KAITOSYEK 31 - BUKUIT NE TILIL

Kebarei Midianik kot kogesgei

¹ Ak kimwachi Jehovah Musa kolenji,

² Yaakyi mugetut Midianik amu lagokab Israel: yeityo kiyumin iwe ole mi biguk.

³ Ak kimwachi Musa bik kolenji, Eng’ murenik che otinye olaakyi alak karik, amu luget, si koba kobargei ak Midianik, koyai yaaktaetab mugetut ne bo Jehovah eng’ Midian.

⁴ Oyokte elfut eng’ oret age tugul, eng’ ortinwek tugul che bo Israel, koba luget.

⁵ Kigikwei eng’ elfusiekab Israel, elfut eng’ oret age tugul, murenik elfusiek taman ak aeng’ che ratotin ge eng’ karikab luget.

⁶ Ak kiiyokto Musa ichek, elfut agenge eng’ oret age tugul, koba luget, icheget koboto Pineas agine weritab Eleasar tisiindet, ak tugukab ole tilil ak igondisiek che kiguutei eng’ waagat, eng’ eunnyi.

⁷ Ak kibargei ak Midianik, ko u ye king’at Jehovah Musa; ak kibar muren age tugul.

⁸ Ak kibar laitorinik che bo Midian, koboto chun alak che kiga kebar; Ebi, Rekem, Sur, Hur, ak Reba, choto laitorinik mut che bo Midian: kibar Balaam weritab Beor agine eng’ rotwetab chok.

⁹ Ak kiluul lagokab Israel kwonyikab Midianik ak lagokwak; ak kiluul tukwak tugul, ak nekwak tugul, ak tugukwak tugul.

¹⁰ Ak kibeel nganasokwak tugul ole menyei, ak meng’otosiekwak tugul.

¹¹ Ak kiib tuguk tugul, ak tugul che kigiluul, eng’ bik ak eng’ che kiyai.

¹² Ak kiimut luulenik, ak akwotisiek, ak tugukwak, kobwa ole mi Musa, ak Eleasar tisiindet, ak tuiyetab lagokab Israel, agoi nganaset ne mitei warengetab Moab, ne mi ole negite Jordan eng’ Jeriko.

¹³ Ak kiba Musa, ak Eleasar tisiindet, ak kiruogik tugul che bo tuiyet, kotorokta eng’ sang’utab nganaset.

¹⁴ Ak kinerekyi Musa kandoikab luget, kiptainikab elfusiek ak kiptainikab bogolusiek, che kibunu boisietab luget.

¹⁵ Ak kiteebe Musa, kolenji, Koobagakte kobogorisiek tugul kosopcho?

¹⁶ Ogeero, chuto che kiigochi lagokab Israel kolelji Jehovah eng’ ng’olyotab Peor, eng’ ng’olyotab Balaam; ak kibiit koroito eng’ tuiyetab Jehovah amu noto.

¹⁷ Ara anyun, obar werit age tugul eng’ lagok, ak obar kwony age tugul ne kigoruiyo ak muren.

¹⁸ Ago orib kosopcho kobunjok tibik tugul che tomo koruiyo ak muren.

¹⁹ Yeityo otebi eng’ sang’utab nganaset betusiek tisab: chi age tugul ne kogobar chi, anan chi age tugul ne kogotwa mustab ne kogibarei, oanyinge eng’ betutab somok ak eng’ betutab tisab, okwek ak luulenikwok.

²⁰ Ak oanyiny okwege ngoriet age tugul, ak kiy age tugul ne kigiyae muito, anan boisiet age tugul ne bo kororikab ng’ororek, ak tuguk tugul che kigiyae ketik.

²¹ Ak kilenji Eleasar murenikab luget che kiba boriet, Nito ng’atutiet ne bo karureiywot ne king’at Jehovah Musa:

²² ago tahabu, feda, sugunonik, karik, kibatinik, ak ngosielait,

²³ kiy age tugul ne machootei eng’ mat, obeel anyun choto eng’ ma, si kotililitu; ago kitilili eng’ beek che bo katabanet: ak onde beek tuguk tugul che chootos eng’ mat.

²⁴ Ak omwet ngoroikwok eng’ betutab tisab, ak oanyinyitu, ak ye ibata, obwa nganaset orit.

²⁵ Ak kimwachi Jehovah Musa, kolenji,

²⁶ Iit luulenik tugul che kigenam, che bik ak che kiyagi, inye ak tisiindet Eleasar, ak bounikab gorikab kwanisiek che bo tuiyet:

²⁷ ak ipchei che kioluul kobwa kebeberwek aeng’u; bunjin kebeberta age bik che ingen luget, che kiga ba boriet; kobunji age tuiyet komugul:

²⁸ yeityo inemu aisurut ne bo Jehovah eng’ murenikab luget che kiba boriet: agenge eng’ bogol mut, eng’ bik, ak eng’ tuga, ak eng’ sigirok, ak eng’ kechirek:

²⁹ onemune choto kebebertanywa ak igochi tisiindet Eleasar, koek kagochinet ne kinamjin barak ne bo Jehovah.

³⁰ Ak inemu eng’ kebebertab lagokab Israel, agenge eng’ konom, eng’ bik, eng’ akwotisiek, eng’ sigirok, ak eng’ nego, ak eng’ tuga tugul, ak igochi choto Lawik, che ribei boisietab gotab Jehovah.

³¹ Ak kiyai Musa ak Eleasar tisiindet ko u ye king’at Jehovah Musa.

³² Ak che king’at eng’ che kinam murenikab luget, ko ki kechirek elfusiek bogol lo ak tamanwogik tisab ak mut,

³³ ak eng’ tuga ko ki elfusiek tamanwogik tisab ak aeng’,

³⁴ ak sigirok elfusiek tamanwogik lo ak agenge,

³⁵ ak bik elfusiek sosom ak aeng’ tugul, che kobogorisiek che kitomo koruiyo ak muren.

³⁶ Koitetab kebeberta, noto bo bik che kiga ba luget, ko ki kechirek elfusiek bogol somok ak sosom ak tisab ak bogol mut:

³⁷ ak ki bogol lo ak tamanwogik tisab ak mut aisurutab Jehovah ne bo kechirek.

³⁸ Ak kiek che bo tuga elfusiek sosom ak lo; ak kiek aisurutab Jehovah eng’ choto, tamanwogik tisab ak aeng’.

³⁹ Ak sigirok, ko ki elfusiek sosom ak bogol mut; ak kiek aisurutab Jehovah eng’ choto, tamanwogik lo ak agenge.

⁴⁰ Ak kiek bik elfusiek taman ak lo; ak kiek aisurutab Jehovah eng’ choto bik sosom ak aeng’.

⁴¹ Ak kiigochi Musa Eleasar tisiindet kebeberta, kagochinet ne kinamjin barak, ne bo Jehovah, ko u ye king’at Jehovah Musa.

⁴² Ak eng’ kebebertab lagokab Israel, ne kiitaban Musa eng’ murenik che kiyai luget,

⁴³ (kiek kebebertab tuiyet kechirek elfusiek bogol somok ak sosom ak tisab ak bogol mut,

⁴⁴ ak che bo tuga elfusiek sosom ak lo,

⁴⁵ ak sigirok elfusiek sosom ak bogol mut,

⁴⁶ ak bik elfusiek taman ak lo;)

⁴⁷ ak kiinem Musa eng’ kebebertab lagokab Israel, agenge eng’ konom, eng’ bik, ak eng’ akwotisiek, ak kogochi Lawik, che kiribei boisietab gotab Jehovah; ko u ye king’at Jehovah Musa.

⁴⁸ Ak kirikyi Musa kandoik che bo elfusiekab luget, ak kiptainikab elfusiek, ak kiptainikab bogolusiek:

⁴⁹ ak kilenji Musa, Kagiit achek otwogiguk murenikab luget che kibou, ak ma bet agot agenge eng’ achek.

⁵⁰ Ak kageibu kagochinetab Jehovah kit ne konyor chi age tugul, eng’ tugukab tahabu, ak mugurek che bo kelyek, ak karik che bo eunek, ak peteinik che bo ng’okset, ak munaok, ak sonoek, si koyachi kagaigaet sobonwekyok eng’ taitab Jehovah.

⁵¹ Ak kitaach Musa ak Eleasar tisiindet tahabu che bo tukchoto eng’ ichek, agot tuguk tugul che kigitany.

⁵² Ak tahabu tugul che bo kagochinet ne kinamjin barak che kiigochi Jehovah, che bo kiptainikab elfusiek, ak che bo kiptainik che bo bogolusiek, ko ki sekelisiek elfusiek taman ak lo ak bogol tisab ak konom.

⁵³ (Amu kiga koib murenikab luget tuguk che kigiluul, kiipchigei chi tugul chechik.)

⁵⁴ Ak kitaach Musa ak Eleasar tisiindet tahabu eng’ kiptainikab elfusiek ak che bo bogolusiek, ak koib kobwa emait ne kituiyechin, kobunji kabwatet ne bo lagokab Israel eng’ taitab Jehovah.