KALEWANAIK 4 - BUKUIT NE TILIL

Itigoni kwanda werikyik kosub ng’omnatet

¹ Ogas werju kotigonetab kwanda, Ak oeb it si kobiit onai kaguiyet:

² Amu agonok konetisiet ne mie; Amobagakte ng’atutiennyu.

³ Amu kia weritab baba, Kia tala, ak kia chamat anege eng’ taitab kamennyu.

⁴ Ak kiineta baba, kolenja, Ingotebe muguleldang’ung’ ng’alekyuk; Rib ng’atutikyuk, si isob:

⁵ Cheng’jige ng’omnatet, cheng’jige kaguiyet; Ameutie, ameistoege ng’alekyuk che amwae:

⁶ Amemete, si koribin; Cham, si koribin.

⁷ Ng’omnatet ko kit ne o; cheng’ anyun ng’omnatet: Ee, cheng’jige naet koboto tuguk tugul che itinye.

⁸ Itoror, si kolanden: Imutyinin teegisto, ye onamge ak inendet.

⁹ Indoi meting’ung’ sonoekab mieindo: Konin narietab telunatet.

¹⁰ Kaso, werinnyu, ak itaach tuguk che amwae; Si kochang’a kenyisiekab sobeng’ung’.

¹¹ Kianetin eng’ oretab ng’omnatet; Kiandoun eng’ ortinwekab lititindo.

¹² Ye iwendi ko maigiichi kiy kakwautiguk; Ak ngot ilabati, ko mariichin kiy.

¹³ Nam mising’ konetisiet; mat ichamji kwo: Rib: amu inendet ko sobondang’ung’.

¹⁴ Mechut oretab kiptengeginik, Amewondote oretab bik che yaachen.

¹⁵ Istoege noto, mebun ole negite; Iweeige eng’ ole mi, ak isiirte.

¹⁶ Amu mainuuktos kobate ko kagoyai yaitiet; Istoegei ichek kanuuget, agoi konach chito age.

¹⁷ Amu amei amitwogikab yaitiet, Ak koeei divaikab koromnatet.

¹⁸ Ago oretab che bo iman ko u lapkeiyet ne iluu, Ne iluu ko tesoksei agoi betut ne igesunotgei.

¹⁹ Oretab kiptengeginik ko u mesundeito: Manaei kit ne riichei ichek.

²⁰ Werinnyu, kas ng’alekyuk; Epchi it ng’alek che amwae.

²¹ Amat ingoistoegei taing’ung’; Rib kotebe muguleldang’ung’ orit.

²² Amu sobondo eng’ icheget che nyoru, Ak chametab ge ne bo borwekwak.

²³ Rib muguleldang’ung’ eng’ kagiiletab ge tugul; Amu bunu kong’ikab beekab sobon yoto.

²⁴ Istoege kutit ne ngelelio, Ak iistoege kutit ne mwaei ng’alek che bo kamaaset.

²⁵ Keer tai, Ak ingogeer konyeguk tai.

²⁶ Ruchi komie ole bunei kelyeguk, Ak ingogimegitu ortinweguk tugul.

²⁷ Amemaste iwe eutab tai anan ne bo katam; Istoe keldang’ung’ yaitiet.