KALEWANAIK 8 - BUKUIT NE TILIL

Kuursetab ng’omnatet ak kalosunennyi

¹ Tos mabolei ng’omnatet, Tos matwegu naet?

² Tonone baragutab komoswek che tororen ye negit oret, Ole tuiyechin ortinwek;

³ Ole negite ormarichok, ole kibunei kebendi nganaset, Bolei mising’ eng’ kurgotik che kibunei kebendi orit:

⁴ Kole, Aguurok, okwek murenju, Ak bo tugennyu werikab bik.

⁵ Okwek che o abusotin, oguiye ng’omnatet; Ak okwek che o berber, oegu che tinyei muguleldo ne bo naet.

⁶ Ogas, amu amwae tuguk che bo telunatet; Ak mwaei kutinnyu tuguk che bo iman.

⁷ Amu mwaei kutinnyu imanda; Ak wechei kutinnyu tengekto.

⁸ Bo imanda ng’alek tugul che amwae; Mami kiy ne imaasat anan ko ne bo ngelelnatet.

⁹ Kasoksei tugul eng’ inendet ne iguitos, Ak bo iman eng’ icheget che nyoru naet.

¹⁰ Taach kotigonennyu, ma feda; Ak itaach naet kosiir tahabu che kororon.

¹¹ Amu kararan ng’omnatet kosiir koik che kiguure peninim; Ak magirogendoi ng’omnatet tuguk tugul che kimachei.

¹² Ane, ng’omnatet, ne kiayai naet koek ole amenye, Ak anyoru naet ak ruchinet.

¹³ Kaiyweisiet ne kiywei Jehovah ko kewech yaitio: Aweche menotet, ak kaeetetab ge, ak oret ne ya, Ak kutit ne imaasat.

¹⁴ Nenyu kiruoget, ak naet ne igesunotge: A naet; atinye kamuget.

¹⁵ Laitorani laitorinik amu ane, Ak iruochi bounik eng’ imanda.

¹⁶ Bounisiei bounik amu ane, Ak bik che toogunotin, kiruogik tugul che bo ng’ony.

¹⁷ Achame che chama; Ak nyorua che cheng’a eng’ kagiiletab ge.

¹⁸ Atinye magornatosiek ak teegisto; Magornatosiek che tebyei, ak imanda.

¹⁹ Kororon logoekyuk kosiir tahabu, ee, tahabu che tililen; Ak siirei kelunetab tugukyuk feda che kororon.

²⁰ Awendote oretab imanda, Eng’ kwenutab ortinwekab kiruoget:

²¹ Si kobiit agochi icheget che chama konyor borotet, Ak anyiit chogenikwak.

²² Kiami koboto Jehovah koboch taunetab orennyi, Kotom kobiit boisionikyik che bo keny.

²³ Kigiyaa abiit koboch keny, koboch taunet, Kotom kobiit ng’ony.

²⁴ Kigisicha ye kitomo kobiit rirosiek; Ye kitomo kobiit kondametusiek che rootune beek che chang’.

²⁵ Ye kitomo kelumda tulonok, Kigisicha ye kitomo kobiit tulonok che mengechen;

²⁶ Ye kitomo koyai inendet ng’ony anan emotinwek, Anan taunetab ng’ung’unyekab ng’ony.

²⁷ Kiami ye kiigimiti inendet kipsengwetisiek: Ye kiinde yiemutiet ole boch riret:

²⁸ Ye kiigimiti bolik eng’ barak: Ye kingogimegitu kondametusiekab riret:

²⁹ Ye kiinde nyanjet kiwotennyi, Si masiir beek ng’atutiennyi: Ye king’at lumeiywekab ng’ony:

³⁰ Kigimi tuwai, ko u kiboitiot ne ingen boisiet: Ak kiaboiboi inendet betut age tugul, Kiabaibai kotugul eng’ tainnyi;

³¹ Abaibaitune emennyi ne menyei bik; Ak kimi boiboiyennyu eng’ werikab bik.

³² Ogasa anyun, werju: Amu iberurotin ichek che ribei ortinwekyuk.

³³ Ogas kotigonet, ak ong’omegitu, Amoesie.

³⁴ Iberurot chito ne kasa, Ne ripsei betut age tugul eng’ kurgotikyuk, Kogenisiei eng’ tugatugikab kurgotikyuk.

³⁵ Amu inendet ne nyorua, ko kanyor sobondo, Ak konyor chamet eng’ Jehovah.

³⁶ Ago inendet ne chalwogenjina ko kang’em sobondanyi: Chamei meet tugul che wecha.