JOSHUA 23 - BUKUIT NE TILIL

Ng’alek che bo tai che kimwae Josua saisere

¹ Ak kingobata betusiek che chang’, kingo kagogochi Jehovah Israel kamuung’et eng’ bunikwak tugul eng’ komoswek tugul, ak kiga koosit Josua, kiga kotar kenyisiek che chang’;

² koguur anyun Josua Israel tugul, boisiekwak ak kandoikwak, ak kiruogikwak ak kiptainikwak, ak kolenji ichek, Kaaositu, kigochang’it kenyisiekyuk;

³ ak kiogeer tuguk tugul che kigoyachi Jehovah Kamuktaindeng’wong’ bororiosiechu tugul amu okwek; amu Jehovah Kamuktaindeng’wong’, inendet ne kiyai luget agobo okwek.

⁴ Ogeero, kiapcheiywok bororiosiechu kang’et, koek borotetab ortinwekwok, koboch Jordan, koboto bororiosiek tugul che kiabar, agoi nyanjet ne o ne tokyingei ole roroktoe asista.

⁵ Ak timdoi Jehovah Kamuktaindeng’wong’ ichek eng’ taing’wong’, ak koon si ma ogeere; ak onam emenywa kobunjok, ko u ye kimwawok Jehovah Kamuktaindeng’wong’.

⁶ Onyiganitu anyun mising’ si orib ak oyai tuguk tugul che kigisir eng’ bukuitab Ng’atutik ne bo Musa, si momaste oistoege tuguchoto, obe eutab tai anan ko ne bo katam;

⁷ si mobe kwenutab bororiosiechu, chuto kong’et eng’ kwenung’wong’; anan omwa kainaikab kanamonikwak, anan oyosie eng’ ichek, anan oot, anan ogutung’ji:

⁸ ago onamge ak Jehovah Kamuktaindeng’wong’, ko u ye kioyai agoi ra.

⁹ Amu kigoon Jehovah eng’ taing’wong’ bororiosiek che eechen ak ko kimen: ago ma biit chi ne kitonon eng’ taing’wong’ agoi ra.

¹⁰ Onei chito agenge eng’ okwek elfut, amu Jehovah Kamuktaindeng’wong’ ne yaei luget agobo okwek, ko u ye kimwawok.

¹¹ Oripge anyun mising’ si ocham Jehovah Kamuktaindeng’wong’.

¹² Amu ngot ochuchuige obe let eng’ kiy age tugul, ak onamge ak bororiosiechuto king’et, chuto king’et eng’ kwenung’wong’, ak otunge ak ichek, ak obe ole mi: ak kobwa ole omi:

¹³ onai komie ole ma koonei kogeny Jehovah Kamuktaindeng’wong’ bororiosiechuto eng’ taing’wong’, ago egu mestet ak kit ne riichei bich eng’ okwek, ak kipcharitit eng’ karasaikwok, ak katok eng’ konyekwok, kot kotun olusye eng’ emoni kararan kigonok Jehovah Kamuktaindeng’wong.

¹⁴ Ak ogeero, awendi rani oret ne bendi bik tugul che bo ng’ony: ongen eng’ mugulelwekwok tugul ak eng’ sobonwekwok tugul, ole ma bet ng’olyo agot agenge eng’ tuguk tugul che miachen che kimwa Jehovah Kamuktaindeng’wong’ agobo okwek; kiisulda choto tugul eng’ okwek, ma bet kiy agot agenge eng’ choto.

¹⁵ Ak koek ko u ye kibwanjok tuguk tugul che miachen che kimwawok Jehovah Kamuktaindeng’wong’, koibwok Jehovah ko u noto, tuguk tugul che yaachen, agoi kogeswok eng’ emoni kararan kigonok Jehovah Kamuktaindeng’wong’.

¹⁶ Ye ongelelji kayomisetab Jehovah Kamuktaindeng’wong’, ne king’atak, ak obe oot kanamonik, ak ogutung’ji; kolalyo anyun neregekab Jehovah agobo okwek, ak obegu ochokyi, ochakte eng’ emoni kararan kigogonok inendet.