JOEL 2 - BUKUIT NE TILIL

Kemwau ng’oiyondit ne bichii ne ibu chereng’endet

¹ Oguut iriaget eng’ Sion, ak owaach eng’ tulwennyu ne tilil; ingobotanso bik tugul che menyei emet: amu nyonei betutab Jehovah, amu kagorik,

² betutab mesundeito ak tuuindo, betutab bolik ak mesundeito ne nyigis, ko u ye machei korir emet eng’ tulonok; bororiet ne o ak ko kim, ne kitomo kobiitu ne u noto, ama kobiitu ne u ichek kogeny, agoi kenyisiekab ibinwek che chang’.

³ Amisiei mat eng’ tainywa; ak lalei liblibenetab mat eng’ let: u emet mbaretab Eden eng’ tainywa, ak kagoek ong’atet kityo ole bo let; ee, ma biit ne kachilile ichek.

⁴ U itondanywa itondab mbartanyisiek; ak koruaei ko u bik che lanyei mbartanyisiek.

⁵ U ruaenywa kirgirenetab karisiekab luget eng’ tulonok barak, ak ko u cheetab liblibenetab mat ne beelei mobek, ko u bik che kimen che tetegei eng’ boriet.

⁶ Bichiityin bororiosiek eng’ tainywa: walaksei togochikab bik tugul amu kaiyweisiet.

⁷ Ruaei ko u che nyigonen; lanyei irimet ko u bikab luget; wendi age tugul orennyi kotokyingei tai, bendi kibagenge.

⁸ Ama toortoi age age; wendi age tugul eng’ orennyi: siarei karik, ama mastoi.

⁹ Torombenjin nganaset; ruaei eng’ irimet; lanyei kobendi gorik orit; chutei tirisiok ko u chorik.

¹⁰ Botani emet eng’ tainywa; botandos kipsengwetisiek: imenitu asista ak arawet, ama koluu kecheik.

¹¹ Ak kotwek Jehovah eng’ taitab lugennyi; amu o kabuureitanyi; amu kim inendet ne yaei ng’olyondennyi kosulda; amu o betutab Jehovah ak komuisei mising’; ng’o ne imuchi komuita?

Keguurjin bik sigunet ak karugutetab ge

¹² Ago mwaei Jehovah kole, Oweekyage agot nguno eng’ mugulelwekwok tugul, eng’ karugutetab ge, ak eng’ rirek, ak eng’ kateeiyet:

¹³ ak ogerer mugulelwekwok, amogerer ngoroikwok, ak oweekyige Jehovah Kamuktaindeng’wong’: amu tinyei mieindo inendet ak ko nyiitat rirenet, masib konerechi, ak tinyei chang’indab rirenet, ak kowalei kabwatutikyik eng’ yaitiet.

¹⁴ Ng’o ne ingen ngo tos ma week ak kowal kabwatutikyik, ak kobagakta kaberuret eng’ ole kabunei, agot kagochinetab busiek ak kagochinet ne kieei ne kigochin Jehovah Kamuktaindeng’wong’?

¹⁵ Oguut iriaget eng’ Sion, otaban karugutetab ge, oguur tuiyet ne bo kaming’inetab ge:

¹⁶ oyum bik, oanyiny tuiyet, oyum boisiek, oyum lagok, koboto che chuchuni: ingomong’ sandet eng’ gonnyi ne bo orit, ak ingomong’ agine mureret eng’ gonnyi.

¹⁷ Ingoririo tisiik, kiboitinikab Jehovah, eng’ kwenutab keterut ak kaptisisiet, ak ingomwa kole, Ee Jehovah, rire biguk, amegochi boroteng’ung’ kechot, kot koboi bororiosiek ichek: amu nee anyun si komwa bororiosiek kole, Mi ano Kamuktaindenywa?

Koboru Jehovah rirenennyi ak koweegu borotet

¹⁸ Kiam ng’etkong’ anyun Jehovah amu emennyi, ak kirire bikyik.

¹⁹ Ak kiwolji Jehovah bikyik kolenji, Ogeero, ayokwok bek ak divaik ak mwanik, ak obiyong’se eng’ choto: amayaok kogeny oegu che kichotei eng’ bororiosiek:

²⁰ ago aistoi kolooit eng’ okwek luget ne bunu murot ne bo katam, ak aone kwo emet ne ong’atet ak ko surkwen, bendi che indoi kotokyingei nyanjet ne mi kong’asis, kobendi che letu nyanjet ne mi cherongo; ak kobul, ak kong’u ne samis, amu kogoyai tuguk che eechen.

²¹ Ee emoni, ameiywei, igasge ak ibaibaitu, amu kogoyai Jehovah tuguk che eechen.

²² Amoiyweisie, okwek tiong’ikab timin, amu ta kobitos suswek eng’ ong’atet, amu yiei ketit logoekyik, yiei komie mogoiywet ak ketitab sabibuk.

²³ Ogasge anyun, okwek lagokab Sion, ak oboiboitu eng’ Jehovah Kamuktaindeng’wong’: amu konok ropta ne bo tai ko u ye nyolu, ak konu ropta korobonjok, ropta ne bo tai ak ne bo let, ko u eng’ tai.

²⁴ Ak konyi bek ruanyusiek che kiborse, ak kong’irtagei divaik ak mwanik eng’ ole itendenjin.

²⁵ Ak ageeruok che bo kenyisiek che kiam chereng’endet, ak tinapchet, masaek, ak munene, lugennyu ne o ne kiayogu konyo kwenung’wong’.

²⁶ Ak oam che chang’ ak obiyong’se, ak olosu kainetab Jehovah Kamuktaindeng’wong’, ne kiyaiywok tuguk che kikwong’e: ak ma kolilandos bikyuk kogeny.

²⁷ Ak onai ole ami kwenutab Israel, ak onai ole a Jehovah Kamuktaindeng’wong’, ama mi age: ak ma kolilandos bikyuk kogeny.

Kiaroru rong’unetab Tamirmirietab Jehovah

²⁸ Ak ye ibata choto, ko tun arong’jini Tamirmiriennyu bik tugul; ak komaoten werikwok ak tibikwok, iruotyin boisiekwok karuotitaosiek, keerei murenikwok ng’ang’utik:

²⁹ ak arong’ji kogeny Tamirmiriennyu otwogik che murenik ak tibik eng’ betusiechoto.

³⁰ Ak abarte kwong’utik eng’ kipsengwetisiek, ak eng’ ng’ony, korotik, ak mat, ak tolochikab iyeto.

³¹ Ak koimenit asista, ak koigei korotik arawet, kotom koit betut ne o ne imuisei ne bo Jehovah.

³² Ak tun kisoru age tugul ne kuurei kainetab Jehovah: amu tun mitei che chilildos eng’ tulwetab Sion ak Jerusalem, ko u ye kigomwa Jehovah, ak tun kuurei Jehovah alak eng’ ichek che king’et.