KOMONG'U 18 - BUKUIT NE TILIL

Koitu Jetro, ak ng’alek che kimwachi Musa

¹ Kigas anyun Jetro, tisiindetab Midian, kabyugoitab Musa, tugul che kigoyachi Kamuktaindet Musa, ak bikyik Israel, ole kiimutunda Jehovah Israel komong’une Misri.

² Ak kiimut Jetro, kabyugoitab Musa, Sipora, osotiotab Musa, amu kiga koweekta inendet kwo,

³ ak werikyik aeng’; kigiguure age Gerson; amu kile, Kiaegunote kiprutoiyo eng’ emetab bororiosiek alak:

⁴ ak kigiguure age Elieser; amu kile, Kiek toretindennyu Kamuktaindet ne bo baba, ak kisorua eng’ rotwetab chok ne bo Parao:

⁵ kiit anyun Jetro, kabyugoitab Musa, koboto werikab Musa ak osotiondennyi, ole mi Musa eng’ ong’atet, ole kiimuung’e eng’ tulwetab Kamuktaindet:

⁶ ak kilenji inendet Musa, Kaaitu oling’ung’ ane Jetro kabyugoing’ung’, koboto osotiondeng’ung’, ak werikyik aeng’.

⁷ Kimanda anyun Musa kwo kotorokta kabyugoinnyi, ak kiing’uruk ak kong’utut; ak kiteebegei ole chamdogei; ak kimanda emait orit.

⁸ Ak kimwachi Musa anyun kabyugoinnyi tuguk tugul che kigoyachi Jehovah Parao ak Misrik agobo Israel, ak nyalilwogik tugul che kiyor eng’ oret, ak ole kisorundo Jehovah ichek.

⁹ Ak kibaibait Jetro amu mieindo tugul ne kigoyachi Jehovah Israel, amu kisor ichek komong’une eunekab Misrik.

¹⁰ Ak kile Jetro, Iberurot Jehovah, ne kisoruok eng’ eunekab Misrik, ak eng’ eutab Parao; ne kisor bik komong’une bounatetab Misrik.

¹¹ Angen nguno anyun ale o Jehovah kosiir cheptalelisiek tugul: ee, eng’ kit ne kiyai bichoto eng’ menotet.

¹² Kinam anyun Jetro kabyugoitab Musa kagochinet ne kibeelei ak tiseiywek koeng’ji Kamuktaindet: ak kinyo Aron, koboto boisiek tugul che bo Israel, koamis ak kabyugoitab Musa eng’ taitab Kamuktaindet.

¹³ Ak eng’ karonet ne bo aeng’, koteb ng’ony Musa koruoksechi bik: ak kitononso bik eng’ ole mi Musa kong’eete karon agoi koimen.

¹⁴ Ak ye kingogeer kabyugoitab Musa tuguk tugul che kiyachin Musa bik, kole, Nee ni iyachini bik? Amu nee si itebi inyege, ak kotonondos bik tugul ko kayiemin koboch karon agoi koimen?

¹⁵ Ak kilenji Musa kabyugoinnyi, Amu bwanjina bik koteepse Jehovah:

¹⁶ ye tinyei ng’olyo, kobwanjina; ak abesiechini chi tugul ak chitab kokwennyi, ak aneti ichek konai konetisiosiekab Jehovah, ak ng’atutikyik.

¹⁷ Ak kilenji kabyugoinnyi Musa, Ma mie kii iyae.

¹⁸ Iwong’ugei kimnateng’ung’, inye, ak bichu omitei tugul: amu siirei kimnateng’ung’ nito; memuchi iyai inyege.

¹⁹ Kas anyun ng’olyondennyu, aborun kit ne iyae, ak ingoteb Kamuktaindet koboten: mie iegu ne iipchini Kamuktaindet ng’alekab bik, ak iipchini Kamuktaindet ng’alekwak;

²⁰ ak inet ichek konetisiosiek ak ng’atutik, ak iborji oret ne kanyolji kosub, ak boisiet ne kanyolji koyai.

²¹ Nyolu kogeny ilewenote, eng’ bik tugul, bik che kimen, che iywei Kamuktaindet, bikab imanit, che wechei tugukab ng’wen, ak inde ichek koboi bik, koek bounikab elfusiek, ak che bo bogolwogik, ak che bo konomusiek, ak che bo tamanusiek:

²² ak ingoruoksechi bik bichoto eng’ betusiek tugul: si koibun ng’olyot age tugul ne uui, ago ingobesiechigei ichegei ng’olyot age tugul ne ming’in: si kobiit konyamnyumun, ak ogesen tugul.

²³ Ak ngot iyai kiito anyun, ak ngo ng’atin Kamuktaindet ko u noto, imuch anyun itonon, ak koba bichu tugul agichek oldanywa eng’ kalyet.

²⁴ Kigas anyun Musa ng’alekab kabyugoinnyi, ak kiyai choto tugul kamwachi inendet.

²⁵ Ak kilewenot Musa bik che kimen eng’ Israel tugul, ak kiinde koboi bik, koek bounik che bo elfusiek, ak che bo bogolwogik, ak che bo konomusiek, ak che bo tamanusiek.

²⁶ Ak kiiruoksechi bik eng’ betusiek tugul: kiipchi Musa ng’alek che uuen, ago kiibesiechigei ichegei ng’olyot age tugul ne ming’in.

²⁷ Ak kichamji Musa kabyugoinnyi kwo; ak kiwa anyun bandanyi agoi emennyi.