KOMONG'U 13 - BUKUIT NE TILIL

Katabanetab werik che bo tai ak twateiywek

¹ Ak king’alalji Jehova Musa, kolenji,

² Itabanwa taiywek tugul, age tugul ne yatei iyotet eng’ lagokab Israel, eng’ bik ak eng’ che twatei tiong’ik; bunjina choto.

³ Ak kilenji Musa bik, Obwat betuni, ne kiomong’une Misri, eng’ gotab otwoknatet; amu kiimoong’wok Jehovah eng’ kimnatetab eunnyi, omong’une olito; magiamei makatinik che kaginde mermerek.

⁴ Omandoi rani eng’ arawetab Abib.

⁵ Ak ye kagomutak Jehovah oit emetab Kananik, ak ne bo Hitik, ak ne bo Amorik, ak ne bo Hibik, ak ne bo Jebusik, emet ne kiiyosiechi inendet kwanisieguk kole tun konok, emet ne nyiitat chego ak kumik, eng’ yoto anyun orib boisioni oyai kotugul eng’ arawanito.

⁶ Oam makatinik che ma kinde mermerek eng’ betusiek tisab, ak koek igortab Jehovah eng’ betutab tisab.

⁷ Kiamei eng’ betusiechoto tugul tisab makatinik che ma kinde mermerek; amat kenyorji chi makatinik che kiginde mermerek, ak amat kobiitune emeng’ung’ komugul mermerek.

⁸ Ak tun imwachini wering’ung’ eng’ betunoto, ilenjini, Amu nito ne kiyaiywa Jehovah ye kiamong’u eng’ Misri.

⁹ Ak tun egu noto kaborunet eng’ eung’ung’, ak koek kabwatet ne mi kwenutab konyeguk, si kobiit kotebe ng’atutikab Jehovah kuting’ung’; amu kiimoong’wok Jehovah omong’une Misri eng’ eut ne kim.

¹⁰ Orib anyun ng’atutioni eng’ betunnyi ne kiging’atyi eng’ kenyit age tugul.

¹¹ Ak ye tun iitak Jehovah emetab Kananik, ko u ye kiiyosieun ak kwanisieguk, kole konok,

¹² itabani anyun kobunji Jehovah tugul che yatei iyotet ak che twatei tiong’ik; ak bunjin Jehovah ng’etik ak che kirugik.

¹³ Ak itiachi ne twatei sigiriet, itiage aruet; ak ngo metiach iiri kaatit: ak itiachi taita age tugul eng’ weriguk.

¹⁴ Ak ye tun teebenen wering’ung’ eng’ betusiek che bwanei, kole, Nee ni? Ilenji anyun, Kiimoong’wech Jehovah eng’ Misri, eng’ gotab otwognatet, eng’ eut ne kim:

¹⁵ ak ye kingoetenech Parao kebe, kobar anyun Jehovah taita age tugul eng’ emetab Misri, che bo bik, ak che kitwatei tiong’ik; aeng’jini anyun Jehovah tugul che yatei iyotet, che kirugik; ago atiachi werikyuk tugul che yatei iyotet.

¹⁶ Ak egu noto kaborunet eng’ eung’ung’, ak koek ratutik che kirate anok eng’ turietab togeng’ung’: amu kiimutwech Jehovah eng’ eut ne kim kemong’une Misri.

Kobendi Israelik Etam

¹⁷ Ak kingo kagounda Parao bik koba, koma indochi Kamuktaindet kobun oret ne bunei emetab Pilistik, agot nganda ki negit; amu kile Kamuktaindet, Si maiyweis bik ye keer luget, ak komach koweekyigei Misri:

¹⁸ ago kiindochinot Kamuktaindet bik kobun ong’atet ne tokyingei Nyanjet ne Birir: ak kitogosta lagokab Israel komanda eng’ emetab Misri ko kagolaach karik.

¹⁹ Ak kiib Musa kowekab Josep: amu kiga kogimgim inendet lagokab Israel koyosio, kolenji, Tun nyonjinok Jehovah iman; ak tun oib kowekyuk obendi otogostoi eng’ oli.

²⁰ Kinam anyun bandanywa kong’eetye Sukot, ak kiba komuung’e Etam, ole bochin ong’atet.

²¹ Ak kiindoe Jehovah ichek eng’ toloitab boldet bet, kondochi ichek eng’ oret: ak kemoi eng’ toloitab mat, kokweng’ji; si kobiit komuch koba bet ak kemoi:

²² Kima isto inendet eng’ taitab bik toloitab boldet bet, ama isto toloata bo mat kemoi.