KALEWANAIK 18 - BUKUIT NE TILIL

¹ Inendet ne itabanegei, kocheng’ei magennyi inegei, Ak konerekyin chichoto ng’omnatet ne igesunotgei.

² Maboiboitune ne berber kaguiyet, Ago ibortogei kityo muguleldanyi.

³ Ye nyo kiptengekyot, konyo agine sasisiet, Ak bwanei tewernatet ak chotisiet.

⁴ U beekab keringet ne loo ng’alekab chito; U kondametutab ng’omnatet kererut ne rootei.

⁵ Ma mie ketiytii kiptengekyot, Anan kimaas ne bo iman eng’ kiruoget.

⁶ Chutei kutitab ne berber ole mi tiiyet, Ak kuurei kutinnyi biret.

⁷ Ng’emisietab ne berber kutinnyi, Ak mestetab sobondanyi kutinnyi.

⁸ U tuguk che anyiny ng’alekab chaamindet, Ak bendi moet.

⁹ Inendet agine ne choriren eng’ boisiennyi Ko tupcho ak ng’emindet.

¹⁰ Irimet ne kim kainetab Jehovah: Mwechin ne bo iman, si konyor chametab ge.

¹¹ Magornatetab magoriot ko nganasennyi ne kim, Ak u irimet ne koi eng’ kabwatutikyik.

¹² Menei muguleldab chi kotom konyor ng’emisiet, Ak indoe kaming’inetab ge teegisto.

¹³ Inendet ne wolu ko ma epchi it, Ko berberindo ak tewernatet eng’ inendet.

¹⁴ Igimiti tamirmirietab chito nyalulnatennyi; Ago imuchi ng’o komuita eng’ arogenet?

¹⁵ Nyoru naet muguleldab ne ng’om; Ak cheng’ei naet ititab ne ng’om.

¹⁶ Cheng’jin konunet chito boroindo, Ak komutyi inendet taitab bik che eechen.

¹⁷ Chito ne sib kong’alali, kelen bo iman; Ago nyonei chitab kokwennyi kosiachi inendet.

¹⁸ Iwong’u kabeletab ge barbariat, Ak ioitos kiruogik.

¹⁹ Uui kosiir nganaset ne kim keweech tupchet ne kiginach: Ak u tiiyosiek che u choto, temeleiywekab nganaset.

²⁰ Biyonyi moetab chi logoekab kutinnyi; Biyonyi inendet iyotetab kutinnyi.

²¹ Mitei kimnatetab ng’elyepta, meet ak sobondo; Ak amei logoekyik ichek che chamei.

²² Nyoru kit ne mie age tugul ne nyoru osotiot ne ituni, Ak nyoru chamet eng’ taitab Jehovah.

²³ Boisie kibananiat kagaigaosiek: Ago wolu magoriot kong’emei.

²⁴ Cheng’jingei ng’emisiet inendet ne cheng’ei choronok che chang’: Ago mi choruet ne namegei kosiir ng’etab kamet.