KALEWANAIK 20 - BUKUIT NE TILIL

¹ Chotindet divaik, bolindet maiyek; Ak ma ng’om age tugul ne betei eng’ maiyek.

² U borisenetab ng’etundo kamuisetab laitoriat: Inendet ne tachei laitoriat koyachin sobondanyi tengekto.

³ Teegisto eng’ chi ngo istoegei boriet: Ago bolei age tugul ne berber.

⁴ Machamei kobatis inendet ne choriren eng’ betusiekab kaititiet; Somsoti anyun kegesisie, ama nyoru kiy.

⁵ U riret kiruoget eng’ muguleldab chito, Ago ramu chito ne tinyei kaguiyet.

⁶ Ibortoi chi age tugul eng’ bik che chang’ mieindanyi: Ago imuchi ng’o konyor chito ne kiyani?

⁷ Iberurotin lagokab chito ne bo iman, Ne wendote imandanyi.

⁸ Iseertoi yaitwogik tugul eng’ konyekyik Laitoriat ne tebe ng’echeretab kiruoget.

⁹ Ng’o ne imuchi komwa kole, Kaatilil muguleldanyu, A tilil, ma atinye tengek?

¹⁰ Ratilisiek che terotin, ak tuguk che kigerisie che terotin, Choto tugul ko tuguk che wechei Jehovah.

¹¹ Naoksei lakwet eng’ boisionikyik, Ngo tilil boisiennyi, anan ngo litit.

¹² Kiyai Jehovah tuwai, Itit ne kigastoe, ak konda ne kigeertoe.

¹³ Amecham ruondo, si meegu kibananiat; Kosu, si ibiye.

¹⁴ Mwaei alindet kole, Matilei kiy, matilei kiy; Ago ye kakwa, kochoigei.

¹⁵ Mi tahabu, ak chang’indab koik che kiguure peninim: Ago ng’alekab naet ko koita ne bo kamanutiet ne o.

¹⁶ Nam ngorietab inendet ne tononjin toondet; Ak onam inendet koek kaarorunet ne tononjin toek.

¹⁷ Anyiny eng’ chi amitwogikab lembeita; Ago ne matia konyi kutinnyi koik.

¹⁸ Kigimiti chobutiet age tugul eng’ kiruoget: Ak iyai luget eng’ ng’omnatet.

¹⁹ Ng’anyei ung’otik ne iboti ng’alek; Amat onamge anyun ak inendet ne iberberisiei.

²⁰ Kimisi eng’ mesundeito ne o mising’ Taitab age tugul ne sasei kwandanyi anan kamet.

²¹ Borotet ne biitu eng’ chokyinet Ko magiberuri eng’ let.

²² Amat imwa ile, Ageeri yaitiet: Igen Jehovah, si kosorun.

²³ Wechei Jehovah ratilisiek che terotin; Ama mie kerutietab lembech.

²⁴ Bo Jehovah kakwautikab chi; Imuktoi ano anyun chi koguiyo orennyi?

²⁵ Mestet eng’ chi kosartae kole, Tilil, Ak ye kagoyai kayosiosiek, koteebat.

²⁶ Iyestoi laitoriat ne ng’om kiptengeginik, Ak kotuei ichek eng’ kit ne kituisie.

²⁷ Tait ne bo Jehovah tamirmirietab chi, Ne isiachi tugukab ke.

²⁸ Ribei rirenet ak iman laitoriat: Ak kogimiti rirenet ng’echerennyi ne bo laitornatet.

²⁹ Torornatetab murenik ko kimnatenywa: Ak kororonindab boisiek kalwalek.

³⁰ Iundoi yaitwogik birutik che ng’wonen: Ak itei kwerutik moet orit.