KOLOSAIK 3 - BUKUIT NE TILIL

Tuguk che biitune ng’eetyet ne king’eetosi ak Kristo

¹ Ko u ye king’eetye anyun koboto Kristo, ocheng’ tuguk che mi barak, ole mi Kristo kotebyei eng’ eutab tai ne bo Jehovah.

² Obwat tuguk che mi barak, ma tuguk che mitei ng’ony.

³ Amu kiobegu, ak kigiuny sobonwekwok koboto Kristo eng’ Jehovah.

⁴ Ye tun took Kristo, ne inendet sobondanyo, otoogu anyun ak okwek koboto inendet eng’ torornatet.

⁵ Obar anyun kebeberwekwok che mitei ng’ony; sokset, simdo, magutik che samisen, maget ne ya, ak kasetab miat, noto saetab kanamonik;

⁶ nyonjin nereknatetab Jehovah werikab ngelelnatet amu tuguchoto;

⁷ eng’ tuguchoto che kiobendote ak okwek eng’ tai, ye kita omenye eng’ tuguchuto.

⁸ Ago nguno olakte ak okwek tuguchuto tugul; neregek, nyitatet, yaitiet, chubisiet, ak ng’alalet ne bo tewernatet eng’ kutuswekwok:

⁹ amomwachige lembech, amu kioregu chito ne bo keny koboto boisionikyik,

¹⁰ ak koolaach chito ne leel, ne kiwalei koleelit agoi naet kogergeit ak itondab inendet ne kiyai inendet:

¹¹ ole mating’e boroindo Yunanindet ak Yahudiot, ne imuratanat ak ne ma imuratanat, bunotio, Sitiaindet, ne otwogin, ne itiagat: ago Kristo ko tugul ak eng’ tugul.

¹² Noto anyun, amu o lewenaikab Jehovah che tililen ak ko o chamanik, olaach muguleldo ne bo rirenetab ge, talasiet, kaming’inetab ge, mutyonet, ak muitaet;

¹³ omuitochinige, ak onyochinige kaat okwege, ngo tinyei chi age tugul ng’olyo eng’ age: agot ko u ye kinyoiywok kaat Kiptaiyat, oyai ko u noto ak okwek:

¹⁴ ak otes eng’ tuguchuto tugul chamnyet, noto ratutiet ne bo kagesunetab ge.

¹⁵ Ak ingoboi kalyetab Kristo mugulelwekwok, noto ne kigiguurjok eng’ borto agenge; ak oegu che tinyei kongoi.

¹⁶ Ingomenyok ng’olyotab Kristo eng’ magornatet, eng’ ng’omnatet tugul onetige ak oteechinige eng’ tienwogikab kalosunet ak tienwogik ak tienwogikab tamirmiriet, otienjini Jehovah eng’ mieindo eng’ mugulelwekwok.

¹⁷ Ak kit age tugul ne oyae, eng’ ng’olyot anan eng’ boisiet, oyai tugul eng’ kainetab Kiptaiyat Jesu, omwachini Jehovah Kwanda kongoi eng’ inendet.

Sobetab gab chi ne bo Kristo

¹⁸ Osotichu, ogas it manong’otaikwok, ko u ye nyolu eng’ Kiptaiyat.

¹⁹ Manong’otaichu, ocham osotikwok, amogochi ng’wanindo.

²⁰ Lagochu, ogas it sigikwok eng’ tuguk tugul, amu iboiboi nito mising’ Kiptaiyat.

²¹ Kwanisiechu, amotachatachi lagokwok, si mailuuk mugulelwekwak.

²² Otwogichu, ogas it eng’ tuguk tugul ichek che kiptainikwok eng’ borwek; ama eng’ otwoknatet ne kigeerei, ko u che iboiboi bik, ago eng’ muguleldo tugul, oiywei Kiptaiyat:

²³ kit age tugul ne oyae, oyai kobunu muguleldo, ko u eng’ Kiptaiyat, ama ko u eng’ bik;

²⁴ ongen ole otaache eng’ Kiptaiyat melekto ne bo borotet; oote Kiptaiyat Kristo.

²⁵ Amu inendet ne yaei ne ya, ko tun taachei agine ne bo yaitionoto kiyai: ama mi tiytiet.