JEREMIA 37 - BUKUIT NE TILIL

Tuguk che kibiit koga koyiem bunik Jeremia

¹ Ak kilaitoran Sedekia weritab Josia kogeer Konia weritab Jeoiakim ne kiieet Nebukadresar laitoriatab Babulon koek laitoriat eng’ emetab Juda.

² Ago ma kas inendet, anan otwogikyik, anan bikab emet, ng’alekab Jehovah che kimwaei eng’ maotiot Jeremia.

³ Ak kiiyokto Sedekia laitoriat Jeukal weritab Selemia, ak Sepania weritab Maaseia tisiindet, koba oldab maotiot Jeremia, kolenji, Saiywech anyun Jehovah Kamuktaindennyo.

⁴ Kinyonei anyun Jeremia orit ak komandoi eng’ kwenutab bik: amu kitom korat chi inendet eng’ korgoret.

⁵ Ak kiibok lugetab Parao eng’ Misri: ak kingo kagogas Kaldeik che kiga koyiem Jerusalem ng’alekwak, koba eng’ Jerusalem.

⁶ Yeityo konyonji ng’olyotab Jehovah maotiot Jeremia, kolenji,

⁷ Mwaei Jehovah, Kamuktaindetab Israel, ko u ni kole: Omwachi ko u ni laitoriatab Juda, ne kaiyokwok obwa oteepsena, olenji: Keero, lugetab Parao, ne kanyo kotoretin, koweeksei kobendi Misri emenywa.

⁸ Ak kobwa Kaldeik kogeny, ak kobargei ak nganasani; ak koluul, ak kobeel.

⁹ Mwaei Jehovah ko u ni kole: Amat oberberge, ole, Istoeneige iman Kaldeik: amu maistogei.

¹⁰ Amu nganda kiobar luget komugul ne bo Kaldeik che kiborienok, kot kong’et kityo bik che kigiguoten eng’ ichek, ko ta kong’eetei chi age tugul eng’ emainnyi, ak kobeel nganasani.

¹¹ Ak kingo kagotogosta lugetab Kaldeik koba eng’ Jerusalem, amu kiiywei lugetab Parao,

¹² kwo anyun Jeremia eng’ Jerusalem agoi emetab Benjamin, kwo konam kebebertanyi eng’ oloto, eng’ kwenutab bik.

¹³ Ak ye kimi ormarichetab Benjamin, ko kimi agine yoto kiptaiyatab ribik, ne kigiguure Irija, weritab Selemia, weritab Hanania; ak kinam maotiot Jeremia, kolenji, Iwendi onamege ak Kaldeik.

¹⁴ Kowolji anyun Jeremia, kolenji, Lembech noto; mawendi kenamge ak Kaldeik; ago ma kasyi: konam anyun Irija Jeremia, ak komutyi bounik.

¹⁵ Ak kinerekyi bounik Jeremia, ak kobir, ak kotoorji korgoret eng’ gotab Jonatan sirindet; amu kiga koyai yoto koek korgoret.

¹⁶ Kingo kagoit Jeremia gotab keringet, agoi gorik che kigerjin bik, ak kingo kagotebe Jeremia oloto betusiek che chang’;

¹⁷ koyokto anyun Sedekia laitoriat kimut inendet konyo: ak kiteepse laitoriat inendet eng’ ung’ot eng’ gonnyi, kolenji, Tos mi ng’olyot age tugul ne bunu Jehovah? Ak kile Jeremia, Mitei. Kimwa kogeny kole, Kindein eutab laitoriatab Babulon.

¹⁸ Kimwachi kogeny Jeremia laitoriat Sedekia kolenji, Kiayaun tengek nee, anan otwogiguk, anan bichu, kot otoorja korgoret?

¹⁹ Mi ano anyun nguno maotikwok che kimaotenwok, kolenjinok, Manyojinin laitoriatab Babulon obarge, anan kobargei ak emoni?

²⁰ Asain anyun, ee kiptaiyandennyu laitoriat, ale, kaswa somennyu; asain ale ameweekya gotab Jonatan sirindet, si mameechi oloto.

²¹ King’at anyun Sedekia laitoriat, ak kigimut Jeremia kwo seremutab ribik, ak kigigochin makatiat eng’ betut age tugul kobunu oretab bik che beelei makatinik, agoi kogesgei makatinik tugul eng’ nganaset. Kitebi anyun Jeremia ko u noto eng’ seremutab ribik.