KALEWANAIK 10 - BUKUIT NE TILIL

Kiboru eng’kalewenaichu ole terijindoi bik che ng’omen ak che berber.

¹ Kalewenaikab Solomon. Iboiboi werit ne ng’om kwanda: Ago inyalili werit ne berber kamet.

² Mami keluno konoraikab yaitiet: Ago soru imanda eng’ meet.

³ Machamjin Jehovah sobondab ne bo iman kotanui eng’ rubet: Ago timdoi magetab kiptengeginik.

⁴ Banani ne choriren: Ago ibu magornatet eutab ne igiiligei.

⁵ Ng’om werit ne iyumi eng’ kemei: Ago ibu tewernatet werit ne ruei kegesisiei.

⁶ Tebe kaberuroik ne bo iman: Ago tuchei koromnatet kutitab kiptengekyot.

⁷ Iberurot kabwatetab ne bo iman; Ago nunei kainetab kiptengeginik.

⁸ Taachei kayomisutik ne ng’om eng’ muguleldo: Ago ibuti ne berber ne chang’ ng’alek.

⁹ Inendet ne wendote lititindo kowendote chemetab ge: Ago naoksei inendet ne imaasi ortinwekyik.

¹⁰ Ibu arogenet ne ng’wegisie konda: Ago ibuti ne berber ne chang’ ng’alek.

¹¹ Kondametutab sobon kutitab ne bo iman: Ago tuchei koromnatet kutitab kiptengekyot.

¹² Ing’eeti wechet boriosiek: Ago tuchei chamnyet bistaosiek tugul.

¹³ Kinyorjin ng’omnatet kutitab chito ne tinyei ruchinet: Ago nyoljin kirokto batetab inendet ne matinyei naet.

¹⁴ Konori bik che ng’omen naet: Ago ng’emisiet ne negit kutitab ne berber.

¹⁵ Magornatetab magoriot ko nganasennyi ne kim: Ng’emisietab kibananok ko banandanywa.

¹⁶ Tokyingei sobondo boisietab ne bo iman; Tokyingei tengekto berurtab kiptengekyot.

¹⁷ Mitei oretab sobondo ne ribei kotigonet: Ago mastoi chito ne bagaktoi keretab kong’.

¹⁸ Inendet ne unyei weget kotinyei kutitab lembechek; Ak inendet ne mwaei ng’alekab chemereret ko berber.

¹⁹ Mabete bistoet ng’alek che chang’: Ago ng’om ne sisei.

²⁰ U fedaisiek che kororon ng’elyeptab ne bo iman: Matilei kiy muguleldab kiptengekyot.

²¹ Baei bik che chang’ kutitab chito ne bo iman: Ago begu che berber amu matinyei naet.

²² Imagornoni kaberuretab Jehovah, Ama testoi rirek.

²³ U ureriet eng’ ne berber ye yaei yaitwogik: Ak u noto ng’omnatet eng’ chito ne tinyei naet.

²⁴ Kit ne iywei kiptengekyot, ko noto ne nyonjin inendet: Ak kigochin che bo iman tuguk che machei.

²⁵ Ye siirto kipchurjuriet koma komi kiptengekyot: Ago lumeiywot ne bo koigeny chito ne bo iman.

²⁶ U siki eng’ kelek, ak u iyeto eng’ konyek, U noto chito ne choriren eng’ ichek che iyoktoi inendet.

²⁷ Tesei betusiek kaiyweisiet ne kiywei Jehovah: Ago kitilei kenyisiekab kiptengeginik kong’ering’itu.

²⁸ Kagasetab ge kamang’unetab che bo iman: Ago lusei kamang’unetab kiptengeginik.

²⁹ Irimet ne kim oretab Jehovah eng’ ne bo iman; Ago ng’emisiet eng’ yaikab yaitio.

³⁰ Magoi kiisto ne bo iman: Ago mamenyei kiptengeginik emet.

³¹ Mong’une ng’omnatet kutitab ne bo iman: Ago kitilei ng’elyeptab ne imaasisiei.

³² Ingen kutitab ne bo iman tuguk che taagaksei: Ago mwaei kutuswekab kiptengeginik ng’alek che bo kamaaset.