KALEWANAIK 6 - BUKUIT NE TILIL

Kiteechin chi koistoegei tononjinet ne kitononjin chi agobo ng’al

¹ Werinnyu, ngot iegu ne itononjini chitab kokweng’ung’, Ngot ko kooyosie onamge eunek ak kipsagarin,

² Kagoriichin anyun ng’alek che imwae, Kagoratin ng’alek che imwae.

³ Yai anyun nito, werinnyu, si isoruge, Amu kagonamin eutab chitab kokweng’ung’; Ui iming’inge, ak igaigai chitab kokweng’ung’.

⁴ Ameru, Anan inuuch.

⁵ Sorugei ko u ye sorugei cheptirgichet eng’ kiplogotiot, Ak ko u taritiet ne sorugei eng’ eutab namindetab taritik.

⁶ Ui oldab birechet, inye ne i choriren; Ibwat ortinwekyik, si ing’omitu:

⁷ Amu matinyei kiruogindet, Anan ne iyagi, anan bounindet,

⁸ Konorjingei amitwogik eng’ kemei, Ak koyumi amitwogikyik eng’ kesisio.

⁹ Irue kot kotianit-o, chorirenoni? Ing’eete au eng’ ruondong’ung’?

¹⁰ Ruondo kitigin, kanuuget kitigin, Namet kitigin ne bo eunek si kinuuch:

¹¹ Konyo anyun banandang’ung ko u rebindet, Ak konyo anyun rartaeng’ung’ ko u chito ne tinyei karik.

¹² Wendoti chito ne matilei kiy, chitab tengekto, Koiboti ng’alek che bo kamaaset;

¹³ Ng’wegisie konyekyik, ak kong’alale kelyekyik, Ng’alale morikyik;

¹⁴ Mi mastaet muguleldanyi, chobei yaitiet kotugul; Kolei toiyet.

¹⁵ Cheei anyun inendet nyalildanyi; Ng’emaksei eng’ chokyinet, ama mi kiy ne kinyae.

¹⁶ Mitei tuguk lo che wechei Jehovah; Ee, tuguk tisab che wechei inendet:

¹⁷ Choto ko, konyekab menotet, ng’elyepta ne mwaei lembech, Ak eunek che tumdoi korotik che matinyei tengek;

¹⁸ Muguleldo ne chobei kabwatutik che yaach, Kelyek che chepcheb koruachin yaitiet;

¹⁹ Baoriat ne ma bo iman, ne mwaei lembech, Ak inendet ne kolei toiyet eng’ kwenutab tupchosiek.

Kiteechin chi koripigge ak koistoegei ibetab ge

²⁰ Werinnyu, rib kayomisutietab kwandang’ung’, Amemete ng’atutietab komet:

²¹ Ratyi choto muguleldang’ung’ kotugul, Ratyi kaating’ung’.

²² Ye iwendoti, kondoun; Ye irue, koribin, Ak ye ing’eet, kong’alalun.

²³ Amu kayomisutiet ko tait; ak ng’atutiet ko lapkeiyet; Ak keretab kong’ ne bo kotigonet ko oretab sobondo:

²⁴ Si koribin eng’ kwondo ne ya. Koribin eng’ chemwaikutnatet ne bo chepkugoniot.

²⁵ Amegase miat eng’ muguleldang’ung’ kororonindanyi; Amengoriigenen konyekyik.

²⁶ Amu ibeeti chepkugoniot chito agoi kong’etyi kererutiet: Ak cheng’oti chepkugoniot koriich sobondo ne kararan.

²⁷ Imuchi chi konamji mat tegennyi, Ama lalyo ngoroikyik?

²⁸ Imuchi chi kotiegat ng’etetiot, Ama lalyo kelyekyik?

²⁹ U noto chito ne ibegei ak osotiotab chitab kokwennyi; Age tugul ne twaei inendet ko magibagaktoi buch.

³⁰ Masasei bik chorindet, ngo chorso Si kobiyo ye amei rubet:

³¹ Ago ngot kenyor, kogeeri konyil tisab; Igoitoi tuguk tugul che bo gonnyi.

³² Matinyei naet chito ne ibegei ak kwony; Inendet ne yaei noto kong’emei sobondanyi.

³³ Nyoru ng’otobosiek ak tewernatet; Ama kiistoi tewernatennyi.

³⁴ Amu ng’etkonda nereknatetab chi; Ama rire eng’ betutab yaaktaetab mugetut.

³⁵ Mamage kiy kit ne kitiage; Magigoigoi, agot ngigochi tuguk che chang’ che bo kagaigaet.