KALEWANAIK 12 - BUKUIT NE TILIL

¹ Age tugul ne chamei kotigonet kochamei naet: Ago inendet ne esioi keretab kong’ ko u tiondo.

² Nyoru chamet eng’ Jehovah chito ne mie: Ago igikyin Jehovah chito ne bo chobutik che yaachen.

³ Magimitu chi eng’ yaitio: Amagoi kitut tigitiotab che bo iman.

⁴ Egu kwondo ne mie konditab manong’otiondennyi: Ago kwondo ne ibu kalilanet ko u nunatet eng’ kowekab chichoto.

⁵ Bo iman kabwatutikab che bo imanda: Ago ng’alset kiruogutikab kiptengeginik.

⁶ Sapchin kotumda korotik ng’alekab kiptengeginik: Ago soru ichek kutitab che bo iman.

⁷ Kigabui kiptengeginik, kot ko ma komi: Ago tononi gotab che bo iman.

⁸ Kilosu chi ko u kit ne te ng’omnatennyi: Ago kisasei inendet ne tinyei muguleldo ne imaasat.

⁹ Kaigai inendet ne kesasei, ak kotinyei otwogindet, Kosiir inendet ne ichaugei, ama tinyei amitwogik.

¹⁰ Ribei chito ne bo iman sobetab tennyi: Ago kolgolen rirenosiekab bik che yaach.

¹¹ Nyoru amitwogik che chang’ chito ne ibati korennyi: Ago inendet ne isubi tangoita, ko matinyei naet.

¹² Machei kiptengekyot mestetab bik che yaach: Ago yiei logoek tigitiotab che bo iman.

¹³ Mi mestetab chito ne ya bistoetab kutit: Ago mong’une nyalilda chito ne bo iman.

¹⁴ Biyonyi chito mieindo eng’ logoekab kutinnyi: Ak kigeerjin chito boisionikab eunekyik.

¹⁵ Litit eng’ ne berber orennyi ngo keerei: Ago epchin it kiruoget inendet ne ng’om.

¹⁶ Sib konaoksei neregekab ne berber: Ago unyei tewernatet chito ne ng’om.

¹⁷ Inendet ne mwaei iman kobortoi imanda, Ago ibortoi ng’alset baoriat ne ma bo iman.

¹⁸ Mi ne sartae ng’alek ko u rotwetab chok ne toorsei: Ago chametab ge ng’elyeptab ne ng’om.

¹⁹ Kigimiti koigeny kutit ne bo iman; Ago bo sait ne matia ng’elyepta ne mwaei lembech.

²⁰ Mi ng’alset mugulelwekab che chobei yaitiet: Ago tinyei boiboiyet che mwaitoi kalyet.

²¹ Manyoru yaitiet age tugul chito ne bo iman: Ago nyiiei yaitiet kiptengeginik.

²² Wechei Jehovah kutit ne mwaei lembech: Ago baibai inendet eng’ che boisie iman.

²³ Unyei naet chito ne ng’om: Ago mwaitoi mugulelwekab che berber berberindo.

²⁴ Bounisiei eutab ne igiilegei; Ago kibirjin chito ne choriren kobois.

²⁵ Ing’uruksei muguleldab chito amu nyigisindo ne tinyei; Ago iboiboi muguleloto ng’olyot ne mie.

²⁶ Chitab iman ko kandoindetab chitab kokwennyi: Ago ibeeti kiptengeginik orenywa.

²⁷ Mawatani chito ne choriren kit ne kanyor eng’ loget: Ago tinyei chito ne igiilegei tuguk che bo kamanutiet ne o.

²⁸ Mi sobondo oretab imanda; Ama mi meet eng’ orennyi.