KOMONG'U 35 - BUKUIT NE TILIL

Kogochinoik che kigigoito agobo Got

¹ Ak kiiyum Musa tuiyet komugul ne bo lagokab Israel, ak kolenji, Chu ng’alek che kang’at Jehovah, kole, oyai.

² Kiyaei boisiet betusiek lo, ago betutab tisab koegu betut ne itabanat eng’ okwek, sabato ne bo kamuung’et ne tilil eng’ Jehovah: kibarei chi age tugul ne yaei boisiet betunoto.

³ Amat olaal ma age tugul eng’ meng’otosiekwok eng’ betutab sabato.

⁴ Ak king’alalji Musa tuiyet komugul ne bo lagokab Israel, kolenji, Nito ko kit ne kang’at Jehovah, kole,

⁵ Oib eng’ kwenung’wong’ kagochinet ne kigochin Jehovah: chi age tugul ne tinyei muguleldo ne chamei, ingoib, kagochinet ne kigochin Jehovah: tahabu, feda, ak sugunonik;

⁶ ak angok che tuuen ne nyalil, ak che arusen ne birir, ak che biriren ak katanit ne kararan, ak kororikab ng’ororek;

⁷ ak magatokab mengichik che kigisal kobiriritu, ak magatokab mengichikab beek, ak ketikab shita.

⁸ Ak mwaitab kit ne ikweng’sei, ak tuguk che ng’uu ne anyiny che bo mwaita ne kiilse, ak che bo nyamdutik che kibeelei che ng’uu ne anyiny;

⁹ ak koikab soam, ak koik che kitetei che bo epod, ak che bo ngorietab teget.

¹⁰ Ak ingonyo chi age tugul eng’ okwek ne tinyei muguleldo ne bo kaguiyet, si koyai tugul che king’at Jehovah:

¹¹ got, ak emainnyi, ak ne kituge, ak karikyik che kiname ngoroik, ak baoinikyik, ak rateiywekyik, ak lumeiywekyik, ak kong’ikyik che tonone:

¹² ak moinget, ak ketikyik che kiibe, ak keruet ne bo rirenet, ak anget ne kioiye;

¹³ ak meset, ak ketikyik che kiibe, ak tugukyik tugul, ak makatinik che bo kabartaet;

¹⁴ ak keldab tait agine ne bo kit ne ikweng’sei, ak tugukyik, ak taisiekyik, ak mwaitab kioto ikweng’sei;

¹⁵ ak kapkorosut ne kibeele nyamdutik, ak ketikyik che kiibe, ak mwaita ne kiilse, ak nyamdutik che kibeelei che ng’uu ne anyiny, ak ngoriet ne bo kurget ne bo got ne sib kemong’jin.

¹⁶ Ak kaptisisiet ne kibeele kagochinoik, ak sugunwennyi ne kigireger, ak ketikyik che kiibe, ak tugukyik tugul, ak tabet ak ng’echerennyi ne tabe.

¹⁷ Ak ngoroik che kisonginindos, che bo seremut, ak lumeiywekyik, ak kong’ikwak che tononie, ak ngorietab kurgetab seremut;

¹⁸ ak tigongenik che bo got, ak tigongenikab seremut, ak boroonikwak;

¹⁹ ngoroik che kigisal kogororonitu, si keboisie eng’ ole tilil, ngoroik che itabanotin che bo tisiindet Aron, ak ngoroikab werikyik, si kobois eng’ boisietab tiseinatet.

²⁰ Ak kiba tuiyet komugul ne bo lagokab Israel eng’ ole mi Musa.

²¹ Ak kinyo age tugul ne kiichirjir muguleldanyi, ak age tugul ne kiigiil tamirmiriennyi kogon, kiib kagochinoikab Jehovah, che bo boisietab emait ne kituiyechin, ak che bo boisiennyi tugul, ak che bo ngoroik che itabanotin.

²² Ak kibwa murenik ak gotab kor, icheget che kicham mugulelwekwak, ak kiib peteinikab serunek, ak munaokwak, ak peteinik che bo ng’okset, ak sonoekab kaatit, ki bo choto tugul tahabu; kiigochi chi tugul Jehovah tuguk che bo tahabu.

²³ Ak kiib chi tugul ne kitinyei angok che tuuen ne nyalil, ak che arusen ne birir, ak che biriren, ak che bo katanit ne kararan, ak koroik che bo ng’ororek, ak magatokab mengichik che kigisal kobiriritu, ak magatokab mengichikab beek.

²⁴ Ak chi age tugul ne kigon kagochinoik che bo feda ak che bo sugunonik, ko kibunji choto kagochinetab Jehovah: ak chi age tugul ne kitinyei ketikab shita, ko kiib choto kobunji boisietab otisiet.

²⁵ Ak kiilet rogoonik kobogorisiek tugul che tinyei ng’omnatet, yeityo koib che kagolet, che bo che tuuen ne nyalil, ak che arusen ne ais, ak che biriren, ak che bo katanit ne kararan.

²⁶ Ak kiilet kororikab ng’ororek kobogorisiek tugul che kiichirjir mugulelwekwak eng’ ng’omnatet.

²⁷ Ak kiib bounik koikab soam, ak koik che kitetyin epod, ak che kitetyin ngorietab teget;

²⁸ ak tuguk che ng’uu ne anyiny, ak mwaita; ne bo kit ne ikweng’sei, ak ne bo mwaita ne kiilse, ak che bo nyamdutik che kibeelei che ng’uu ne anyiny.

²⁹ Kiipji lagokab Israel Jehovah kagochinoik che bo chamnyet; muren age tugul, ak kobogorio age tugul, che kiigiil mugulelwekwak koib tuguk che bo boisionoto tugul, che kiga ng’at Jehovah keyai eng’ Musa.

³⁰ Ak kilenji Musa lagokab Israel, Ogeero, kagoguur Jehovah Besalel, komwa kainennyi, inendet ko weritab Uri, weritab Hur, ne bo oretab Juda;

³¹ ak kagonyiit inendet Tamirmirietab Kamuktaindet, eng’ ng’omnatet, ak kaguiyet, ak naet, ak konai ole teptoi boisiet age tugul ne bo musognatet;

³² ak kobwat ole choptoi boisionikab musognatet, si koboisie tahabu, ak feda, ak sugunonik,

³³ ak kowai koik che kitetyin kelongonik, ak koyai ketik kobois eng’ boisiet tugul ne bo musognatet.

³⁴ Ak kiinde ng’omnatet muguleldanyi si komuch konet inendet, koboto Oholiab, weritab Aisamak, ne bo oretab Dan.

³⁵ Kigonyiit inendet ng’omnatet mugulelwekwak, si koyai boisiet tugul ne bo musognatet, ne bo waindet, ak ne bo laindet ne ng’om, ak ne bo nabindet ne nabei kondoi lelesta, eng’ che tuuen ne nyalil, ak eng’ che arusen ne birir, ak eng’ che biriren, ak eng’ katanit ne kararan, agot ne bo regerindet, agot ne bo ichek che yaei boisiet age tugul, ak ne bo icheget che ibwati ole choptoi boisietab musoknatet.