JEREMIA 26 - BUKUIT NE TILIL

Sib kemwau ng’emisietab gotab Jehovah: ng’oiyonditab Jeremia

¹ Kibun ng’onyondoni Jehovah eng’ taunetab laitornatetab Jeoiakim weritab Josia, laitoriatab Juda, kole,

² Kamwa Jehovah ko u ni kole: Tonon eng’ seremutab gotab Jehovah, ak ing’alalji nganasok tugul che bo Juda, che cham kobwanei kolosu eng’ gotab Jehovah, mwachi ng’alek tugul che ang’atin; imwachi; ametuuch ng’olyo.

³ Abere imuchi kogas, ak koweek chi age tugul eng’ orennyi ne ya; si kobiit awal kabwatutikyuk eng’ yaitiet ne kiga achob ale ayachini ichek amu yaitietab boisionikwak.

⁴ Ak ilenji ichek, Kamwa Jehovah ko u ni kole: Ngot ko mocham ogasa, obendate ng’atutikyuk, che kiande taing’wong’,

⁵ ogas ng’alekab otwogikyuk maotik, che ayokwok, ang’eete karon mising’ ak ayokwok, ago kima ogas;

⁶ ayae anyun goi koigei Silo, ak ayai nganasani koek ne sasei bororiosiek tugul che bo ng’ony.

⁷ Ak kigasei tisiik ak maotik ak bik tugul komwaei Jeremia ng’alechuto eng’ gotab Jehovah.

⁸ Ak kingo kagoges Jeremia ng’alalet tugul ne kiga ng’at Jehovah komwachi bik tugul, konam anyun tisiik ak maotik ak bik tugul inendet, kolenji, Imee iman.

⁹ Amu nee si imaoten eng’ kainetab Jehovah, ile, Igeitu goi Silo, ak koek karatia nganasani, ama komenyei chi? Ak kiiyumjigei bik tugul Jeremia eng’ gotab Jehovah.

¹⁰ Ak kingogas bounikab Juda tuguchuto, kotogos eng’ gotab laitoriat kobwa gotab Jehovah; ak kiteb ng’ony eng’ ole kibunei eng’ ormarichet ne leel ne bo gotab Jehovah.

¹¹ Yeityo komwachi tisiik ak maotik, bounik, ak bik tugul kolenji, Nyoljin meet chichi; amu kogomaoten kit ne ya agobo nganasani, ko u ye koogas eng’ itikwok.

¹² Yeityo komwachi Jeremia bounik tugul ak bik tugul kolenji, Kiiyokwa Jehovah amaoten kit ne ya agobo goi ak nganasani, amwa ng’alek tugul che koogas.

¹³ Noto anyun, olitit ortinwekwok ak boisionikwok, ak ogas it kutitab Jehovah Kamuktaindeng’wong’; si kowal Jehovah kabwatutikyik eng’ yaitiet ne kogomwa agobo okwek.

¹⁴ Ago ogeero, ami ane eung’wong’: oyaiywa ko u ye ogeere ole mie ak ko bo iman.

¹⁵ Ago onai komie ole, ngot obara, oipchinige korotik che matinyei tengek, koboto nganasani, ak bik tugul che menyei olito: amu kagoyokwa Jehovah iman anyo amwawok ng’alechuto tugul ogase.

¹⁶ Yeityo komwachi bounik ak bik tugul tisiik ak maotik kolenji: Manyoljin meet chichi; amu kagong’alalwech eng’ kainetab Jehovah Kamuktaindennyo.

¹⁷ Kong’eetyo anyun boisiek alak che bo emet, ak komwachi tuiyet tugul ne bo bik kolenji,

¹⁸ Kimaoten Mikaia Morastindet eng’ betusiekab Hesekia laitoriatab Juda; ak king’alalji bik tugul che bo Juda kolenji, Kamwa Jehovah ne bo lugosiek ko u ni kole: Kibati Sion ko u ye kibati mbaret, ak koek Jerusalem karurugutik, ak koigei tulwetab got komoswek che tororen che bo osnet.

¹⁹ Tos kita kobar Hesekia laitoriatab Juda ak Juda tugul inendet? Tos kima iywei Jehovah, ak kogaigai Jehovah, kot kowal Jehovah kabwatutikyik eng’ yaitiet ne kiga komwa agobo ichek? Ngot keyai ko u noto, ko kagiipchi sobonwekyok yaitiet ne o.

²⁰ Ak kimi chito age agine ne kimaoten eng’ kainetab Jehovah, inendet ko ki Uria weritab Semaia ne bo Kiriat-jearim; ak kimaoten kit ne ya agobo nganasani ak emet, ko u ng’alek tugul che bo Jeremia.

²¹ Ak ye kingogas laitoriat Jeoiakim, koboto bikyik tugul che nyigonen, ak bounik tugul, ko kicheng’ laitoriat kobar inendet; ago ye kingogas Uria, koiywei ak komwei, kwo Misri.

²² Ak kiiyokto laitoriat Jeoiakim bik koba Misri, choto ko Elnatan weritab Akbor, ak bik alak che kimi koboto inendet, koba agoi Misri;

²³ ak kiimut Uria eng’ Misri, komutyi Jeoiakim laitoriat, ne kibar inendet eng’ rotwetab chok, ak kowirji mustanyi kererisiekab bik che ma toogunotin.

²⁴ Ago kirib Aikam weritab Sapan Jeremia, si magigoito inendet kobar bik.