KALEWANAIK 13 - BUKUIT NE TILIL

¹ Epchin it werit ne ng’om kotigonetab kwandanyi: Ago magasei keretab kong’ chotindet.

² Amei chito ne mie eng’ logoekab kutinnyi: Ago amei koromnatet sobondo ne yaei kaberberisiet.

³ Ribei sobondanyi ne ribei kutinnyi: Ago nyoru ng’emisiet ne yatei kutinnyi mising’.

⁴ Tinyei maget sobondab ne choriren, ak manyoru kiy: Ago nerei sobondab ne igiilegei.

⁵ Wechei chito ne bo iman lembechek: Ago samisitu chito ne ya, ak konyoru tewernatet.

⁶ Imanda ne ribei inendet ne litit eng’ oret: Ago igabui yaitiet kiptengekyot.

⁷ Mi ne yaegei koek magorio, ago matinyei kiy: Mi ne yaegei koek kibanania, ago tinyei magornatet ne o.

⁸ Kitiage sobondab chito magornatosiekyik: Ago magasei kibananok kamuiset.

⁹ Iluu mising’ lapkeiyetab che bo iman: Ago kimisi taitab kiptengeginik.

¹⁰ Ibu menotet boriet kityo: Ago mi ng’omnatet koboto ichek che ng’ategei.

¹¹ Ichuchugaksei magornatet ne kiginyoru eng’ menotet: Ago tesoksei che bo chito ne iyumi eng’ birtoetab ge.

¹² Miani muguleldo eng’ kamang’unet ne igaegei: Ago ye isulda magonato, koek anyun ketitab sobondo.

¹³ Age tugul ne sasei ng’olyot koipchingei ng’emisiet: Ago kigochin melekto chito ne iywei kayomiset.

¹⁴ Kondametutab sobon ng’atutietab ne ng’om: Si kobiit koistoegei mestonokab meet.

¹⁵ Ibu chamet naet ne mie: Ago uui oretab kaberberik.

¹⁶ Boisie naet chito age tugul ne ng’om: Ago iseeri ne berber berberindo.

¹⁷ Ibutyin yaitiet chito ne ya ne kiyoktoi: Ago egu chametab ge tononjinindet ne kiyani.

¹⁸ Nyoru bananda ak tewernatet inendet ne esioi kotigonet: Ago nyoru teegisto inendet ne epchin it keretab kong’.

¹⁹ Anyiny eng’ sobondo maget ne isuldaat: Ago wechei che berber ngo istoegei yaitwogik.

²⁰ Obendate ak bik che ng’omen, si ing’omitu: Ago nyoru nyalilda chito ne bendoti ak che berber.

²¹ Isubi yaitiet kiptengeginik: Ago kigeerjin che bo iman mieindo.

²² Bagakyin chito ne mie tugukyik mochogoronikyik; Ak kigonorjin chitab iman magornatetab kiptengekyot.

²³ Mi amitwogik che chang’ eng’ kabatisietab kibananok: Ago mi ne keng’emei amu mami imanda.

²⁴ Wechei werinnyi ne mabirei: Ago inendet ne chamei werinnyi kotigoni ko u ye nyolu.

²⁵ Amei ne bo iman kot kobiyo sobondanyi; Ago manyoru kiptengeginik che yamei.