KAITOSYEK 4 - BUKUIT NE TILIL

Boisioniko Lawis eng’ banda

¹ Kimwachi anyun Jehovah Musa ak Aron kolenji,

² Iit werikab Kohat ichegei eng’ lagokab Lawik, ko u ortinwekwak, ak ko u gorikab kwanisiekwak,

³ koboch che bo kenyisiek sosom agoi che bo kenyisiek konom, tugul che imuchi boisiet, si kobiit koyai boisiet eng’ emait ne kituiyechin.

⁴ Nito boisiet ne bo werikab Kohat eng’ emait ne kituiyechin, agobo tuguk che tililen kosiir.

⁵ Ye katoi bik banda, koba go Aron ak werikyik, kocher anyun anget ne kioiye got konyo ng’ony, ak kotuge anganato moingetab baornatet,

⁶ ak koliige magatokab mengichikab beek, ak kotuge baragunnyi anget ne tuui ne nyalil kityo, ak korooch ketikyik che kiibe.

⁷ Ak ingoitoe bichoto anget ne tuui ne nyalil baragutab meset ne bo makatinik che bo kabartaet, ak konde baragunnyi tabok, ak kechigosiek, ak tageiywek ak kikombok che kirong’jine tuguk; ak kotebe baragunnyi makatinik che bo agoi;

⁸ ak kotuge tukchoto anget ne birir, ak koliige magatokab mengichikab beek, ak korooch ketikyik che kiibe.

⁹ Ak ingonam ichek anget ne tuui ne nyalil, ak kotuge keldab kit ne ikweng’sei, ak taisiekyik, ak kanameiywondennyi, ak tabokyik che mengechen, ak tugukyik tugul che bo mwanik, che kiboisiechine.

¹⁰ Ak ingonde tukchoto magatet orit ne bo mengitab beek, ak konde ketik che kiibe.

¹¹ Ak koitoe anget ne tuui ne nyalil kapkorosut ne bo tahabu, ak koliige magatokab mengichikab beek, ak korooch ketikyik che kiibe:

¹² ak ingonam ichek tuguk tugul che bo boisiet che kiboisie eng’ ole tilil, ak koliige anget ne tuui ne nyalil, ak kotuge tukchoto magatokab mengichikab beek, ak konde ketik che kiibe.

¹³ Ak kingoram orek eng’ kaptisisiet ak kotumda, ak koitoe baragunnyi anget ne arus ne birir;

¹⁴ ak konde tugukyik tugul baragunnyi che kiboisie eng’ kaptisisionoto, terenik, ak karik che sogotin, ak kechigosiek che eechen, ak tabok che mengechen, tuguk tugul che bo kaptisisiet; ak kotuge tukchoto tugul magatokab mengichikab beek, ak korooch ketikyik che kiibe.

¹⁵ Ak ye kagoges Aron ak werikyik boisiet ne bo tugetab ole tilil, ak tuguk tugul che bo ole tilil, ye machei nganaset kotoi banda; kobwa anyun werikab Kohat koib; ago amat kotwa ole tilil, si mabek. Tuguchuto che laei werikab Kohat eng’ emait ne kituiyechin.

¹⁶ Egu boisietab Eleasar weritab Aron tisiindet mwaitab kit ne ikweng’sei, ak nyamdutik che kibeelei, ak kagochinetab busiek che bo kotugul, ak mwanik che kiilse, ak ripset tugul ne bo got, ak ne bo tuguk tugul che mi orit, ak ne bo ole tilil koboto tugukyik.

¹⁷ Kimwachi Jehovah Musa ak Aron kolenji,

¹⁸ Mongobetyo oretab gorikab Kohatik eng’ Lawik;

¹⁹ ago oyachi ko u ni, si kosopcho, amabek, ye rikyin tuguk che tililen mising’ kosiir: bendi go Aron ak werikyik, ak koborji chi age tugul eng’ ichek boisiennyi ak tuguk che laei;

²⁰ ago amat koba go kogeer ole tilil, agot kitigin, si mabek.

²¹ Ak kimwachi Jehovah Musa kolenji,

²² Iit werikab Gerson agichek, ko u gorikab kwanisiekwak, ko u ortinwekwak;

²³ iiti koboch che bo kenyisiek sosom ak kwo tai agoi che bo kenyisiek konom; tugul che bendi go koboisiei eng’ emait ne kituiyechin.

²⁴ Ni boisiet ne bo gorikab Gersonik, ye boisiei ak ye laisei:

²⁵ ibei ichek ngoroik che bo got, ak emait ne kituiyechin, ak ngoroikyik che kituge, ak ngoroikab mengichikab beek che tabanu baragunnyi, ak ngoroik che kigere kurgetab emait ne kituiyechin;

²⁶ ak ngoroik che u emait che kiyieme seremut, ak ngoriet ne bo ye kibunei eng’ ormarichetab seremut, ne yiemei got ak kaptisisiet, ak boroonikwak, ak tuguk tugul che bo boisienywa, ak koyai bichoto kiy age tugul ne bo boisietab tuguchoto.

²⁷ Bou Aron ak werikyik boisionik tugul che yaei werikab Gersonik, eng’ laisenywa tugul, ak eng’ boisienywa tugul; ak oborji ichek, ong’atyi laisenywa tugul.

²⁸ Nito boisiet ne bo gorikab werikab Gersonik eng’ emait ne kituiyechin: ak kobou boisienywa Itamar weritab Aron tisiindet.

²⁹ Ak iit werikab Merari, ko u ortinwekwak, ak ko u gorikab kwanisiekwak;

³⁰ iiti koboch che bo kenyisiek sosom ak kwo tai agoi che bo kenyisiek konom, chi age tugul ne wendi boisiet, si kobiit koyai boisietab emait ne kituiyechin.

³¹ Ni ng’atutietab laisenywa, ko u boisienywa tugul eng’ emait ne kituiyechin; baoinik che bo got, ak rateiywekyik, ak lumeiywekyik ak kelongonikyik che tononie;

³² ak lumeiywek che yiemei seremut kotuiyo, ak kelongonikwak, ak tigongenikwak, ak boroonikwak, koboto tugukwak tugul ak boisienywa: ak oborji chi age tugul kainetab kit ne laei.

³³ Nito boisiet ne bo gorikab werikab Merari, ko u boisienywa tugul, eng’ emait ne kituiyechin, ne bou Itamar weritab Aron tisiindet.

³⁴ Ak kiit Musa ak Aron ak bounikab tuiyet werikab Kohatik, ko u ortinwekwak, ak gorikab kwanisiekwak,

³⁵ iiti koboch che bo kenyisiek sosom ak kwo tai agoi che bo kenyisiek konom, chi age tugul ne wendi boisiet, si kobiit koyai boisiet eng’ emait ne kituiyechin:

³⁶ ak kiek elfusiek aeng’ ak bogol tisab ak konom che kigiit ko u gorikwak.

³⁷ Chu che kigiit eng’ gorikab Kohatik, tugul che kiboisiei eng’ emait ne kituiyechin, che kiit Musa ak Aron ko u ng’atutietab Jehovah eng’ Musa.

³⁸ Ak kiek che kigiit che bo werikab Gerson, ko u ortinwekwak, ak ko u gorikab kwanisiekwak,

³⁹ koboch che bo kenyisiek sosom ak kwo tai agoi che bo kenyisiek konom, chi age tugul ne wendi boisiet, kobois eng’ emait ne kituiyechin,

⁴⁰ choto che kigiit eng’ ichek, ko u ortinwekwak, ko u gorikab kwanisiekwak, ko ki elfusiek aeng’ bogol lo ak sosom.

⁴¹ Choto che kigiit eng’ gorikab werikab Gerson, tugul che kiboisiei eng’ emait ne kituiyechin, che kiit Musa ak Aron ko u ng’atutietab Jehovah.

⁴² Ak kiek che kigiit che bo ortinwekab werikab Merari, ko u ortinwekwak, ak ko u gorikab kwanisiekwak,

⁴³ koboch che bo kenyisiek sosom ak kwo tai agoi che bo kenyisiek konom, chi age tugul ne wendi boisiet, si kobois eng’ emait ne kituiyechin,

⁴⁴ choto che kigiit eng’ ichek ko u gorikwak, ko ki elfusiek somok ak bogol aeng’.

⁴⁵ Chuto ichek che kigiit che bo gorikab werikab Merari, che kiit Musa ak Aron ko u ng’atutietab Jehovah eng’ Musa.

⁴⁶ Choto tugul che kigiit eng’ Lawik, che kiit Musa ak Aron ak bounikab Israel, ko u ortinwekwak, ak ko u gorikab kwanisiekwak,

⁴⁷ koboch che bo kenyisiek sosom ak kwo tai agoi che bo kenyisiek konom, chi age tugul ne kiwa koyai boisiet, ak boisietab laiset ne bo tuguk eng’ emait ne kituiyechin,

⁴⁸ choto che kigiit eng’ ichek, ko ki elfusiek sisiit ak bogol mut ak tamanwogik sisiit.

⁴⁹ Kigiit eng’ Musa ko u ng’atutietab Jehovah, chi tugul ko u boisiennyi, ak ko u laisennyi. Kigiit anyun ichek ko u noto, ko u ye king’at Jehovah Musa.