KALEWANAIK 16 - BUKUIT NE TILILKalewenaik che terotin 1 Boisietab chi kochob muguleldanyi: Ago bunu Jehovah wolunetab ng’elyepta. 2 Tililen ortinwek tugul che bo chi ye keerei: Ago kerei Jehovah tamirmirik eng’ karogendoet. 3 Igochi Jehovah boisioniguk kondochi, Si kogimegitu kabwatutiguk. 4 Kiyai Jehovah tuguk tugul ko u ye kimakyin: Ee, kiyachi che yaach betut ne ya. 5 Kit ne wechei Jehovah ko muguleldo age tugul ne menei: Agot ngo namgei eunek, ko magimetoi ama kibir. 6 Kiundoi yaitiet eng’ rirenet ak iman: Ak istoegei bik yaitiet ye iywei Jehovah. 7 Ye iboiboi ortinwekab chi Jehovah, Kogochin kochamnyo ak bunikyik. 8 Kaigai tuguk che matia koboto imanda Kosiir kelunaik che chang’ koboto kertaetab kong’. 9 Chobei muguleldab chi orennyi: Ago indochin Jehovah kakwautikyik. 10 Bunu kutitab laitoriat tiletab kiruoget ne bo Kamuktaindet: Malelei kutinnyi eng’ kiruoget. 11 Bo Jehovah kerutiet ne bo iman ak tuguk che kigerisie: Boisiennyi koik tugul che mi lolet che kigerisie. 12 Kit ne kiwechei eng’ laitorinik ko koyai tengekto: Amu kigimiti laitornatet eng’ imanda. 13 Boiboiyetab laitorinik kutuswek che bo iman: Ak kochamei ichek chi ne mwaei iman. 14 U neregekab laitoriat bik che kiyoktoi che bo meet: Ago tisei chito ne ng’om. 15 Mi sobondo lapkeiyetab togetab laitoriat; Ak u chamennyi boldetab ropta ne bo let. 16 Kararan anyun ne tia kenyor ng’omnatet kosiir tahabu! Ee, kaigai kelewen naet kosiir feda. 17 Oret ne o ne bo bik che bo iman ko koistoegei yaitiet: Ribei sobondanyi ne ribei orennyi. 18 Indoe menotet ng’emisiet, Ak indoe kachaunetab ge kabutet. 19 Kaigai ngetepto kaming’inetab ge koboto kibananok, Kosiir kepchei barunenik ak menotik. 20 Nyoru mieindo ne epchin it ng’olyot: Ak baibai age tugul ne imang’u Jehovah. 21 Inendet ne ng’om eng’ muguleldanyi, keguure ne utat: Ak tesei kanetetab ge anyinyindab kutit. 22 Kaguiyet ko kondametutab beekab sobon eng’ inendet ne tinyei: Ago berberindo kotigonet ne kitigoni che berber. 23 Ineti muguleldab ne ng’om kutinnyi, Ak kotesyin kanetetab ge kutinnyi. 24 U kumiat ng’alek che iboiboi bich, Anyinyen eng’ sobondo, ak chametab ge ne bo kowek. 25 Mi oret ne len chito litit, Ago kagesunennyi ko ortinwekab meet. 26 Boisiechin chi magetab boisiet; Amu ichirjiri kutinnyi inendet. 27 Chobei yaitiet chito ne matilei kiy: Ak mitei kutinnyi kit ne u mat ne beelsei. 28 Iseeri boriet chito ne imaasat: Ak ibestos chaamindet choronok che eechen. 29 Iboiboi chito ne korom chitab kokwennyi, Ak komut eng’ oret ne ma mie. 30 Chobei tuguk che imaasotin chito ne kerei konyekyik: Ibu yaitiet inendet ne susei kutinnyi. 31 Chepkuletab torornatet kalwalek, Biitune oretab imanda. 32 Kaigai inendet ne masartae nerek kosiir ne kim; Ak kaigai inendet ne bou tamirmiriennyi kosiir ne luulei nganaset. 33 Kiwirjin barbariat ngoriet; Ago bunu Jehovah kiruogennyi tugul. |