KOMONG'U 23 - BUKUIT NE TILIL

Ng’atuktik ak kayomisutik

¹ Amemwaate ng’alek che bo lembech: amonamge ak kiptengekyot, iegu baoriat ne ma bo iman.

² Amesub tuiyet iwe iyai kiy ne ya; amebaorianji ng’alek isub tuiyet imaas kiruoget:

³ ametiytii kibanania eng’ ng’alekyik.

⁴ Nginyoru tetab bunyondeng’ung’ anan sigiriennyi ne betoti, ikwerichi iman chitab kobo,

⁵ Nginyoru sigirietab ne wechin ko kagobut amu tuguk che laei, ak kama imache itoret, ko kanyol itoret ing’eet.

⁶ Amat imaas kiruogetab kibananiandeng’ung’ eng’ ng’alekyik.

⁷ Istege, looitu eng’ ng’alekab lembech; amebar che matinyei yaitio ak che bo imanda: amu maiityini imanda kiptengekyot.

⁸ Ametaach tuguk che bo kagaigaet: amu tuchei konunoik, icheget che ng’omen, ak kogunuri ng’alekab che bo imanda.

⁹ Amenyalil toondet amu ongen ole teptoi muguleldab toondet, amu kio toek eng’ emetab Misri.

¹⁰ Igole mbareng’ung’ kenyisiek lo, ak iges ruratennyi;

¹¹ ago mete eng’ kenyit ne bo tisab koteb komuuny; si kobiit konyor turonik kibananokab biguk: ak koam tiong’ikab timin che ituuchi bichoto. Iyae ko u noto eng’ mbareng’ung’ ne bo sabibuk, ak eng’ mbareng’ung’ ne bo ketikab emitik che bunu mwanik.

¹² Yai boisieng’ung’ eng’ betusiek lo, ak imuuny eng’ betutab tisab: si kobiit komuuny eitang’ung’ ak sigirieng’ung’, ak konyor kamuung’et weritab otwogindeng’ung’ ne tie, ak toondet.

¹³ Ak orib tuguk tugul che kaamwawok: amat omwa kainaikab cheptalelisiek, amat kegasyi kuting’ung’.

¹⁴ Iyaiywa igorta konyil somok eng’ kenyit age tugul.

¹⁵ Rib igortab makatinik che ma kinde mermerek: iame eng’ betusiek tisab makatinik che ma kinde mermerek, ko u ye kiang’atin, eng’ betut ne kigiaror eng’ arawetab Abib (amu arawanato ne kiomong’une Misri); amat konyo chi tainnyu ak eut buch.

¹⁶ Rib igorta ne bo kesisiet, tongoanikab boisioniguk che igoljini mbar: ak igortab betusiek che kiyumune tugukab mbar, eng’ kagesunetab kenyit, ye iyumyu tugukab boisieng’ung’ eng’ mbar.

¹⁷ Bwanei taitab Kiptaiyat Jehovah murenik tugul konyil somok eng’ kenyit agenge.

¹⁸ Ameibu korotikab tiseiywondennyu koboto makatinik che kaginde mermerek; amengoeekyi mwanikab igortanyu.

¹⁹ Kanyol iibu tuguk che bo tai eng’ tongoanik che bo emeng’ung’ kobwa gotab Jehovah Kamuktaindeng’ung’. Ameyoe aruet chegab kamet.

²⁰ Keero, kayokte malaikaiyat kondoenen koribotin eng’ oret, ko mutin iwe ole kiachob.

²¹ Oripge eng’ tainnyi, ak ogas it ng’alekyik; amotach inendet: amu manyoiywok kaat bistoeng’wong’, amu mi kainennyu eng’ inendet.

²² Ago ngigas it ng’alekyik, ak iyai tugul che amwaun; aegu anyun bunyotab buniguk, ak aegu usindetab che usin.

²³ Amu wendi malaikaiyandennyu kondoenen, komutin iwe ole mi Amorik, Hitik, Perisik, Kananik, Hibik, ak Jebusik, ak aiste ichek awong’u.

²⁴ Amat isa kanamonikwak, anan iot, anan isub boisionikwak: ago oluul kot ko mang’et kiy, ak obut kotonogis tolochikwak.

²⁵ Ak oboisiechi Jehovah Kamuktaindeng’wong’, ak koberur amitwogiguk ak beeguk; ak aiste mianwek eng’ kweng’ung’.

²⁶ Ak mabiitu ne rorogu moet, anan ne oosu, anan ne soneni eng’ emeng’ung’; ak ayai kosulda koitetab betusieguk.

²⁷ Ayoktoi kamuisennyu kondoenen, ak anyalil bik tugul che mi ole iite, ak ayai buniguk tugul komweenen.

²⁸ Ak ayokte karamiet kondoenen, kwo koon Hibik, Kananik, ak Hitik, koba eng’ taing’ung’.

²⁹ Maone ichek koba eng’ taing’ung’ eng’ kenyit agenge; si maguber emet, si matesogis tiong’ikab timin ak koiimak.

³⁰ Aone komutya koba eng’ taing’ung’ agoi itesage, ak inyaban emet.

³¹ Ak andoi kiwoteng’ung’ kobochit Nyanjet ne Birir agoi nyanjetab Pilistik, ak kobochit ong’atet agoi Ainet: amu andoi bikab emonoto eunekwok; ak ion ichek koba eng’ taing’ung’.

³² Amoyai arorut ak ichek, anan agot eng’ kanamonikwak.

³³ Amat komeny emeng’ung’, si magonin iyaiywa tengek: amu ngot iot kanamonikwak, koegu iman mestet nito eng’ inye.