KALEWANAIK 9 - BUKUIT NE TILIL

Kuursetab ng’omnatet ak igoritanyi

¹ Kigoteech ng’omnatet gonnyi, Kigowai tolochikyik tisab:

² Kigoeny tukyik; kigoburuch divaikyik; Kigochob amitwogik eng’ mesennyi.

³ Kigoyokto tibikyik, waachei Eng’ komoswek che tororen mising’ che bo nganaset,

⁴ Ingonyo yu age tugul ne abusat: Mwachin chito ne matinyei naet, kolenjin,

⁵ Nyo, am amitwogikyuk, Ak iee divaik che kaaburuch.

⁶ Obagakte abusnatet, ak osopche; Ak obendate oretab kaguiyet.

⁷ Nyoru tewernatet inendet ne itigoni chotindet; Nyoru tisiet ne kerei kong’ kiptengekyot.

⁸ Ameger kong’ chotindet, si mawechin: Ker kong’ chito ne ng’om, si kochamin.

⁹ Inet ne ng’om si kong’omit kosiir: Inet chito ne bo iman, si kotesak eng’ kanetetab ge.

¹⁰ Kaiyweisiet ne kiywei Jehovah ko taunetab ng’omnatet: Ak naet ne kinae Inendet ne Tilil ko kaguiyet.

¹¹ Amu tesoksei betusieguk eng’ ane, Ak kotesak kenyisiekab sobeng’ung’.

¹² Ngot ko i ng’om, ko i ng’om ne neng’ung’: Ak ngot ichotisiei, igeseni inyege.

¹³ Bolin kwondo ne berber; Abusat, ama naei kiy.

¹⁴ Ak tebe kurgetab gonnyi, Tebe ng’echeret eng’ komoswek che tororen che bo nganaset,

¹⁵ Si koguur che siirtoi, Che maguseigong’ eng’ ortinwekwak,

¹⁶ Ingonyo yu age tugul ne abusat: Ak mwachin inendet ne matinyei naet kolenjin,

¹⁷ Anyiny beek che kechorei, Ak kororon amitwogik che keamei eng’ ung’ot.

¹⁸ Ago manaei kole mi oloto che kigobek; Kole, mi toekyik rirosiekab oldab che kigobek.