JEREMIA 44 - BUKUIT NE TILIL

Kogerei kong’ Jeremia Yahudik che mi Misri amu saetab kanamonik

¹ Kinyonji ng’olyot Jeremia agobo Yahudik tugul che kimenyei emetab Misri, che kimenyei Migdok, ak Tapanes, ak Nop, ak emetab Patros, kolenji,

² Mwaei Jehovah ne bo lugosiek, Kamuktaindetab Israel, ko u ni kole: Kiogeer yaitiet tugul ne kiapchi Jerusalem, ak nganasok tugul che bo Juda; ak ogeero, karatwek rani nganasochato, ama mi chi ne menyei oloto;

³ amu yaitienywa ne kigoyai kotacha anerech, amu kiba kobeel nyamdutik, koot cheptalelisiek che kima kongen, icheget, anan okwek, anan kwanisiekwok.

⁴ Ago kiayokwok otwogikyuk tugul, che maotik, ang’eete karon mising’ ak ayogu, alenjinok, Bwa, amat oyai kiito samis ne aweche.

⁵ Ago ma kas, anan koeb it si kobiit koweek kometo yaitienywa, si mata kobeelji nyamdutik cheptalelisiek che ter.

⁶ Kirong’gei anyun neregekyuk che ng’wonen ak neregekyuk, ak kilalyo eng’ nganasokab Juda ak eng’ ortinwek che bo Jerusalem; ak kigoek karatwek ak kigoguber, ko u kit ne u betusiechu.

⁷ Mwaei anyun Jehovah Kamuktaindet ne bo lugosiek, Kamuktaindetab Israel, ko u ni kole: Amu nee si oyachi sobonwekwok yaitioni o, si kobiit kigesunenok muren ak kwony, lakwa ak ne reriei, komong’ eng’ Juda, si mang’etwok agot agenge;

⁸ amu otagena boisionikab eunekwok, obeeljini nyamdutik cheptalelisiek eng’ emetab Misri, ole kiobe otebe; si kobiit kigeswok, ak oegu che kisasei ak che kichotei eng’ bororiosiek tugul che bo ng’ony?

⁹ Tos kioutie yaitwogikab kwanisiekwok, ak yaitwogikab laitorinikab Juda, ak yaitwogikab osotikwak, ak yaitwogikwok, ak yaitwogikab osotikwok, che kiyai eng’ emetab Juda, ak eng’ ortinwekab Jerusalem?

¹⁰ Ma iming’ingei agoi rani, anan koiyweis, anan kobendate ng’atutikyuk, anan kayomisutikyuk, che kiande taing’wong’, ak eng’ taitab kwanisiekwok.

¹¹ Mwaei anyun Jehovah ne bo lugosiek, Kamuktaindetab Israel, ko u ni kole: Ogeero, atokyinok togennyu aibwok yaitiet, agoi agesu Juda tugul.

¹² Ak anam che ng’etu che bo Juda, che kitokyigei emetab Misri, koba kotebe oloto, ak kigesu ichek tugul: ibutos eng’ emetab Misri; kigesu ichek eng’ rotwetab chok ak eng’ rubet; begu ichek, kong’eete ne ming’in agoi ne o, eng’ rotwetab chok ak eng’ rubet: ak koek che kichubei, ak che kikwong’e, ak che kisasei, ak che kichotei.

¹³ Amu abire ichek che menyei emetab Misri, ko u ye kiabir Jerusalem, eng’ rotwetab chok, ak eng’ rubet, ak eng’ koroito;

¹⁴ kot ko machilil anan kong’et agot agenge eng’ che kiga ng’et che bo Juda, che kiba emetab Misri, kotebe oloto, kole koweek kobwa emetab Juda, emet ne machei kole koweekyigei koba komeny: amu mabiitu ne weechigei kobate ne chilili.

¹⁵ Kiwol anyun murenik tugul che kiingen kole kibeeljin osotikwak nyamdutik cheptalelisiek che ter, ak kwonyik tugul che kitonondos eng’ ole negit, che ki tuiyet ne o, agot bik tugul che kimenyei emetab Misri, eng’ Patros, kowolji Jeremia kolenji,

¹⁶ Magigasun ng’olyondonoto kemwawech eng’ kainetab Jehovah.

¹⁷ Ago kiyae iman ng’olyot age tugul ne kagemwa, kele kibeeljini nyamdutik laitoriatab kipsengwet, ne kwondo, ak kerong’jini inendet kagochinoik che kieei, ko u ye kigeyai, achek ak kwanisiekyok, ak laitorinikyok, ak bounikyok, eng’ nganasokab Juda, ak eng’ ortinwek che bo Jerusalem: amu kigitinye eng’ betusiechoto amitwogik che chang’, ak kigichamege, ama kigeer yaitio.

¹⁸ Ago koboch ngab kebagakte kebeelji nyamdutik laitoriatab kipsengwet ne kwondo, ak kerong’jini kagochinoik che kieei, korarwech tuguk tugul, ak kigeswech eng’ rotwetab chok ak rubet.

¹⁹ Ak ye kigibeeljini nyamdutik laitoriatab kipsengwet ne kwondo, ak kerong’jini kagochinoik che kieei, tos ma kikwang’kwang’ji makatinik che kilosune inendet, ak kerong’ji kagochinoik che kieei, ko maboto manong’otaikyok?

²⁰ Kimwachi anyun Jeremia bik tugul, murenik, ak kwonyik, agot bik tugul che kiga kowolji, kolenji,

²¹ Tos kima ibwat Jehovah ichek ama chut metinnyi, nyamdutik che kiobeele eng’ nganasokab Juda, ak eng’ ortinwek che bo Jerusalem, okwek ak kwanisiekwok, laitorinikwok, ak bounikwok, ak bikab emet,

²² kot ko mata komuch Jehovah komuita, amu yaitietab boisionikwok, ak amu tuguk che kiwechei che kioyai? Kiek anyun emeng’wong’ ne kuberot, ak ne kikwong’e, ak ne kisasei, ama menyei chi, ko u ye u rani.

²³ Amu kiobeel nyamdutik, ak amu kioyachi Jehovah tengekto, ama ogas it kutitab Jehovah, anan obendate ng’atutikyik, anan kayomisutikyik, anan baornatosiekyik; konyonjok anyun yaitioni ko u ye u rani.

²⁴ Kimwachi kogeny Jeremia bik tugul, koboto kwonyik tugul, kolenji: Ogas ng’olyotab Jehovah, okwek Juda tugul che omi emetab Misri:

²⁵ Mwaei Jehovah ne bo lugosiek, Kamuktaindetab Israel, ko u ni kole, Kiomwa eng’ kutuswekwok, okwek koboto osotikwok, ak oyai kosulda, eng’ eunekwok, olen, Kiyae iman kaarorunosiek che kigiaroru, kebeelji nyamdutik laitoriatab kipsengwet ne kwondo, ak kerong’ji kagochinoik che kieei: ogimit anyun kaarorunosiekwok, ak oyai kaarorunosiekwok.

²⁶ Ogas anyun ng’olyotab Jehovah, okwek bikab Juda tugul che omenye emetab Misri: Ogeero, koayosie eng’ kainennyu ne o, mwaei Jehovah, ale, ma komwaei kainennyu chi age tugul ne bo Juda eng’ emet tugul ne bo Misri, kole, Ko u ye sobei Kiptaiyat Jehovah.

²⁷ Ogeero, aribe ichek agobo yaitiet, ma agobo ne mie: ak kigesu murenik tugul che bo Juda che mi emetab Misri, eng’ rotwetab chok ak eng’ rubet, agoi kogesgei.

²⁸ Ak koweeigei ichek che chilile rotwetab chok komong’ eng’ emetab Misri, kobwa Juda, che ng’ering’; ak konai tugul che kigong’et che bo Juda, che kiba emetab Misri koba kotebe oloto, kole ng’olyotab ng’o ne isuldoi, nenyu anan nenywa.

²⁹ Ak ni kaborunet eng’ okwek, mwaei Jehovah, ale kabirok eng’ olito, si onai ole isuldoi iman ng’alekyuk koibwok yaitiet:

³⁰ Mwaei Jehovah ko u ni kole: Ogeero, andoi Parao Hopra laitoriatab Misri, eutab bunikyik, ak eutab icheget che cheng’ei sobondanyi; ko u ye kiande Sedekia laitoriatab Juda, eutab Nebukadresar laitoriatab Babulon, bunyondennyi, ak ko ne kicheng’ei sobondanyi.