KALEWANAIK 14 - BUKUIT NE TILIL

¹ Teechei gonnyi kwondo age tugul ne ng’om: Ago butei ne berber.

² Iywei Jehovah inendet ne wendote imandanyi: Ago sasei Jehovah inendet ne imaasat eng’ ortinwekyik.

³ Mitei kutitab ne berber kiroktab menotet: Ago ribei kutuswekwak che ng’omen.

⁴ Tilil biut ole mami tuga: Ago ibu kimnatetab tuga kelunet ne o.

⁵ Mamwaei lembech baoriat ne kiyani: Ago mwaei lembech baoriat ne ma bo iman.

⁶ Cheng’ei chotindet ng’omnatet, ago manyoru: Ago nyamnyum naet eng’ inendet ne tinyei kaguiyet.

⁷ Ui ole mi chito ne berber, Amenyorjini inendet ng’olyotab naet.

⁸ Ng’omnatetab chito ne ng’om ko koguiyo orennyi: Ago ng’alset berberindab che berber.

⁹ Sasei che berber ng’ogisto: Ago mi mieindo eng’ kwenutab che bo iman.

¹⁰ Ingen muguleldo ng’wanindanyi; Ak matinyei toondet yamdao ak boiboiyennyi.

¹¹ Kigabui gotab kiptengeginik: Ago kiberuri emaitab ne bo iman.

¹² Mi oret ne len chito litit, Ago kagesunennyi ko ortinwekab meet.

¹³ Rirei muguleldo agot ngo roriei; Ak kagesunetab boiboiyet ko nyigisindo.

¹⁴ Inendet ne ichuchuchegei eng’ muguleldo kobiyonyi ortinwekyik: Ak yamatgei chito ne mie eng’ muguleldanyi.

¹⁵ Iyani ng’olyo age tugul ne abusat: Ago keerei komie chito ne ng’om ole wendi.

¹⁶ Iyweisiei chito ne ng’om, ak koistoegei yaitiet: Ago nerechi ne berber, ak komenei.

¹⁷ Inendet ne sib konerechi, koyaei tuguk eng’ abusnatet: Ak kiwechei chito ne tinyei chobutik che yaachen.

¹⁸ Berberindo ko borotetab che abusotin. Ago kilaakyin che ng’omen chepkuletab naet.

¹⁹ Ing’uruksei che yaachen eng’ taitab che miachen; Ak kong’uruksei kiptengeginik eng’ ormarichokab che bo iman.

²⁰ Kiwechei kibananiat, wechei agot chitab kokwennyi: Ago tinyei magoriot choronok che chang’.

²¹ Yaei tengekto chito ne sasei chitab kokwennyi: Ago baibai ne rire kibananok.

²² Tos mayaei chalwok bik che chobei yaitiet? Ago nyoru rirenet ak imanda che chobei mieindo.

²³ Tinyei kelunet boisiet age tugul: Ago ibu bananda ng’alek ichegei.

²⁴ Chepkuletab che ng’omen ko magornatosiekwak: Ago berberindab che berber ko berberindo kityo.

²⁵ Soru sobonwek baoriat ne bo iman: Ago ibu ng’alset inendet ne mwaei lembech.

²⁶ Mi kamang’unet ne kim eng’ kaiyweisiet ne kiywei Jehovah: Ak nyoru lagokyik ole mwechin.

²⁷ Kaiyweisiet ne kiywei Jehovah ko kondametutab beekab sobon, Si keistoege mestonokab meet.

²⁸ Torornatetab laitoriat ko chang’indab bikyik: Ago ng’emisietab bounindet ko ng’ering’indab bik.

²⁹ Tinyei naet ne o inendet ne masartae nerek: Ago tesei berberindo inendet ne sib konerechi.

³⁰ Sobondab borto muguleldo ne tinyei chametab ge: Ago nunatetab kowek ng’etkonda.

³¹ Iteweri Yaindennyi ne usei kibananiat; Ago konyiti Yaindennyi inendet ne rire ne matinyei kiy.

³² Kiwirjin ng’ony kiptengekyot amu boisionikyik che yaach: Ago tinyei kamang’unet ne bo iman eng’ meenyi.

³³ Tebe ng’omnatet muguleldab inendet ne tinyei naet: Ago king’anyei che mi mugulelwekab che berber.

³⁴ Itorori imanda bororiet: Ago iteweri tengekto boror age tugul.

³⁵ Chamei laitoriat otwogindet ne boisiei eng’ ng’omnatet: Ago nerekyin inendet ne ibu kalilanet.