KALEWANAIK 22 - BUKUIT NE TILIL

¹ Kaigai kelewen kainet ne mie kosiir magornatosiek che chang’; Kaigai kelewen mieindo ne bo chamnyet kosiir feda ak tahabu.

² Tuitos magorek ak kibananok: Jehovah yaindetab ichek tugul.

³ Keerei chito ne ng’om yaitiet ak kounygei: Ago siirtoi abusanik, ak konyor nyalilda.

⁴ Melektab kaming’inetab ge, ak kaiyweisiet ne kiywei Jehovah, Ko magornatosiek, ak teegisto, ak sobondo.

⁵ Mi katok ak mestonok oretab chito ne imaasat: Looitune choto inendet ne ribei sobondanyi.

⁶ Inet lakwet kosub oret ne nyolu kobun, Ak mabagaktoi agot ye kagoosit.

⁷ Bou magoriot kibananok, Ak otwogindetab chito ne besendoi, ne beseni.

⁸ Inendet ne kolei tengekto kogesei nyalilda: Ak betei kiroktab nereknatennyi.

⁹ Kiberuri ne tinyei kondab aiyebindo; Amu igochin amitwogikyik kibananiat.

¹⁰ On chotindet, si kobet bolatet; Ee, sisei boriet ak tewernatet.

¹¹ Inendet ne chamei tililindab muguleldo, Egu anyun laitoriat choruennyi amu mieindab kutinnyi.

¹² Ribei konyekab Jehovah inendet ne tinyei naet, Ago igabui ng’alekab chito ne kaberberindet.

¹³ Mwaei chito ne choriren kole, Mi ng’etundo sang’: Kibara eng’ oret.

¹⁴ Keringet ne loo kutitab chepkugoniot: Ibutyin yoto inendet ne nerekyin Jehovah.

¹⁵ Kigiratyi berberindo muguleldab lakwet; Ago onei kiroktab kotigonet kolooit eng’ inendet.

¹⁶ Inendet ne usei kibananiat si kotesak tugukyik, Ak kogochin tuguk magoriot, koegu kibananiat.

Tuguk che mwaei bik che ng’omen

¹⁷ Eb it, si kobiit igas ng’alekab bik che ng’omen, Ak itokyi muguleldang’ung’ naennyu.

¹⁸ Amu mie ngot irib eng’ oring’ung’, Ngo kimegitu tugul eng’ kuting’ung’.

¹⁹ Si kobiit imang’u Jehovah, Kaaborun rani chuto, ee, kaaborun.

²⁰ Tos ma asirun tuguk che kororon Che bo kiruogutik ak naet;

²¹ Kogonin inai imanitab ng’alekab iman, Si kobiit imuch iwolji ng’alekab iman ichek che koiyogun?

-1-

²² Amat irebe kibananiat, amu banan, Anan ius eng’ ormarich ne kinyalili:

²³ Amu ng’alaldochin Jehovah ichek, Ak koluul sobonwekab ichek che luulei.

-2-

²⁴ Amenam choruandit ak chito ne nerechi; Amat obendate ak chito ne tinyei neregek.

²⁵ Si menetge ortinwekyik, Ak inyoru mestet ne bo sobondang’ung’.

-3-

²⁶ Amat iegu agenge eng’ ichek che iyostos konamegei eunek, Anan agenge eng’ ichek che tononjin bik agobo besenaik:

²⁷ Ngot ko metinye che iyaaktoe, Ko amu nee anyun si koibenen itogung’ung’?

- 4 -

²⁸ Ameiste kiwotet ne bo keny, Ne kichobei kwanisieguk.

- 5 -

²⁹ Tos igeere chito ne igiiljingei boisiennyi? Tononi inendet eng’ taitab laitorinik; Matononi eng’ taitab bik che ma toogunotin.