tilil, ak kong’ik che tononie lumeiywekab ngoriet ne kigioiye got; kong’ik bogol che yamei talentaisiek bogol, yamegei konda agenge ak talentait agenge.

²⁸ Ak kiitany sekelisiek elfut agenge ak bogol tisab ak tamanwogik tisab ak mut koek ireusiek che bo lumeiywek ak kotuge feda metowekwak, ak koyachi rateiywek che kigituiyote,

²⁹ ak kiyamei talentaisiek tamanwogik tisab, sugunwet ne bo kagochinet, ak sekelisiek elfusiek aeng’ ak bogol ang’wan.

³⁰ Ak kiitany chuto koek kong’ik che bo kurget che tononie lumeiywekab emait ne kituiyechin, ak kaptisisiet ne kigitang’e sugunwet; ak karnennyi ne kigireger eng’ sugunonik, ak tuguk tugul che bo kaptisisiet,

³¹ ak kong’ik che tononie lumeiywekab seremut, ak tigongenik tugul che bo got, ak tigongenik tugul che yiemei seremut.