KALEWANAIK 7 - BUKUIT NE TILIL

¹ Werinnyu, rib ng’alekyuk, Ak igonorjige kayomisutikyuk.

² Rib kayomisutikyuk si isob; Rib ng’atutiennyu ko u ye iribe laptetab kondang’ung’.

³ Ratyi moriguk; Sirji muguleldang’ung’.

⁴ Ilenji ng’omnatet, I chepkamennyu; Ak iguure naet chepkamennyu ne bo oret:

⁵ Si kobiit koribin eng’ chepkugoniot, Eng’ chepkugoniot ne chemwai kut.

⁶ Amu kiaiitite eng’ tirisietab gonnyu Eng’ tirisiennyu ne bo segengeisiek;

⁷ Ak kiageer eng’ kwenutab che abusanik, Ak kianyit eng’ kwenutab neranik, Neran ne matinyei naet,

⁸ Kobunei oret ole negite luitab kwonyoto, Ak kiisub oret ne wendi gonnyi;

⁹ Ko karatarat, ko kaimen, Eng’ imenindab kemout, eng’ mesundeito.

¹⁰ Ak ogeero, kituiye korgo Kolaachi ngoroikab chepkugonik, ng’alindet.

¹¹ Bolin ak ko ngelelio; Matononi eng’ gonnyi:

¹² Mi oret ra, komi tun komoswek che baraen, Ak saptoi eng’ ole besiechin ortinwek.

¹³ Konam anyun inendet, ak kong’utut, Ak komwachi inendet eng’ nyiganatet kolenji:

¹⁴ Atinye korosekab kagochinoikab kalyet; Kaayaakte rani tuguk che kiga arorte.

¹⁵ Kaanyo anyun atorogun, Kaanyo acheng’in eng’ kagiiletab ge, ak kaanyorun.

¹⁶ Kaaiite ngoroik che bo lelesta, Eng’ kit ne alyeldoe, Koboto kitambaok che simormor che bo usisietab Misri.

¹⁷ Kaande nyamdutik itogunnyu Koboto tuguk che u igomoik, ketik che kiguure ahalim, ak kinamon.

¹⁸ Nyo kibaibaige kot koeech; Ngibaibaige eng’ chamnyet.

¹⁹ Amu mami ga chitab kobo got, Kawa banda ne loo:

²⁰ Kaib loletab fedaisiek; Tun itu ga eng’ kwenutab arawet.

²¹ Iterteri inendet eng’ ng’alekyik che chang’ che tangus, Ichuuti chichoto eng’ ng’alekyik che bo kagaigaet.

²² Isubi anyun inendet kwonyoto eng’ yoto, Ko u eito ne kikwerie kwo eng’set, Anan ko u mugurek che kitigone ne berber;

²³ Kot kotoor kipchabet koennyi kosore; Ko u taritiet ne choktoi kowendi mestet, Ama naei kole barei sobondanyi.

²⁴ Ara anyun, werju, ogasa, Ak oepchi it ng’alek che amwae.

²⁵ Amengotokyigei muguleldang’ung’ ortinwekyik, Amebet isub ortinwekyik.

²⁶ Amu kigoluul che chang’ che kigiguoten: Ee, bik tugul che kigobar inendet, ko luget ne o.

²⁷ Gonnyi ko oret ne wendi oldab che kigobek, Ne chorjingei gorikab meet.