KALEWANAIK 11 - BUKUIT NE TILIL

¹ Wechei Jehovah kerutiet ne ma bo iman: Ago chamei Jehovah kerutiet ne bo iman.

² Ye nyo menotet, konyo agine kalilanet: Ago mi ng’omnatet ak che iming’inegei.

³ Indochin che bo iman kagesunatenywa bo ge: Ago ng’emei che yaei kaberberisiet, kamaasenywa.

⁴ Matilei kiy magornatosiek eng’ betutab neregek: Ago sorunisiei imanda eng’ meet.

⁵ Indochin ne igesunotgei imandanyi eng’ orennyi: Ago ibuti kiptengekyot eng’ tengektanyi.

⁶ Soru che bo iman imandanywa: Ago kinamei che yaei kaberberisiet eng’ ng’alsenywa.

⁷ Ye mee chito ne kiptengekyot, kobet kamang’unennyi: Ak lusei kamang’unetab bik che bo tengek.

⁸ Kisoru ne bo iman komong’ eng’ nyalilda, Ak igeeri kiptengekyot inendet.

⁹ Ng’emei eng’ kutinnyi, chito ne maiywei Kamuktaindet, chitab kokwennyi: Ago kisoru che bo iman eng’ naet.

¹⁰ Ye bor che bo iman, kobaibaitu nganaset: Ak ye lusyo kiptengeginik, kobiitu kagasetab ge.

¹¹ Kitorori nganaset eng’ berurtab che bo iman: Ago igabui kutuswekab kiptengeginik nganaset.

¹² Matinyei ng’omnatet ne sasei chitab kokwennyi: Ago sisei chito ne tinyei naet.

¹³ Ng’anyei ung’otik inendet ne chaamsoti: Ago unyei ng’olyot inendet ne tinyei tamirmiriet ne bo iman.

¹⁴ Ibutos bik eng’ ole mami kandoiset ne bo ng’omnatet: Ago mi sorunet eng’ ole mi kiruogik che chang’.

¹⁵ Nyoru nyalilda ne tononjin too: Ago inendet ne wechei tononjinet kotebe chametab ge.

¹⁶ Nyoru teegisto kwondo ne mie: Teptoi bik che koromen magornatosiek.

¹⁷ Chito ne tinyei rirenetab ge koyachin ne mie sobondanyi: Ago chito ne kolgol konyalili bortanyi.

¹⁸ Nyoru kiptengekyot melektab ng’alset: Ago inendet ne kolei imanda kotinyei melekto ne bo iman.

¹⁹ Inendet ne kimitu eng’ imanda koityin sobondo: Ak inendet ne isubi yaitiet kosubi meennyi inegei.

²⁰ Wechei Jehovah icheget che imaasotin mugulelwek: Baibai inendet eng’ che igesunotgei eng’ orenywa.

²¹ Magimetoi iman chito ne ya ama kibir: Ago kisoru iyotetab che bo iman.

²² Kergei peteitab tahabu ne mi serutab toret, Ak kwondo ne kararan ne matinyei naet.

²³ Magutikab che bo iman ko miachen kityo: Ago kamang’unetab kiptengeginik ko neregek.

²⁴ Mi ne iseeri, ago tesoksei kosiir; Ak komi ne etei mising’ kosiir ne nyolu, ago ibu noto bananda.

²⁵ Nerei sobondab ne aiyeb: Ak kibisi ne ibisisiei.

²⁶ Chubei bik che etei bek: Ago kiberuri ne aldoi.

²⁷ Inendet ne cheng’ei ne mie eng’ kagiiletab ge, ko kacheng’ chamet; Ago inendet ne cheng’ei yaitiet, konyoru.

²⁸ Inendet ne imang’u magornatosiekyik, kobuti: Ago bitos che bo iman ko u sogot ne tuon.

²⁹ Inendet ne inyalili gonnyi konyoru usonet: Ak koegu ne berber otwogindetab ne ng’om eng’ muguleldo.

³⁰ Logoekab ne bo iman ketitab sobondo; Ng’om inendet ne soru sobonwekab bik.

³¹ Keero, kigeerjin ne bo iman eng’ ng’ony: Kotam nee anyun chito ne ya ak kiptengekyot!