Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

JEREMIA 25 - BUKUIT NE TILIL


Katerteret ne iterteri Babulon Juda

1 Kinyonji ng’olyot Jeremia agobo bik tugul che bo Juda eng’ kenyit ne bo ang’wan ne bo Jeoiakim weritab Josia, laitoriatab Juda; kenyit ne bo tai noto ne bo Nebukadresar laitoriatab Babulon;

2 ne kimwachi maotiot Jeremia bik tugul che bo Juda, koboto bik tugul che menyei Jerusalem, kolenji:

3 Kinyonja ng’olyotab Jehovah koboch kenyitab taman ak somok ne bo Josia weritab Amon, laitoriatab Juda, agoi ra, kenyisiechu tiptem ak somok, ak kiamwawok, ang’eete karon mising’ ak ang’alalwok; ago ma ogas.

4 Ak kigoyokwok Jehovah otwogikyik tugul che maotik, kong’eetei karon mising’ ak koyogu ichek; ago ma ogas, anan oeb it, si kobiit ogas;

5 komwaei kole, Ingoweek age tugul eng’ okwek, kometo orennyi ne ya, ak eng’ yaitietab boisionikwok, ak omeny emet ne kigonok Jehovah koboto kwanisiekwok, koboch keny agoi koigeny;

6 amosubote cheptalelisiek che ter, oot ak olosu ichek, amotacha eng’ boisionikab eunekwok; si mayaiywok ne ya.

7 Ago kima ogasa kora, mwaei Jehovah; si kobiit otacha eng’ boisionikab eunekwok, si oipchinege ng’wanindo.

8 Kamwa anyun Jehovah ne bo lugosiek ko u ni kole: Amu ma ogas ng’alekyuk,

9 ogeero, ayoktoi kenam bikab ortinwek tugul che bo murot ne bo katam, mwaei Jehovah, koboto Nebukadresar, laitoriatab Babulon, otwogindennyu, ak amutu ichek kobokyi emoni, ak bik che menyei olito, ak bororiosiechu tugul che mi komoswechuto; ak ang’em ichek, agesu, ak ayai koek kwong’et, ak ne kirenyei, ak karotwek betusiek tugul.

10 Ak aistoe ichek anyun tugetab boiboiyet, ak ne bo kagasetab ge, ne bo sandet ak ne bo mureret, koboto cheetab koitab bai, ak lapkeiyetab tait.

11 Ak koek karatia emoni komugul, ak kwong’et; ak koot bororiosiechu latioriatab Babulon kenyisiek tamanwogik tisab.

12 Ak ye kagobata kenyisiek tamanwogik tisabu, abir anyun laitoriatab Babulon, ak bororionoto, mwaei Jehovah, amu yaitienywa, ak emetab Kaldeik; ak ayai koek karatia agoi.

13 Ak aipchi emonoto ng’alekyuk tugul che kiamwa agobo oloto, tuguk tugul che kigisirji bukuini, che kigomaoten Jeremia agobo bororiosiek tugul.

14 Amu yaei bororiosiek che chang’ ak laitorinik che eechen ichek koek otwogikwak, koot ichek: ak ayaakyi ichek ko u boisionikwak, ko u boisionikab eunekwak.


Kikombetab divaik che bo neregekab Jehovah, che kigochin bororiosiek kose

15 Amu kamwawa Jehovah Kamuktaindetab Israel ko u ni kole: Nam eng’ eunnyu kikombetab divaik che bo neregechu ng’omen, si igochi bororiosiechu tugul che ayoktochini koee.

16 Ak koeei, ak koterteriot, koam iywek, amu rotwetab chok ne ayoktochini ichek.

17 Kianam anyun kikombet eng’ eutab Jehovah, ak agochi bororiosiek tugul, che kiga koyoktocha Jehovah, koee:

18 choto ko Jerusalem, ak nganasokab Juda, ak laitorinikyik, ak bounikyik, si koyai ichek koek karatia, kwong’et, ne kirenyei, ak ne kisasei; ko u eng’ betuni;

19 Parao laitoriatab Misri, ak otwogikyik, bounikyik, ak bikyik tugul;

20 koboto bik tugul che kiburuigei, ak laitorinik tugul che bo emetab Us, laitorinik tugul che bo emetab Pilistik, ak Askelon, Gasa, Ekron, ak che king’et che bo Asdod;

21 Edom, Moab, ak lagokab Amon;

22 ak laitorinik tugul che bo Turo, ak laitorinik tugul che bo Sidon, ak laitorinik che bo ngegut ne mi nyanjet bitonin;

23 Dedan, Tema, ak Bus, ak ichek tugul che bioregei;

24 ak laitorinik tugul che bo Arabia, ak laitorinik tugul che bo bik che kiburuigei che menyei ong’atet;

25 ak laitorinik tugul che bo Simri, ak laitorinik tugul che bo Elam, ak laitorinik tugul che bo Medik;

26 ak laitorinik tugul che bo murot ne bo katam, che looen ak che negit, age tugul; ak bounatosiek tugul che bo ng’ony, che mi ng’ony: ak eei laitoriatab Sesak ye kagoee ichek.

27 Ak ilenji ichek, Kamwa Jehovah ne bo lugosiek, Kamuktaindetab Israel, ko u ni kole: Oee ak obogitye, ak ong’ung’u, ak obutye, ama ong’eetosi kogeny, amu rotwetab chok ne ayogu konyo kwenung’wong’.

28 Ak ngot koesio konam kikombet eng’ eung’ung’, ak koee, ilenji anyun, Kamwa Jehovah ne bo lugosiek ko u ni kole: Kanyol oee.

29 Amu, ogeero, atau ayae yaitiet eng’ nganaset ne kimwaitoe kainennyu, ko tos otebi ama kibirok iman? Mochilile biret: amu aguurjini rotwetab chok bik tugul che menyei ng’ony, mwaei Jehovah ne bo lugosiek.

30 Maotenji anyun eng’ ng’alechu tugul, ilenji, Boriseni Jehovah eng’ barak, ak kotwegu eng’ meng’otennyi ne tilil; borisenjin mising’ akwennyi; waachei ko u che tiechei sabibuk, kowaakyi bik tugul che menyei ng’ony.

31 Itei bolatet tabanwekab ng’ony; amu bortos Jehovah ak bororiosiek, iruoksechin inendet bik tugul; ak igoitoi kiptengeginik kebar eng’ rotwetab chok, mwaei Jehovah.

32 Mwaei Jehovah ne bo lugosiek ko u ni kole, Ogeero, Wendi yaitiet kobunei bororiet age agoi bororiet age, ak king’eet kipchurjuriet ne o eng’ tabanwekab ng’ony.

33 Ak konyi emet eng’ betunoto bik che barei Jehovah, koboch tabanda age ne bo ng’ony agoi tabanda age: mami chi ne iteei agobo ichek, ama kiyumi, ama kitubei; egu ng’atatek eng’ emet.

34 Oteiye, okwek mestowek, ak oririe; omildaege orek, okwek che o eechen eng’ akwet; amu kagoit betusiek che kibarenok, ak atonatonak, ak obutye ko u teret ne kichamei.

35 Ama biitu ole mwechin mestowek, anan ole chililjin che eechen che bo akwet.

36 Kutitab rirekab mestowek, ak kateetab che eechen che bo akwet! Amu ng’emei Jehovah ole agete.

37 Ak kosisyo biusiek che bo kalyet amu neregek che koromen che bo Jehovah.

38 Kigometo ole ung’egei, ko u ng’etundo: amu kigoek emenywa ne kikwong’e amu koromnatetab rotwetab chok ne usisiei, ak amu neregekyik che koromen.

God's word open for all

©Bible Society of Kenya, 2020

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ