JEREMIA 52 - BUKUIT NE TILIL

Tetutikab tuguk che kigobiit che kigesune

¹ Ki bo kenyisiek tiptem ak agenge Sedekia ye kitau kolaitorani; ak kilaitoran kenyisiek taman ak agenge eng’ Jerusalem: ak kainetab kamennyi ko ki Hamutal cheptab Jeremia ne bo Libna.

² Ak kiyai yaitiet eng’ taitab Jehovah, ko u tugul che kiga koyai Jeoiakim.

³ Ak kibiitune tuguchoto neregekab Jehovah eng’ Jerusalem ak Juda kot kotimda ichek koba eng’ tainnyi. Ak kiingelelji Sedekia laitoriatab Babulon.

⁴ Ak eng’ kenyitab sogol ne bo laitornatennyi, eng’ arawetab taman, eng’ betutab taman ne bo arawanato, konyo Nebukadresar laitoriatab Babulon, inendet ak lugennyi tugul, kobokyi Jerusalem, ak koteech kotokyigei nganaset; ak kiteech ichek irimoik koyiem.

⁵ Koyiem anyun nganaset agoi kenyitab taman ak agenge ne bo laitoriat Sedekia.

⁶ King’wanit rubet eng’ nganasanato eng’ arawetab ang’wan eng’ betutab sogol ne bo arawanato, ne kima komi amitwogik che amei bik eng’ emet.

⁷ Kobut anyun bik irimetab nganaset, ak kimwei murenik tugul che bo luget kemoi kobun oretab ormarichet ne kimi kwenutab inatusiek aeng’, ne kimi ole negite seremutab laitoriat; (kigayiem Kaldeik nganaset:) ak kibun ichek oretab Araba.

⁸ Ago kion lugetab Kaldeik laitoriat, ak kinam Sedekia eng’ warengosiekab Jeriko; ak kiyesta lugennyi tugul kometo inendet.

⁹ Komut anyun laitoriat, ak komut kwo ole mi laitoriatab Babulon eng’ Ribla eng’ emetab Hamat; ak kiiruokyi inendet.

¹⁰ Ak kibar laitoriatab Babulon werikab Sedekia kogeerei inendet: kibar kogeny bounik tugul che bo Juda eng’ Ribla.

¹¹ Ak kibar konyekab Sedekia; ak korat laitoriatab Babulon inendet eng’ sirimwek, ak komut inendet kwo Babulon, ak kitoorji inendet korgoret agoi betutab meennyi.

¹² Ak eng’ arawetab mut, eng’ betutab taman ne bo arawanato, ne ki kenyitab taman ak sogol ne bo laitoriat Nebukadresar laitoriatab Babulon, konyo Nebusaradan, kiptaiyatab ribik, ne kitononi eng’ taitab laitoriatab Babulon, agoi Jerusalem:

¹³ ak kibeel gotab Jehovah, ak gotab laitoriat; ak gorik tugul che bo Jerusalem, got age tugul ne o, ko kibeel.

¹⁴ Ak kibut luget tugul ne bo Kaldeik ne kimi koboto kiptaiyatab ribik, irimoik tugul che bo Jerusalem, komoswek tugul.

¹⁵ Yeityo komut koluul Nebusaradan kiptaiyatab ribik bik che kibananok mising’, ak bik che kiga ng’et eng’ nganaset, ak che kiga chililso, che kiigochigei laitoriatab Babulon, ak bikab tuiyet che kigong’et.

¹⁶ Ago kibagakta Nebusaradan kiptaiyatab ribik, bik che kibananok mising’ eng’ emet, koek ribikab sabibuk ak koek semberik.

¹⁷ Ak kitui Kaldeik tolochikab sugunonik che kimi gotab Jehovah, ak ng’echerok che kitebe tuguk ak nyanjet ne bo sugunwet ne kimi gotab Jehovah, ak koib sugunonik tugul che bo tuguchoto koba Babulon.

¹⁸ Ak kiib terenik, ak kechigosiek che eechen, ak magasisiek che kitile ole lalei eng’ taisiek, koboto tabok ak kechigosiek, ak terenik tugul che bo sugunonik che kiboisie.

¹⁹ Ak kikombok, ak tuguk che kiibe mat, ak tabok, ak terenik, ak kelyekab taisiek, ak kechigosiek, ak tabok; ak kiib kiptaiyatab ribik tuguk che kigiyae tahabu, ko tahabu, ak tuguk che kigiyae feda, ko feda.

²⁰ Tolochichoto, koboto nyanjanato agenge, ak itonwek taman ak aeng’ che bo sugunonik che bo kirugik, che kimitei kureretab ng’echerok che kitebe, che kiga yachi laitoriat Solomon gotab Jehovah: ma naoksei nyigisindab sugunonikab tuguchuto tugul.

²¹ Ago eng’ tolochik, koindab tononetab agenge ko ki kakwautik taman ak sisiit che bo eut; ak ki kakwautik taman ak aeng’ che bo eut nyigisindab toloato ngeyiem; ak ki morik ang’wan nyigisindanyi ngikwa: kigiyai kioto koek soiyet.

²² Ak kimi metitab sugunwet baragunnyi; ak koindab tononetab metoto ko ki kakwautik mut che bo eut, koboto karik che regerotin, ak logoek che kimi metoto komoswek tugul, che ki bo tugul sugunonik: ak kitinyei toloita ne bo aeng’ agine tuguk che u choto, koboto logoek.

²³ Ak kimi logoek tamanwogik sogolu ak lo komoswekyik; ki bogol agenge logoechoto tugul che kimi karichato regerotin eng’ komoswek tugul.

²⁴ Ak kiimut kiptaiyatab ribik Seraia tisiindet ne o, ak Sepania tisiindet ne bo aeng’, ak ribik somok che kiribei kurget:

²⁵ Ak kiimut eng’ nganaset kiptaiyat ne kibou luget: ak bik tisab eng’ ichek che kigeerei togetab laitoriat, che kiginyorji nganaset; ak sirindet ne bo kiptaiyatab luget, ne kiiyumi bikab emet; ak bik tamanwogik lo che bo emet che kiginyorji nganaset.

²⁶ Ak kiimut Nebusaradan kiptaiyatab ribik bichoto, komutyi laitoriatab Babulon eng’ Ribla.

²⁷ Ak kibir laitoriatab Babulon bichoto, ak kobar eng’ Ribla, eng’ emetab Hamat. Kigimut anyun Juda keluul komanda eng’ emennyi.

²⁸ Chu bik che kiimut Nebukadresar koluul: eng’ kenyitab tisab ko kiluul Yahudik elfusiek somok ak tiptem ak somok:

²⁹ eng’ kenyitab taman ak sisiit ne bo Nebukadresar komut koluul eng’ Jerusalem bik bogolwogik sisiit ak sosom ak aeng’.

³⁰ Eng’ kenyitab tiptem ak somok ne bo Nebukadresar komut Nubusaraden kiptaiyatab ribik, bik bogolwogik tisab ak artam ak mut che bo Yahudik: kiek bik tugul elfusiek ang’wan ak bogol lo.

³¹ Ak eng’ kenyitab sosom ak tisab koboch ngeluul Jeoiakin laitoriatab Juda, eng’ arawetab taman ak aeng’, eng’ betutab tiptem ak mut ne bo arawanato, kotiach Ebil-merodak laitoriatab Babulon eng’ kenyit ne bo tai ne bo laitornatennyi, Jeoiakin laitoriatab Juda, komong’ eng’ korgoret;

³² ak king’alalji inendet eng’ rirenetab ge, ak konde ng’echerennyi ne bo laitornatet kotororit eng’ che bo laitorinik che kimi Babulon koboto inendet.

³³ Ak kiwal ngoroikyik che bo korgoret, ak kiamis eng’ tainnyi kotugul eng’ betusiek tugul che bo sobennyi.

³⁴ Ak kiigochi laitoriatab Babulon inendet kotugul kebebertanyi ne bo amitwogik, kiigochin betut age tugul kebeberta ne yamei eng’ betusiek tugul che bo sobennyi, agoi betutab meennyi.